រថយន្តក្រុង១០គ្រឿងត្រៀមសម្រាប់ដឹកជញ្ជូនប្រជាពលរដ្ឋមកលេងស្រុកកំណើត គោលដៅភ្នំពេញ-កំពង់ឆ្នាំង

កំពង់ឆ្នាំង ៖ រដ្ឋបាលខេត្តកំពង់ឆ្នាំង បានជូនដំណឹងថា រដ្ឋបាលរាជធានីភ្នំពេញ នឹងរៀបចំរថយន្តក្រុងចំនួន ៦០០ គ្រឿង សម្រាប់បម្រើសេវាដឹកជញ្ជូនសាធារណៈដោយមិនបង់ប្រាក់រយះពេល ៦ថ្ងៃ ចាប់ពីថ្ងៃទី១២ ដល់ថ្ងៃទី១៧ ខែមេសា ឆ្នាំ២០២៦ ដើម្បីជួយសម្រួលដល់ការចំណាយ របស់បងប្អូនប្រជាពលរដ្ឋ ក្នុងការធ្វើដំណើរមកលេងស្រុកកំណើត ជួបជុំបងប្អូន ក្រុមគ្រួសារ ក្នុងឳកាសបុណ្យចូលឆ្នាំថ្មី ប្រពៃណីជាតិខ្មែរ ឆ្នាំមមី អដ្ឋស័ក ពុទ្ធសករាជ ២៥៧០ ។

រដ្ឋបាលខេត្តកំពង់ឆ្នាំង បញ្ជាក់ថា សម្រាប់គោលដៅភ្នំពេញ-កំពង់ឆ្នាំង និងកំពង់ឆ្នាំង-ភ្នំពេញ មានរថយន្ត ចំនួន១០ គ្រឿង ចេញដំណើរចាប់ពីម៉ោង៦ និង៣០នាទីព្រឹក ដល់ម៉ោង១១ និង៣០នាទីព្រឹក ទីតាំងចេញដំណើរ ចំណតរថយន្តក្រុងសួនច្បារឬស្សីកែវ ( ភ្នំពេញ ) និងចំណតរថយន្តផ្សារលើ ( ខេត្តកំពង់ឆ្នាំង ) ។

រដ្ឋបាលខេត្តកំពង់ឆ្នាំង ក៏បានអំពាវនាវដល់ម្ចាស់ក្រុមហ៊ុន ម្ចាស់អាជីវកម្ម និងម្ចាស់រថយន្តដឹកជញ្ជូនអ្នកដំណើរទាំងអស់ សូមផ្តល់កិច្ចសហការ រក្សាតម្លៃដឹកជញ្ជូនឲ្យបាននៅដដែល ដោយពុំដំឡើងថ្លៃ ក្នុងឳកាសពិធីបុណ្យចូលឆ្នាំថ្មីខាងមុខនេះ ដើម្បីរួមចំណែកជាមួយរាជរដ្ឋាភិបាល ក្នុងការជួយសម្រួលដល់ការចំណាយ និងជីវភាពរស់នៅ របស់ប្រជាពលរដ្ឋ ៕