ឯកឧត្តម នេត្រ ភក្ត្រា ​៖ការ​ពង្រឹង​គុណ​ភាព​វិស័យ​ព័ត៌​មាន​ គឺ​មាន​សារ​សំខាន់​លើ​ការ​គ្រប់​គ្រង​សម​រភូមិ​សតិ​អារម្មណ៍ ​និង​ទប់ស្កាត់​ការ​រីកសាយ​ភាយ​នូវ​ព័ត៌​មាន​ក្លែងក្លាយ​ក្នុង​សង្គម​កម្ពុជា​

រដ្ឋមន្ត្រីក្រសួងព័ត៌មានថ្លែងថា ការពង្រឹងគុណភាពវិស័យព័ត៌មាន គឺមានសារៈសំខាន់លើការគ្រប់គ្រងសមរភូមិសតិអារម្មណ៍ក្នុងពេលនៃការរីកចម្រើនផ្នែកបញ្ញាសិប្បនិម្មិត(AI) និងទប់ស្កាត់ការរីកសាយភាយនូវព័ត៌មានក្លែងក្លាយក្នុងសង្គមកម្ពុជា ។

នេះជាការថ្លែងរបស់ ឯកឧត្តម នេត្រ ភក្រ្តា រដ្ឋមន្ត្រីក្រសួងព័ត៌មាន ក្នុងឱកាសអញ្ជើញជាអធិបតីបើកសិក្ខាសាលាស្ដីពីការផ្ទៀងផ្ទាត់ព័ត៌មានជាវីដេអូ និងការប្រើប្រាស់បញ្ញាសប្បនិម្មិត( AI )ក្នុងប្រព័ន្ធផ្សព្វផ្សាយ រៀបចំឡើងដោយក្រសួងព័ត៌មាន ក្រោមកិច្ចសហការគាំទ្រពីក្រុមហ៊ុន Viory នៅព្រឹកថ្ងៃទី៣០ ខែតុលា ឆ្នាំ២០២៥ នាសាលមណ្ឌលបណ្តុះបណ្តាល និងវិក្រឹតការវិជ្ជាជីវៈសារព័ត៌មាន ។

ឯកឧត្តម រដ្ឋមន្ត្រី នេត្រ ភក្ត្រា បានគូសបញ្ជាក់ថា នៅក្នុងបរិបទបច្ចុប្បន្នពេលដែលប្រព័ន្ធផ្សព្វផ្សាយបុរាណត្រូវបានធ្លាក់ចុះនូវតួនាទី ហើយមានការកើនឡើងច្រើននូវប្រព័ន្ធផ្សព្វផ្សាយបែបទំនើប បានធ្វើឲ្យស្ថានភាពនៃការបំពុលនៃព័ត៌មានក្លែងក្លាយគឺមានចំនួនច្រើន ហើយធ្វើឲ្យប្រជាពលរដ្ឋ សាធារណជនទូទៅពេលខ្លះបាត់បង់ជំនឿទុកចិត្តមកលើប្រព័ន្ធផ្សព្វផ្សាយ ដោយសារអ្វីដែលគាត់ទទួលបានហាក់បីដូចជាមានការពិបាកនៅក្នុងការគិតថា តើព័ត៌មានណាត្រឹមត្រូវ ព័ត៌មានណាមិនត្រឹមត្រូវ ។ នេះគឺជាការលំបាកមួយសម្រាប់ប្រជាពលរដ្ឋនៅក្នុងបរិបទនៃបច្ចេកវិទ្យាមានការវិវត្តន៍កើនឡើង ។ ប៉ុន្តែក្នុងរយៈពេល ២ឆ្នាំចុងក្រោយនេះ ក្រសួងព័ត៌មានបានខិតខំប្រឹងប្រែងពង្រឹងទៅលើយន្តការនៃការគ្រប់គ្រងព័ត៌មាន ដើម្បីធ្វើយ៉ាងណាឲ្យប្រជាពលរដ្ឋទទួលបានព័ត៌មានប្រកបដោយសុវត្ថិភាព ។

ឯកឧត្តម បានបញ្ជាក់ថា ទោះបីប្រព័ន្ធផ្សព្វផ្សាយបែបទំនើបមានការរីកចម្រើនក៏ដោយ តែប្រព័ន្ធផ្សព្វផ្សាយបែបបុរាណ នៅតែដើរតួនាទីសំខាន់ គឺជាមជ្ឈមណ្ឌលផ្តល់ព័ត៌មានមួយដែលត្រឹមត្រូវ មិនផ្តល់នូវអ្វីដែលជាព័ត៌មានមិនត្រឹមត្រូវដូច Facebook, TikTok ដែលបុគ្គលណាក៏អាចបង្កើតបានដែរ។ ឯកឧត្តម បានបញ្ជាក់ថា នៅក្នុងក្របខណ្ឌការងារដែលក្រសួងព័ត៌មាន បានដាក់ចុះ គឺនិយាយពីសន្តិសុខព័ត៌មាន ដែលផ្តោតលើកត្តាបីសំខាន់,ទី១ ធានាសិទ្ធិទទួលព័ត៌មានរបស់ប្រជាពលរដ្ឋ គឺធ្វើយ៉ាងមិចឲ្យប្រជាពលរដ្ឋទទួលបានព័ត៌មានគ្រប់ទម្រង់ទាំងអស់ ទាំងមធ្យោបាយផ្សព្វផ្សាយបែបបុរាណ និងទំនើប អាចប្រើប្រាស់បានក្នុងការទទួលបានព័ត៌មាន ។ ទី២៖ គុណភាពព័ត៌មាន ផ្តល់ជូនប្រជាពលរដ្ឋ ទី៣៖ សុវត្ថិភាពព័ត៌មាន សម្រាប់ប្រជាពលរដ្ឋប្រើប្រាស់ កិច្ចការងារនេះ គឺថាការរួមចំណែកដល់ការពង្រឹងសន្តិសុខ និងស្ថិរភាពសង្គម។ ឯកឧត្តមរដ្ឋមន្ត្រី បានបញ្ជាក់ថា ការនិយាយពី សុវត្ថិភាពព័ត៌មាន សន្តិសុខព័ត៌មាន គឺមិនមែនជាការបំបិទសេរីភាពសារព័ត៌មាន និងសិទ្ធិសេរីភាពក្នុងការបញ្ចេញមតិនោះទេ ប៉ុន្តែជាការប្រើប្រាស់តួនាទីភារកិច្ច កាតព្វកិច្ចក្នុងការផ្តល់នូវព័ត៌មានពិត និងត្រឹមត្រូវដល់សាធារណជនទូទៅ។

នៅក្នុងឱកាសនៃអង្គសិក្ខាសាលាដែលមានសិក្ខាកាមជាអ្នកសារព័ត៌មានជាច្រើនរូប និងមានការអញ្ជើញចូលរួមពី លោក ស្រី Nhishaeni Parmanadan តំណាង ក្រុម ហ៊ុនទីភ្នាក់ងារព័ត៌មាន Viory ប្រចាំតំបន់អាស៊ី និងក្រុមការងារ Viory មកពីប្រទេស អារ៉ាប់អេមីរ៉ាត់នេះដែរ ឯកឧត្តម រដ្ឋមន្ត្រីក្រសួងព័ត៌មាន បានគូសបញ្ជាក់ពីមូលហេតុអ្វីបានជាគេត្រូវបង្កើត ព័ត៌មានក្លែងក្លាយ? គឺគេធ្វើឡើងក្នុងគោលដៅច្រើន គឺទី១ ហេតុផលនយោបាយ ដើម្បីជះឥទ្ធិពលទៅលើសាធារណៈមតិ ទី២ ដើម្បីប្រឆាំងជាមួយដៃគូបដិបក្ខ ឧទាហរណ៍ ក្រុមបក្សប្រឆាំងនៅក្រៅប្រទេស ពួកគេព្យាយាមបង្កើតព័ត៌មាន និងរូបភាពក្លែងក្លាយច្រើនណាស់ ត្រូវបានបង្កើតឡើងក្នុងគោលដៅដើម្បីប្រឆាំងជាមួយរាជរដ្ឋាភិបាល ញុះញង់ប្រជាពលរដ្ឋ បំភ្លៃការពិត ដើម្បីទម្លាក់ជំនឿទុកចិត្តរបស់ប្រជាពលរដ្ឋចំពោះការដឹកនាំរបស់រាជរដ្ឋាភិបាល ។

ជាក់ស្តែងក្នុងរយៈពេល ៩ខែ ឆ្នាំ២០២៥ ដំណឹងក្លែងក្លាយ ព័ត៌មានមិនពិត ការញុះញង់បំពុលសង្គម ការប្រមាថ និងព័ត៌មានមិនពិតទាក់ទងនឹងជម្លោះព្រំដែន សរុបចំនួន ២ ៨១០ ករណី ក្នុងនោះការបំភ្លៃខុសពីការពិត ការប្រឌិតព័ត៌មានទាក់ទងនឹងរាជរដ្ឋាភិបាល និងបញ្ហាព្រំដែនសរុប ២ ១២២ ករណី។ អញ្ចឹងស្ទើរតែ ៧០% ទៅ ៨០% ទៅហើយ នៃព័ត៌មានក្លែងក្លាយដែលបានបង្កើតឡើងក្នុងទិសដៅបង្កបញ្ហា និងហេតុផលនយោបាយ ហើយព័ត៌មានក្លែងក្លាយខ្លះទៀតធ្វើឡើងដើម្បីហេតុផល សេដ្ឋកិច្ច ពាណិជ្ជកម្មរបស់គេផងដែរ ។

ដើម្បីពង្រឹង និងទប់ស្កាត់បញ្ហាទាំងអស់នេះ គណៈកម្មការប្រឆាំងនឹងព័ត៌មានក្លែងក្លាយដឹកនាំដោយក្រសួងព័ត៌មាន ដាក់វិធានការនានាច្រើនតាមរយៈការអនុវត្តអភិក្រម «ពន្លត់ភ្លើង មិនអង្គុយបកផ្សែង» ដោយ ១-ការពង្រឹងការអនុវត្តច្បាប់ស្តីពីរបបសារព័ត៌មានដែលមាន (និងកំពុងធ្វើបច្ចុប្បន្នភាព) ២-ការពង្រឹងក្រមសីលធម៌វិជ្ជាជីវៈអ្នកសារព័ត៌មានដោយដាក់ឱ្យគោរពនិងអនុវត្តធម្មនុញ្ញវិជ្ជាជីវៈសារព័ត៌មាន ៣-បណ្តុះបណ្តាលពង្រឹងសមត្ថភាពអ្នកសារព័ត៌មាន និងអ្នកមានឥទ្ធិពលនៅលើបណ្តាញសង្គម ៤-ការផ្តល់នូវចំណេះដឹងអក្ខរក្រមប្រព័ន្ធផ្សព្វផ្សាយនិងព័ត៌មាន ៥-ការពង្រឹងនិងពង្រីកការផ្សព្វផ្សាយខ្លឹមសារត្រឹមត្រូវ និងមានប្រយោជន៍សម្រាប់សង្គម ៦-ការធ្វើយុទ្ធនាការប្រឆាំងនឹងព័ត៌មានក្លែងក្លាយនៅទូទាំងប្រទេស និងការកសាងយន្តការពីថ្នាក់ជាតិដល់ថ្នាក់ក្រោមជាតិដើម្បីប្រឆាំងព័ត៌មានក្លែងក្លាយ ៧-បានចលនាបណ្តាប្រទេសផ្សេងៗក្នុងតំបន់ក្នុងការរៀបចំយន្តការថ្នាក់តំបន់ ដើម្បីប្រឆាំងព័ត៌មានក្លែងក្លាយក្រោមការជំរុញការងារ«ការទូតព័ត៌មាន» ៨-បង្កើនប្រសិទ្ធភាពនៃការផ្តល់ព័ត៌មានពីប្រភពផ្លូវការ និងយន្តការបញ្ចេញព័ត៌មាននិងការឆ្លើយតប ៩-ការសិក្សាស្រាវជ្រាវដើម្បីឈានទៅរៀបចំច្បាប់ស្តីពីការប្រឆាំងព័ត៌មានក្លែងក្លាយ និងការងារជាច្រើនទៀតដែលក្រសួងព័ត៌មានបានធ្វើ និងកំពុងធ្វើ ដើម្បីពន្លត់ភ្លើង៕