លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញសួរសុខទុក្ខបុគ្គលិក និងអ្នកជំងឺនៅមន្ទីរពេទ្យគន្ធបុប្ផា ព្រមទាំងទទួលថវិកាបរិច្ចាគ ១លានដុល្លារពីក្រុមហ៊ុន ជីប ម៉ុង

នាព្រឹកថ្ងៃទី១៣ ខែមិថុនា ឆ្នាំ២០២៦ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជា បានអញ្ជើញចុះសំណេះសំណាលផ្ទាល់ជាមួយគណៈគ្រប់គ្រង លោកគ្រូពេទ្យ អ្នកគ្រូពេទ្យ និងបុគ្គលិកនៃមន្ទីរពេទ្យគន្ធបុប្ផា ក្នុងស្មារតីលើកទឹកចិត្ត និងពង្រឹងកិច្ចសហប្រតិបត្តិការមនុស្សធម៌។

ក្នុងឱកាសដ៏មានអត្ថន័យនេះ លោកជំទាវបណ្ឌិត ក៏បានជួបសំណេះសំណាលជាមួយគណៈប្រតិភូមូលនិធិគន្ធបុប្ផាស្វីស និងបានចុះសួរសុខទុក្ខអាណាព្យាបាល ក៏ដូចជាកុមារដែលកំពុងសម្រាកព្យាបាលក្នុងមន្ទីរពេទ្យដោយក្តីស្និទ្ធស្នាលបំផុត។

មានប្រសាសន៍ទៅកាន់អង្គពិធីទាំងមូល លោកជំទាវបណ្ឌិត ពេជ ចន្ទមុន្នី បានពាំនាំនូវការផ្តាំផ្ញើសួរសុខទុក្ខ និងក្តីនឹករឭកយ៉ាងជ្រាលជ្រៅពីសំណាក់ សម្តេចអគ្គមហាសេនាបតីតេជោ ហ៊ុន សែន, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

លោកជំទាវបណ្ឌិត បានគូសបញ្ជាក់ថា៖ «មន្ទីរពេទ្យគន្ធបុប្ផាមិនមែនត្រឹមតែជាមន្ទីរពេទ្យធម្មតានោះទេ ប៉ុន្តែគឺជាទីកន្លែងផ្តល់ក្តីសង្ឃឹម និងជីវិតថ្មីសម្រាប់គ្រួសារខ្មែរគ្រប់រូប ជាពិសេសគ្រួសារដែលមានជីវភាពខ្វះខាត។ ទីនេះផ្តល់នូវសេវាព្យាបាលប្រកបដោយគុណភាព ភាពកក់ក្តៅ និងសមធម៌ ដោយគ្មានការរើសអើង ដើម្បីសង្គ្រោះជីវិតកុមារកម្ពុជា»។

ទន្ទឹមនឹងការចុះសួរសុខទុក្ខ លោកជំទាវបណ្ឌិត ក៏បានអញ្ជើញជាអធិបតីក្នុងពិធីប្រគល់-ទទួលថវិកាបរិច្ចាគចំនួន ១,០០០,០០០ (មួយលាន) ដុល្លារសហរដ្ឋអាមេរិក ពីក្រុមហ៊ុន ជីប ម៉ុង (Chip Mong Group) ជូនដល់មូលនិធិគន្ធបុប្ផាកម្ពុជា។ ថវិកានេះនឹងត្រូវប្រើប្រាស់ដើម្បីគាំទ្រដល់បេសកកម្មមនុស្សធម៌ក្នុងការពិនិត្យ និងព្យាបាលកុមារឱ្យមាននិរន្តរភាព។

លោកជំទាវបណ្ឌិត បានថ្លែងអំណរគុណយ៉ាងជ្រាលជ្រៅចំពោះសប្បុរសជនទាំងអស់ដែលតែងតែផ្តល់ការគាំទ្រទាំងថវិកា និងស្មារតី។ លោកជំទាវក៏បានអំពាវនាវដល់សាធារណជន ឱ្យបន្តចូលរួមបរិច្ចាគបន្ថែមទៀត ដើម្បីរួមគ្នាកសាងអនាគតដ៏ភ្លឺស្វាងសម្រាប់កុមារកម្ពុជា ដែលជាធនធានមនុស្សដ៏សំខាន់បំផុតរបស់ប្រទេសជាតិ៕ អត្ថបទ និងរូបថត ៖ក្រសួងព័ត៌មាន