ផ្លូវក្រាលដីល្បាយក្រួស១ខ្សែប្រវែងជិត៦គីឡូម៉ែត្រស្ថិតក្នុងឃុំក្រាំស្គារ ស្រុកទឹកផុស ត្រូវបានបើកការដ្ឋានជួសជុល និងស្តារឡើងវិញ

កំពង់ឆ្នាំង ៖ផ្លូវក្រាលដីល្បាយក្រួស១ខ្សែ ប្រវែងជិត៦គីឡូម៉ែត្រ ស្ថិតក្នុងឃុំក្រាំស្គារ ស្រុកទឹកផុស ខេត្តកំពង់ឆ្នាំង ត្រូវបានបើកការដ្ឋានជួសជុល និងស្តារឡើងវិញ នាព្រឹកថ្ងៃទី១២ ខែមិថុនា ឆ្នាំង២០២៦ ក្រោមអធិបតីភាព ឯកឧត្តម ជ្រុន ថេរ៉ាវ៉ាត រដ្ឋលេខាក្រសួងអភិវឌ្ឍន៍ជនបទ និងឯកឧត្តម ស៊ុន សុវណ្ណារិទ្ធិ អភិបាល ខេត្តកំពង់ឆ្នាំង ។

ផ្លូវ១ខ្សែដែលក្រសួងអភិវឌ្ឍន៍ជនបទ បើកការដ្ឋានស្ថាបនាឡើងវិញនេះ មានប្រវែង៥,៧៥គីឡូម៉ែត្រ ទទឹង៨ម៉ែត្រ និងស្ពានបេតុង១កន្លែងប្រវែង១៨ម៉ែត្រ ។ក្រោយពីស្ថាបនារួចផ្លូវនេះជាសរសៃឈាមដ៏សំខាន់ ក្នុងការជួយសម្រួលការធ្វើដំណើរ និងដឹកជញ្ជូនកសិផលទៅកាន់ទីផ្សាររបស់ប្រជាពលរដ្ឋ ។

ឯកឧត្តម ជ្រុន ថេរ៉ាវ៉ាត បានមានប្រសាសន៍ថា ការបើកការដ្ឋានសាងសង់ផ្លូវ និងស្ពាននៅថ្ងៃនេះ គឺជាការឆ្លើយតបដោយផ្ទាល់ចំពោះតម្រូវការជាក់ស្តែង របស់ប្រជាពលរដ្ឋ និងជាការបង្ហាញពីការយកចិត្តទុកដាក់ របស់រាជរដ្ឋាភិបាល ដែលតែងតែគិតគូរពីសុខទុក្ខ និងផលប្រយោជន៍ របស់ប្រជាពលរដ្ឋជាអាទិភាព ។

ឯកឧត្តមបន្តថា រាជរដ្ឋាភិបាលមិនផ្តោតតែការអភិវឌ្ឍន៍ នៅទីក្រុងប៉ុណ្ណោះទេ ប៉ុន្តែបានបន្តពង្រីកការវិនិយោគលើហេដ្ឋារចនាសម្ព័ន្ធ នៅតាមជនបទ ដើម្បីឲ្យប្រជាពលរដ្ឋគ្រប់ទីកន្លែង ទទួលបានសមិទ្ធផលជាច្រើន ដែលជាក្តីសង្ឃឹម ក្នុងការកសាងជីវភាពប្រចាំថ្ងៃ ៕អត្ថបទ៖ ហឹង ចូច