ជំនួបរវាងរដ្ឋមន្ត្រី នេត្រ ភក្ត្រា និងទូតថ្មីសិង្ហបុរី ផ្តោតសំខាន់លើកិច្ចសហប្រតិបត្តិការវិស័យព័ត៌មាន ការប្រយុទ្ធប្រឆាំងព័ត៌មានក្លែងក្លាយ

ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន នៅរសៀលថ្ងៃទី១១ ខែមិថុនា ឆ្នាំ២០២៦ បានអនុញ្ញាតឱ្យឯកឧត្តម ផាង ឈីវី ឯកអគ្គរដ្ឋទូតថ្មីរបស់សិង្ហបុរីប្រចាំនៅកម្ពុជា ចូលជួបសម្តែងការគួរសម និងពិភាក្សាការងារ។

តាមរយៈជំនួបនេះ ឯកឧត្តម រដ្ឋមន្ត្រី នេត្រ ភក្ត្រា និងឯកអគ្គរដ្ឋទូតថ្មីរបស់សិង្ហបុរីប្រចាំកម្ពុជា បានផ្លាស់ប្តូរបទពិសោធន៍គ្នាទៅវិញ ទៅមក ជាពិសេសគឺផ្តោតសំខាន់លើកិច្ចសហប្រតិបត្តិការលើវិស័យព័ត៌មាន និងសោតទស្សន៍ ការចែករំលែកបទពិសោធន៍ និងការងារប្រយុទ្ធប្រឆាំងព័ត៌មានក្លែងក្លាយ ព្រមទាំងអក្ខរកម្មផ្នែកព័ត៌មាន និងប្រព័ន្ធផ្សព្វផ្សាយ រវាងមន្ត្រីជំនាញនៃប្រទេសពីរ។

ជាមួយគ្នានេះដែរ ឯកឧត្តម រដ្ឋមន្ត្រី នេត្រ ភក្ត្រា បានរម្លឹកថា ថ្មីៗនេះមន្ត្រីជំនាញរបស់ប្រទេសសិង្ហបុរី បានធ្វើបទបង្ហាញដល់មន្ត្រីនៃក្រសួងព័ត៌មានកម្ពុជា អំពីច្បាប់ស្តីពីការប្រឆាំងព័ត៌មានក្លែង។ ដូច្នេះ ឯកឧត្តមរដ្ឋមន្ត្រីក្រសួងព័ត៌មាន ក៏បានស្នើសុំឱ្យសិង្ហបុរី បន្តលើកកម្ពស់សកម្មភាពកិច្ចសហប្រតិបត្តិការនេះបន្ថែមទៀត ដើម្បីធ្វើយ៉ាងណារួមគ្នាប្រយុទ្ធប្រឆាំងនឹងព័ត៌មានក្លែងក្លាយ។

ឯកឧត្តម រដ្ឋមន្ត្រី នេត្រ ភក្ត្រា ក៏បញ្ជាក់ពីតួនាទីដ៏ចម្បងរបស់ក្រសួងព័ត៌មាន គឺដើរតួជាសេនាធិការឱ្យរាជរដ្ឋាភិបាលក្នុងការគ្រប់គ្រង ដឹកនាំ និងអភិវឌ្ឍវិស័យព័ត៌មាន និងសោតទស្សន៍។ ក្រសួងមានភារកិច្ចធានាការផ្សាយព័ត៌មានពិតប្រាកដ មានតម្លាភាព លើកកម្ពស់សេរីភាពសារព័ត៌មាន ព្រមទាំងការពារសន្តិសុខព័ត៌មាន និងស្ថិរភាពសង្គមដោយទប់ស្កាត់ព័ត៌មានក្លែងក្លាយ។

នៅក្នុងឱកាសនោះ ឯកអគ្គរដ្ឋទូត ផាង ឈីវី បានសម្ដែងនូវការអរគុណចំពោះ ឯកឧត្តម រដ្ឋមន្ត្រី នេត្រ ភក្ត្រា ដែលបានអនុញ្ញាតឱ្យលោក រួមជាមួយសហការី ចូលជួបសម្តែងការគួរសម និងពិភាក្សាការងារ។

លោក ផាង ឈីវី ក៏បានលើកឡើងថា នៅក្នុងអាណត្តិការងាររបស់លោក លោកនឹងខិតខំប្រឹងប្រែងក្នុងការពួនជ្រុំទំនាក់ទំនងរវាងកម្ពុជា និងសិង្ហបុរី ឱ្យកាន់តែរីកចម្រើនបន្ថែមទៀត។ ជាពិសេសពង្រឹងលើកិច្ចសហប្រតិបត្តិការលើវិស័យព័ត៌មាន និងសោតទស្សន៍ ការចែករំលែកព័ត៌មាន ដើម្បីផលប្រយោជន៍ទៅវិញទៅមកសម្រាប់ជាតិ និងប្រជាជននៃប្រទេសទាំងពីរ។

នាឱកាសនោះដែរ ឯកឧត្តម រដ្ឋមន្ត្រី នេត្រ ភក្ត្រា ក៏បានជម្រាបជូន ឯកអគ្គរដ្ឋទូតថ្មី របស់សិង្ហបុរីថា នៅឆ្នាំ២០២៦នេះ ក្រសួងព័ត៌មានកម្ពុជា បានបើកយុទ្ធនាការប្រយុទ្ធប្រឆាំងព័ត៌មានក្លែងក្លាយ ដំណាក់កាលទី២ ដោយផ្ដោតទៅលើប្រធានបទសំខាន់ គឺនិយាយថាទេចំពោះព័ត៌មានក្លែងក្លាយ ក្នុងគោលដៅដើម្បីពង្រឹងនូវអក្ខរកម្មព័ត៌មាន និងប្រព័ន្ធផ្សព្វផ្សាយ ដើម្បីសុវត្ថិភាពព័ត៌មាន ជាពិសេសគោលដៅនៅឆ្នាំ២០២៦នេះ គឺទៅលើយុវវ័យ។

ឯកឧត្តម រដ្ឋមន្ត្រី នេត្រ ភក្ត្រា បានសង្កត់ធ្ងន់ពីភាពចាំបាច់ក្នុងការពង្រឹងអក្ខរកម្មផ្នែកព័ត៌មាន និងប្រព័ន្ធផ្សព្វផ្សាយទៅដល់យុវវ័យ ដើម្បីឱ្យពួកគេប្រើប្រាស់ទូរស័ព្ទ និងបច្ចេកវិទ្យាព័ត៌មាន ឱ្យបានត្រឹមត្រូវ និងជាប្រយោជន៍សម្រាប់ខ្លួនឯង និងសង្គមជាតិ៕