លោកស្រី កែវសេង សុចិន្តា ត្រូវបានប្រគល់ភារកិច្ចជាប្រធានការិយាល័យវិទ្យុស្តីទី នៃមន្ទីរព័ត៌មានខេត្តកំពង់ឆ្នាំង

កំពង់ឆ្នាំង ៖នារសៀលថ្ងៃទី១០ ខែមិថុនា ឆ្នាំ២០២៦ មន្ទីរព័ត៌មានខេត្តកំពង់ឆ្នាំង បានរៀបចំពិធីប្រគល់ភារកិច្ចជូនលោកស្រី កែវសេង សុចិន្តា ឱ្យបំពេញតួនាទីជាប្រធានការិយាល័យវិទ្យុស្តីទី ជំនួសលោក អ៊ុន កុសល ដែលបានចូលនិវត្តន៍ ដើម្បីបន្តដឹកនាំ និងសម្របសម្រួលការងារវិទ្យុឱ្យប្រព្រឹត្តទៅដោយប្រសិទ្ធភាព និងស្របតាមគោលនយោបាយរបស់ក្រសួងព័ត៌មាន។

លោក ឈាង វណ្ណះ ប្រធានមន្ទីរព័ត៌មានខេត្តកំពង់ឆ្នាំង បានសម្តែងការជឿជាក់ថា លោកស្រី កែវសេង សុចិន្តា នឹងខិតខំបំពេញភារកិច្ចដោយការទទួលខុសត្រូវខ្ពស់ សាមគ្គីភាព និងវិជ្ជាជីវៈ ដើម្បីលើកកម្ពស់គុណភាពនៃការផ្សព្វផ្សាយព័ត៌មាន ជាពិសេសការផ្តល់ព័ត៌មានដែលមានភាពត្រឹមត្រូវ ទាន់ពេលវេលា និងឆ្លើយតបទៅនឹងតម្រូវការរបស់ប្រជាពលរដ្ឋ។

ជាមួយគ្នានេះ លោកស្រី កែវសេង សុចិន្តា ក៏បានថ្លែងអំណរគុណចំពោះការជឿទុកចិត្តពីថ្នាក់ដឹកនាំ និងបានប្តេជ្ញាចិត្តខិតខំបំពេញតួនាទីថ្មីឱ្យបានល្អប្រសើរ ដោយសហការជាមួយមន្ត្រីគ្រប់រូបក្នុងអង្គភាព ដើម្បីរួមចំណែកអភិវឌ្ឍវិស័យព័ត៌មាន និងការផ្សព្វផ្សាយនៅក្នុងខេត្តកំពង់ឆ្នាំងឱ្យកាន់តែមានប្រសិទ្ធភាព។

ពិធីប្រគល់ភារកិច្ចនេះ បានប្រព្រឹត្តទៅក្នុងបរិយាកាសស្និទ្ធស្នាល និងប្រកបដោយស្មារតីទទួលខុសត្រូវខ្ពស់ ក្នុងការបន្តបេសកកម្មបម្រើវិស័យព័ត៌មាន និងផលប្រយោជន៍សាធារណៈ៕អត្ថបទ៖លោកស្រី កែវសេង សុចិន្តា /រូបថត ៖សាត មករា