លោក ឈាង វណ្ណៈ ជំរុញឱ្យមន្ត្រីព័ត៌មានពង្រឹងសមត្ថភាពឌីជីថល ដើម្បីដើរឱ្យទាន់ការវិវត្តនៃប្រព័ន្ធផ្សព្វផ្សាយទំនើប

កំពង់ឆ្នាំង ៖លោក ឈាង វណ្ណះ ប្រធានមន្ទីរព័ត៌មាន ខេត្តកំពង់ឆ្នាំង បានជំរុញឲ្យមន្ត្រីព័ត៌មានពង្រឹងសមត្ថភាពឌីជីថល ដើម្បីដើរឲ្យទាន់ការវិវត្ត នៃប្រព័ន្ធផ្សព្វផ្សាយទំនើប ។

នេះជាសារដាស់តឿន និងក្រើនរំលឹកយ៉ាងម៉ត់ចត់របស់ លោក ឈាង វណ្ណៈ ទៅកាន់មន្ត្រីរាជការទាំងអស់ នៃមន្ទីរព័ត៌មានខេត្តកំពង់ឆ្នាំង ក្នុងកិច្ចប្រជុំបូកសរុបវឌ្ឍនភាពការងារ ឆមាសទី១ នារសៀលថ្ងៃទី១០ ខែមិថុនា ឆ្នាំ២០២៦ នេះ។

នៅក្នុងកិច្ចប្រជុំនោះ លោកប្រធានមន្ទីរបានថ្លែងការកោតសរសើរចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីរាជការទាំងអស់ ដែលបានរួមគ្នាសម្រេចបានសមិទ្ធផលល្អៗជាច្រើនក្នុងឆមាសទី១ កន្លងទៅនេះ។

ទន្ទឹមនឹងនេះ ដើម្បីឆ្លើយតបទៅនឹងការវិវត្តនៃប្រព័ន្ធផ្សព្វផ្សាយទំនើប លោកប្រធានមន្ទីរបានដាក់ចេញនូវផែនការ និងក្រើនរំលឹកដល់មន្ត្រីរាជការទាំងអស់ ត្រូវបង្កើនការយកចិត្តទុកដាក់លើចំណុចសំខាន់ៗ ដូចជាការពង្រឹងជំនាញបច្ចេកវិទ្យា ការអភិវឌ្ឍសមត្ថភាពបន្ថែមលើការងារឌីជីថល ទាំងការផលិតវីដេអូខ្លី និងការគ្រប់គ្រងបណ្តាញផ្សព្វផ្សាយរបស់អង្គភាពឱ្យកាន់តែមានប្រសិទ្ធភាព។ ជាពិសេសត្រូវរួមគ្នាប្រយុទ្ធប្រឆាំងព័ត៌មានក្លែងក្លាយ ដោយត្រូវដើរតួនាទីជាស្នូលក្នុងការផ្តល់ព័ត៌មានពិត ដើម្បីជួយការពារសាធារណជន មិនឱ្យរងគ្រោះដោយសារព័ត៌មានមិនពិតនៅលើបណ្តាញសង្គម រួមគ្នាលើកកម្ពស់វិស័យព័ត៌មាននៅក្នុងខេត្ត ឱ្យកាន់តែរីកចម្រើន និងទាន់សម័យកាលជានិច្ច៕អត្ថបទ៖កែវសេង សុចិន្តា/រូបថត៖ សាត មករា