ស៊ីម៉ាក់បិទវគ្គហ្វឹកហ្វឺនជំនាញបច្ចេកទេសប្រធានក្រុមសុនខហិតមីន-គ្រាប់

កំពង់ឆ្នាំង ៖វិទ្យាស្ថានបច្ចេកទេសសកម្មភាពកំចាត់មីនកម្ពុជា ដែលមានទីតាំងស្ថិតនៅក្នុងខេត្តកំពង់ឆ្នាំង បានធ្វើពិធីបិទវគ្គហ្វឹកហ្វឺនជំនាញបច្ចេកទេសប្រធានក្រុមសុនខហិតមីន-គ្រាប់ នាព្រឹកថ្ងៃទី៤ ខែមិថុនា ឆ្នាំ២០២៦ ក្រោមអធិបតីភាព ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយមីម៉ាក់ (CMAC) ។

លោកឧត្តមសេនីយ៍ត្រី ធៀម សុភាព នាយកមណ្ឌលសុនខ បានឲ្យដឹងថា វគ្គហ្វឹកហ្វឺននេះបានចាប់ផ្តើមដំណើរការកាលពីថ្ងៃទី១៨ ខែឧសភា ឆ្នាំ២០២៦ មានសិក្ខាកាមសរុបចំនួន១២នាក់ ដែលត្រូវបានជ្រើសរើសពីបណ្តាអង្គភាពចំណុះ និងទីបញ្ជាការកណ្តាល ។បន្ថែមពីនេះវគ្គហ្វឹកហ្វឺនក៏មានការចូលរួមពីសិក្ខាកាមអន្តរជាតិ ដែលមកពីបណ្តាប្រទេសមួយចំនួនរួមមាន ប្រទេសស៊ូដង់ខាងត្បូង ប៊ូស្នៀ អ៊ុយក្រែន និងប្រទេសអេត្យូពី ។

លោកធៀម សុភាព បញ្ជាក់ថា វគ្គហ្វឹកហ្វឺនជំនាញបច្ចេកទេសប្រធានក្រុមសុនខហិតមីននេះ ដំណើរការទៅក្រោមគម្រោងកិច្ចសហប្រតិបត្តិការ ក្នុងភាពជាដៃគូរវាងអង្គភាពCMAC និងអង្គការ NPA ប្រចាំកម្ពុជា ។

ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយក CMAC បានមានប្រសាសន៍បញ្ជាក់ថា វគ្គហ្វឹកហ្វឺនដ៏មានសារ​សំខាន់នេះ ធ្វើឡើងក្នុងគោលបំណងបង្កើនសមត្ថភាពបច្ចេកទេស យុទ្ធវិធី និងការគ្រប់គ្រងដឹកនាំក្រុមសុនខ ដើម្បីធានាបាននូវប្រសិទ្ធ​ភាពខ្ពស់ និងសុវត្ថិភាព ក្នុងការអនុវត្តប្រតិបត្តិការបោសសម្អាតមីន និងគ្រាប់មិនទាន់ផ្ទុះនៅតាមបណ្តោយព្រំដែន ដែលរង​ផលប៉ះពាល់ដោយសារសំណល់យុទ្ធភណ្ឌនៃសង្គ្រាមឈ្លានពានរបស់​ថៃ​ សំដៅរួមចំណែកកាត់បន្ថយគ្រោះថ្នាក់ដោយសារយុទ្ធភណ្ឌមិនទាន់ផ្ទុះ ព្រមទាំងផ្តល់ដីសុវត្ថិភាពជូនដល់ប្រជាពលរដ្ឋដើម្បីបង្កបង្កើនផល និងអភិវឌ្ឍសហគមន៍ ។

ឯកឧត្តម ហេង រតនា បានថ្លែងអំណរគុណចំពោះអង្គការNPA ប្រចាំកម្ពុជា ដែលជានិច្ចកាលតែងតែផ្តល់កិច្ចសហប្រតិបត្តិការ និងគាំទ្រយ៉ាងសកម្មដល់សកម្មភាពមីននៅកម្ពុជា និងបានកោតសរសើរ​ និងវាយតម្លៃខ្ពស់ចំពោះការខិតខំប្រឹងប្រែងរបស់ក្រុមគ្រូ​បច្ចេកទេស​និងសិក្ខាកាមទាំងអស់ ជាពិសេសសិក្ខាកាមជានារី ដែលបានខិតខំសិក្សារៀនសូត្រទាំងទ្រឹស្តី និងការអនុវត្តផ្ទាល់រហូតទទួលបានលទ្ធផលយ៉ាងត្រចះត្រចង់នាពេលនេះ៕