ក្រសួងព័ត៌មាន បិទវគ្គបណ្តុះបណ្តាលជំនាញបច្ចេកទេសសារព័ត៌មានដល់សិក្ខាកាមជាង១០០នាក់

វគ្គបណ្តុះបណ្តាលស្តីពី «ជំនាញបច្ចេកទេសសារព័ត៌មាន» ត្រូវបានធ្វើពិធីបិទនារសៀលថ្ងៃទី២៩ ខែឧសភា ឆ្នាំ២០២៦ បន្ទាប់ពីបានដំណើរការរយៈពេល៥ថ្ងៃ ។

ពិធីបិទវគ្គនេះ បានប្រព្រឹត្តទៅក្រោមអធិបតីភាពរបស់ ឯកឧត្តម ជុំ កុសល រដ្ឋលេខាធិការក្រសួងព័ត៌មាន ដោយមានការអញ្ជើញចូលរួមពីសំណាក់ថ្នាក់ដឹកនាំ មន្ត្រីរាជការ និងសិក្ខាកាមមកពីមន្ទីរព័ត៌មានរាជធានីខេត្ត និងអ្នកសារព័ត៌មានជាង១០០នាក់។

នៅក្នុងឱកាសនោះ ឯកឧត្តម ជុំ កុសល បានមានប្រសាសន៍ផ្ដាំផ្ញើ និងដាស់តឿនដល់សិក្ខាកាមទាំងអស់ ឱ្យយកចិត្តទុកដាក់ខ្ពស់ទៅលើ «ក្រមសីលធម៌វិជ្ជាជីវៈ»ក្នុងការបំពេញការងារ។

ឯកឧត្តមបានសង្កត់ធ្ងន់ថា ក្រមសីលធម៌គឺជាបេះដូង និងជាអាវក្រោះការពារតម្លៃពិតប្រាកដរបស់អ្នកសារព័ត៌មាន ក្នុងយុគសម័យឌីជីថល ដើម្បីធានាបាននូវការផ្សព្វផ្សាយព័ត៌មានពិត ត្រឹមត្រូវ និងរួមគ្នាប្រយុទ្ធប្រឆាំងព័ត៌មានក្លែងក្លាយ បម្រើដល់ផលប្រយោជន៍សង្គមជាតិ។

ឯកឧត្តមរដ្ឋលេខាធិការ ក៏បានថ្លែងអំណរគុណដល់គ្រូឧទ្ទេស និងអ្នកពាក់ព័ន្ធទាំងអស់ ព្រមទាំងបានចូលរួមអបអរសាទរ និងជូនពរដល់សិក្ខាកាមទាំងអស់ ឱ្យទទួលបានជោគជ័យក្នុងការយកចំណេះដឹង និងបច្ចេកទេសទាំងនេះ ទៅអនុវត្តក្នុងវិជ្ជាជីវៈរៀងៗខ្លួនឱ្យកាន់តែរីកចម្រើន ៕អត្ថបទ ៖ កែវ សេងសុចិន្តា