ឯកឧត្តម នេត្រ ភក្ត្រា៖ មិនមែនត្រឹមតែជាអ្នកសរសេរព័ត៌មាន តែត្រូវជា «អ្នកយុទ្ធសាស្ត្រគ្រប់គ្រងសតិអារម្មណ៍ដើម្បីបង្កើនភាពធន់ នៃសមត្ថភាពប្រកួតប្រជែងកម្រិតសកលក្នុងសម័យឌីជីថល

ឯកឧត្តមរដ្ឋមន្ត្រីក្រសួងព័ត៌មាន មានប្រសាសន៍បែបនេះក្នុងវគ្គបណ្តុះបណ្តាលស្តីពី «ជំនាញបច្ចេកទេសសារព័ត៌មាន» ដែលបានបើកជាផ្លូវការនៅព្រឹកថ្ងៃទី២៥ ខែឧសភា ឆ្នាំ២០២៦ នៅសាលមណ្ឌលបណ្តុះបណ្តាល និងវិក្រឹតការវិជ្ជាជីវ:សារព័ត៌មាន នៃក្រសួងព័ត៌មាន។

មានប្រសាសន៍ទៅកាន់សិក្ខាកាមទាំង ១០៩នាក់ ឯកឧត្តមរដ្ឋមន្ត្រី នេត្រ ភក្ត្រា បានដាក់ចេញនូវយុទ្ធសាស្ត្រពង្រឹងសមត្ថភាពស្នូលយ៉ាងមុតស្រួចថា៖ «អ្នកសារព័ត៌មានត្រូវចេះស្តាប់ខ្លឹមសារនៃពិធីនានា ដើម្បីចាប់មុំសរសេរ (Angle) ឱ្យចំចំណុច។ នេះមិនមែនត្រឹមតែជាការសរសេរព័ត៌មានធម្មតានោះទេ តែវាជាយុទ្ធសាស្ត្រព័ត៌មាន ដើម្បីគ្រប់គ្រងសតិអារម្មណ៍សាធារណជន រក្សាបានស្ថេរភាពសង្គមជាតិ។»

ក្នុងរយៈពេល ៥ថ្ងៃនេះ សិក្ខាកាមនឹងត្រូវសម្រួចសមត្ថភាពលើការផលិតមាតិកាអនឡាញ វីដេអូ និងការសរសេរព័ត៌មានបែបស៊ីជម្រៅ ដើម្បីក្លាយជាធនធានព័ត៌មានដ៏មានឥទ្ធិពល និងប្រកបដោយក្រមសីលធម៌ខ្ពស់ ជួយសង្គមឲ្យបានប្រសើរទ្បើង ជាពិសេសអាចប្រកួតប្រជែងជាសកលបាន។ ដូច្នេះការពង្រឹងមូលធនមនុស្ស ត្រូវតែធ្វើជាបន្តបន្ទាប់តាមរយៈវគ្គបណ្តុះបណ្តាលនេះ។អត្ថបទ ៖សុចិន្តា /រូបភាព៖ រតនា,ដេវីត