ប្រធានមន្ទីរព័ត៌មានខេត្តកំពង់ឆ្នាំង និងបាត់ដំបង ជួបពិភាក្សាគ្នាដើម្បីពង្រឹងប្រសិទ្ធភាពការងារ

កំពង់ឆ្នាំង ៖ប្រធានមន្ទីរព័ត៌មានខេត្តកំពង់ឆ្នាំង និងប្រធានមន្ទីរព័ត៌មានខេត្តបាត់ដំបង បានជួបពិភាក្សាការងារដើម្បីផ្លាស់ប្តូរបទពិសោធន៍ពីគ្នាទៅវិញទៅមក លើការងារគ្រប់គ្រងវិស័យព័ត៌មាន និងសោតទស្សន៍ ក្នុងដែនសមត្ថកិច្ចរបស់ខ្លួន ។ជំនួបពិភាក្សានេះធ្វើឡើងនៅមន្ទីរព័ត៌មានខេត្តកំពង់ឆ្នាំង នារសៀលថ្ងៃទី១៩ ខែឧសភា ឆ្នាំ២០២៦ ។

ក្នុងជំនួបនោះ ប្រធានមន្ទីរព័ត៌មានទាំងពីរ បានលើកឡើងពីវឌ្ឍនភាព និងវិធីសាស្ត្រល្អៗក្នុងការគ្រប់គ្រងការផ្សាយ ទាំងប្រព័ន្ធផ្សព្វផ្សាយបែបប្រពៃណី និងឌីជីថល ដើម្បីធានាបាននូវសន្តិសុខព័ត៌មាន និងការផ្តល់ព័ត៌មានពិត លឿន រហ័ស ជូនដល់ប្រជាពលរដ្ឋ។

ទន្ទឹមនឹងនេះ ប្រធានមន្ទីរព័ត៌មានទាំងពីរ បានសង្កត់ធ្ងន់ថា កិច្ចសហប្រតិបត្តិការនេះ គឺដើម្បីរួមគ្នាសម្រេចឱ្យបាននូវគោលដៅសូចនករប្រកបដោយប្រសិទ្ធភាព ស្របតាមគោលនយោបាយ និងទិសដៅរបស់ក្រសួងព័ត៌មាន ក្រោមការដឹកនាំរបស់ ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មាន។

ជាទីបញ្ចប់ ប្រធានមន្ទីរព័ត៌មានទាំងពីរ បានប្តេជ្ញាចិត្តរួមគ្នា បន្តពង្រឹងកិច្ចសហការឱ្យកាន់តែជិតស្និទ្ធ ដើម្បីលើកកម្ពស់សមត្ថភាពវិជ្ជាជីវៈមន្ត្រីព័ត៌មាននៅថ្នាក់ក្រោមជាតិ ឱ្យកាន់តែរីកចម្រើនបន្ថែមទៀត៕អត្ថបទ៖ លោកស្រី កែវ សេងសុចិន្តា