នាយករដ្ឋមន្ត្រីកម្ពុជាសង្ឃឹមថា មេដឹកនាំថៃនឹងរៀបចំក្បាលម៉ាស៊ីនJBCជួបប្រជុំជាមួយកម្ពុជា

សម្ដេចមហាបវរធិបតី ហ៊ុន ម៉ាណែតនាយករដ្ឋមន្រ្តីកម្ពុជាសង្ឃឹមថា រដ្ឋាភិបាលថៃ នឹងបង្កើតក្បាលម៉ាស៊ីន JBC ឱ្យបានត្រឹមត្រូវដើម្បីជួបប្រជុំជាមួយភាគីកម្ពុជាក្នុងការដោះស្រាយជម្លោះព្រំដែន។
ក្នុងឱកាសអញ្ជើញជាអធិបតីក្នុងពិធីបើកការដ្ឋានសាងសង់គម្រោងគ្រប់គ្រងធនធានទឹកចម្រុះហ្វូណនតេជោកំណាត់ទី២ស្ថិតនៅខេត្តតាកែវ នាព្រឹកថ្ងៃទី ១១ ខែមេសា ឆ្នាំ២០២៦ សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានមានប្រសាសន៍បង្ហាញក្ដីសង្ឃឹមថា បញ្ហាព្រំដែនកម្ពុជា-ថៃ នឹងអាចដោះស្រាយបានឆាប់ចប់ ដើម្បីផ្តល់សេចក្តីសុខដល់ប្រជាពលរដ្ឋទាំងសងខាង។
សម្តេចធិបតី ហ៊ុន ម៉ាណែត មានប្រសាស ន៍ដោយបង្ហាញក្តីសង្ឃឹមថា បញ្ហាព្រំដែនរវាងកម្ពុជានិងថៃដែលបានអូសពេលវេលាប្រមាណជាជិត១ឆ្នាំមកនេះ នឹងមានដំណោះស្រាយក្នុងពេលឆាប់ៗខាងមុខជាមិនខាន។
សម្តេចធិបតីបន្តថា កម្ពុជានៅតែបន្តរក្សាជំហរដដែលក្នុងការដោះស្រាយតាមសន្តិវិធី ដោយផ្អែកលើសន្ធិសញ្ញា អនុសញ្ញា និងកិច្ចព្រមព្រៀងនានាមានស្រាប់ ដែលភាគីទាំងពីរបានឯកភាពចុះហត្ថលេខាជាមួយគ្នាកន្លងមក រួមទាំងយន្តការអន្តរជាតិផងដែរ។
សម្ដេចបញ្ជាក់បន្ថែមថា យន្តការទាំងនេះ រដ្ឋាភិបាលថៃ ក៏បានលើកឡើងដើម្បីដោះស្រាយបញ្ហាព្រំដែនជាមួយកម្ពុជាដែរ។ សម្តេចនាយករដ្ឋមន្រ្តីមានប្រសាសន៍បន្ថែមថា រដ្ឋាភិបាលថៃ ក៏មិនបានប្រកាស ទាត់ចោលកិច្ចព្រមព្រៀងណាមួយជាមួយកម្ពុជានៅឡើយនោះដែរ។
សម្ដេចធិបតី ហ៊ុន ម៉ាណែតនាយករដ្ឋមន្រ្តីកម្ពុជាបង្ហាញក្តីសង្ឃឹមបន្ថែមថា រដ្ឋាភិបាលថៃ នឹងបង្កើតក្បាលម៉ាស៊ីន JBC ឱ្យបានត្រឹមត្រូវដើម្បីជួបប្រជុំជាមួយភាគីកម្ពុជាក្នុងការដោះស្រាយជម្លោះព្រំដែនមួយស្របទៅតាមកិច្ចព្រមព្រៀងទ្វេភាគី៕ អត្ថបទ ក្រសួងព័ត៌មាន