សួនសុវត្ថិភាពចរាចរណ៍សិប្បនិម្មិតដំបូងគេនៅកម្ពុជា ស្ថិតក្នុងបរិវេណវិទ្យាល័យក្រុងកំពង់ឆ្នាំង សម្ពោធដាក់ឲ្យប្រើប្រាស់ជាផ្លូវការ

កំពង់ឆ្នាំង ៖ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្តិភាពចរាចរណ៍ផ្លូវគោក និងលោកជំទាវ កែ សួនសុភី ស សុខា នាព្រឹកថ្ងៃទី២៨ ខែមិនា ឆ្នាំ២០២៦ បានអញ្ជើញជាអធិបតី ទិវាអន្តរជាតិរំលឹកដល់ជនរងគ្រោះ ដោយសារគ្រោះថ្នាក់ចរាចរណ៍ផ្លូវគោកលើកទី២០ និងសម្ពោធដាក់ឲ្យប្រើប្រាស់ សួនសុវត្តិភាពចរាចរណ៍សិប្បនិម្មិតដំបូងគេ នៅកម្ពុជា ស្ថិតក្នុងបរិវេណវិទ្យាល័យ ក្រុងកំពង់ឆ្នាំង ខេត្តកំពង់ឆ្នាំង ។

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានឲ្យដឹងថា សួនសុវត្តិភាពចរាចរណ៍ផ្លូវគោកនេះ បានបើកការដ្ឋានសាងសង់កាលពីថ្ងៃទី១២ ខែមិនា និងបញ្ចប់ការសាងសង់ជាស្ថាពរ នៅថ្ងៃទី១១ ខែវិច្ឆិកា ឆ្នាំ២០២៥ លើផ្ទៃដីជាង២ពាន់ម៉ែត្រក្រឡា ស្ថិតក្នុងបរិវេណវិទ្យាល័យក្រុងកំពង់ឆ្នាំង ក្រោមការផ្តួចផ្តើមរបស់ ឯកឧត្តម អភិសន្តិបណ្ឌិត ស សុខា និងឯកឧត្តម ប៉េង ពោធិនា ដើម្បីពង្រឹងការអនុវត្តច្បាប់ចរាចរណ៍ផ្លូវគោក ។

ឯកឧត្តម ប៉េង ពោធិនា រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងថា សួនសុវត្តិភាពចរាចរណ៍សិប្បនិម្មិតនេះ គឺជាសួនដំបូងគេនៅក្នុងប្រទេសកម្ពុជា ដែលបានស្ថាបនាឡើង ដោយមានរៀបចំជាហេដ្ឋារចនាសម្ព័ន្ធ ផ្លូវ ស្ពាន បំពាក់ដោយស្លាកសញ្ញា ភ្លើងសញ្ញា គនូសសញ្ញាចរាចរណ៍ សម្រាប់ជាថ្នាលបណ្តុះបណ្តាលច្បាប់ស្តីពីចរាចរណ៍ផ្លូវគោក និងការអនុវត្តការប្រើប្រាស់ផ្លូវជាក់ស្តែង ដល់សិស្សានុសិស្ស យុវជន និងកុមារ សំដៅផ្តល់នូវចំណេះដឹង ពីសុវត្តិភាពចរាចរណ៍ ក្នុងការធ្វើដំណើរដោយថ្មើរជើង និងការបើកបរយានយន្តផ្សេងៗ ។

ឯកឧត្តម ឧបនាយករដ្ឋមន្ត្រី អភិសន្តិបណ្ឌិត ស សុខា បានអំពាវនាវដល់ប្រជាពលរដ្ឋ ក្រុមហ៊ុនដឹកជញ្ជូន និងអាណាព្យាបាលគ្រប់រូបត្រូវបន្តយកចិត្តទុកដាក់អប់រំសមាជិកគ្រួសារ និងបុគ្គលិកឲ្យមានការប្រុងប្រយ័ត្នខ្ពស់ក្នុងការបើកបរ ស្របពេលដែលអង្គភាពអនុវត្តច្បាប់ ត្រូវពង្រឹងសីលធម៌វិជ្ជាជីវៈមន្ត្រីឲ្យបានល្អប្រសើរ និងបន្តកិច្ចសហការជាមួយគ្រប់ស្ថាប័នដៃគូ ដើម្បីបង្កើនការផ្សព្វផ្សាយអប់រំ និងយកបទពិសោធន៍ នៃការកសាងសួនសុវត្តិភាពចរាចរណ៍ នៅខេត្តកំពង់ឆ្នាំង ធ្វើជាគំរូសម្រាប់រាជធានី ខេត្តផ្សេងទៀត ក្នុងគោលដៅរួមគ្នាកាត់បន្ថយគ្រោះថ្នាក់ និងផលប៉ះពាល់ដល់អាយុជីវិតបងប្អូនប្រជាពលរដ្ឋឲ្យបានជាអតិបរិមា ៕អត្ថបទ ហឹង ចូច /រូបថត សន គន្ធនិវឌ្ឍន៍