សួន​សុវត្ថិភាព​ចរាចរណ៍​ផ្លូវ​គោក​ នៅ​បរិវេណ​វិទ្យាល័យ​ក្រុង​កំពង់ឆ្នាំង​ ត្រៀម​ធ្វើ​ពិធី​សម្ពោធ​ នាពេល​ឆាប់ៗ​នេះ​

កំពង់ឆ្នាំង ៖នាព្រឹកថ្ងៃទី១៨ ខែមិនា ឆ្នាំ២០២៦ លោកជំទាវ មិន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋានគណកម្មាធិការសុវត្តិភាពចរាចរណ៍ផ្លូវគោក និងឯកឧត្តម ហ៊ឹម យ៉ាន រដ្ឋលេខាធិការក្រសួងមហាផ្ទៃ បានដឹកនាំកិច្ចប្រជុំត្រៀមរៀបចំពិធីសម្ពោធសួនសុវត្តិភាពចរាចរណ៍ និងទិវាអន្តរជាតិ រំលឹកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោកលើកទី២០ នៅវិទ្យាល័យក្រុងកំពង់ឆ្នាំង ។

អញ្ជើញចូលរួមក្នុងកិច្ចប្រជុំនេះដែរមាន ឯកឧត្តម អម សុភា អភិបាលរងខេត្តកំពង់ឆ្នាំង និងលោក លោកស្រី ជាប្រធាន អនុប្រធានមន្ទីរពាក់ព័ន្ធ ។

សូមវញ្ជាក់ថា សួនសុវត្តិភាពចរាចរណ៍ផ្លូវគោក ស្ថាបនាឡើង ដើម្បីអប់រំ និងបញ្ជ្រាបការយល់ដឹងដល់សិស្សានុសិស្ស និងប្រជាពលរដ្ឋទូទៅអំពីច្បាប់ស្តីពីចរាចរណ៍ផ្លូវគោក ការគោរពសិទ្ធិអាទិភាព នៃការបើកបរ កាត់បន្ថយគ្រោះថ្នាក់ចរាចរណ៍ នៅលើដងផ្លូវ ធានាសុវត្តិភាពសណ្តាប់ធ្នាប់សាធារណៈ និងការពារអាយុជីវិតប្រជាពលរដ្ឋ។

ការបង្កើតសួនសុវត្តិភាពចរាចរណ៍ នៅតាមសាលារៀន មានដាក់បញ្ចូលស្ថានីយ៍ប្រេងសប្បនិម្មិត ផ្លូវ គន្លងចរាចរណ៍ ភ្លើងសញ្ញាចរាចរណ៍ ស្លាកសញ្ញាចរាចរណ៍ ព្រមទាំងមានអ្វីផ្សេងៗទៀតដែលពាក់ព័ន្ធនឹងការធ្វើដំណើរ។

ការបង្កើតសួនសុវត្តិភាពចរាចរណ៍សប្បនិម្មិតនេះ មិនត្រឹមតែសម្រាប់សិស្សានុសិស្សប៉ុណ្ណោះទេ ប៉ុន្តែក៏សម្រាប់បង្ហាញដល់សាធារណជនទូទៅ ឲ្យចូលសិក្សាស្វែងយល់បន្ថែមលើអ្វីដែលបានរៀននៅសាលាបើកបរ ដើម្បីបង្កើនការយល់ដឹង អំពីច្បាប់ចរាចរណ៍ ការគោរពសិទ្ធិអាទិភាព បច្ចេកទេស និងក្រមសីលធម៌នៃការបើកបរផងដែរ ៕ អត្ថបទ ហឹង ចូច /រូបថត សន គន្ធនិវឌ្ឍន៍