ឯកឧត្តម នេត្រ ភក្ត្រា ជំរុញឲ្យរក្សាពូជ «ក្រូចថ្លុងកោះទ្រង់» ឲ្យបានល្អ ដើម្បីបង្កើនចំណូល និងលើកស្ទួយជីវភាពគ្រួសារ

ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ បានអំពាវនាវឲ្យបងប្អូនប្រជាពលរដ្ឋដែលដាំក្រូចថ្លុងក្នុងសង្កាត់កោះទ្រង់ ក្រុងក្រចេះ ខេត្តក្រចេះ រក្សាពូជ «ក្រូចថ្លុងកោះទ្រង់» ដែលត្រូវបានចុះបញ្ជីសម្គាល់ម៉ាកសម្គាល់ភូមិសាស្រ្ត (GI) ឲ្យបានល្អ និងពង្រីកការដាំដុះបន្ថែម ដើម្បីបង្កើនចំណូល និងលើកស្ទួយជីវភាពគ្រួសារ។

ការអំពាវនាវរបស់ឯកឧត្តមរដ្ឋមន្រ្តី ត្រូវបានធ្វើឡើងក្នុងឱកាសដែលឯកឧត្តមធ្វើជាអធិបតីក្នុងពិធីសម្ពោធដាក់ឲ្យប្រើប្រាស់ជាផ្លូវការអាគារស្នាក់ការគណបក្សប្រជាជនកម្ពុជា សង្កាត់កោះទ្រង់ ក្រុងក្រចេះ ខេត្តក្រចេះ កាលពីរសៀលថ្ងៃទី១៥ ខែមីនា ឆ្នាំ២០២៦។

ឯកឧត្តមថ្លែងថា៖«ក្រូចថ្លុងគឺជាផលិតផលមួយក្នុងចំណោមផលិតផលចំនួន ៨ ដែលទទួលបានការចុះបញ្ជីសម្គាល់ម៉ាកសម្គាល់ភូមិសាស្រ្ត (GI) របស់ប្រទេសកម្ពុជា។ វាជាមោទនភាពរបស់ខេត្តក្រចេះ ដែលមានផលិតផលនេះ ដូច្នេះយើងត្រូវគ្រប់គ្រង បន្សុទ្ធពូជ និងពង្រីកការដាំដុះបន្ថែម។ សូមកុំយកពូជប្រភេទផ្សេងមកលាយលំ»។

ឯកឧត្តមរដ្ឋមន្ត្រីក៏បានលើកឡើងពីសក្តានុពលនៃដំណាំក្រូចថ្លុង ដែលមិនត្រឹមតែជួយបង្កើនជីវភាពរបស់បងប្អូនប្រជាកសិករ ប៉ុណ្ណោះទេ ប៉ុន្តែថែមទាំងលើកតម្លៃកេរ្តិ៍ឈ្មោះសង្កាត់ និងខេត្ត តាមរយៈវិស័យទេសចរណ៍ផងដែរ។

ផ្លែក្រូចថ្លុងកោះទ្រង់ ត្រូវបានចុះបញ្ជីសម្គាល់ម៉ាកសម្គាល់ភូមិសាស្រ្តទំនិញ «ក្រូចថ្លុងកោះទ្រង់» ជាផ្លូវការ កាលពីថ្ងៃទី២៥ ខែមិថុនា ឆ្នាំ២០១៨។​

យោងតាមសាលាសង្កាត់កោះទ្រង់ មានបងប្អូនប្រជាពលរដ្ឋដាំក្រូចថ្លុងប្រហែល ៩០ ភាគរយ លើផ្ទៃដីប្រមាណជាង ៣០ ហិកតា ដោយមានដើមក្រូចថ្លុងប្រមាណជាង ១ ម៉ឺនដើម ហើយក្នុងមួយដើមអាចមានផ្លែយ៉ាងតិច ១០០ ផ្លែក្នុងមួយឆ្នាំ។

ក្រូចថ្លុងកោះទ្រង់ អាចលក់បានក្នុងតម្លៃ ១ គីឡូក្រាម ពី ៧,០០០ ទៅ ៨,០០០ រៀល (តម្លៃបេះចេញពីដើម)។ ផ្លែក្រូចថ្លុងកោះទ្រង់ ត្រូវបានចុះបញ្ជីសម្គាល់ម៉ាកសម្គាល់ភូមិសាស្រ្តទំនិញ «ក្រូចថ្លុងកោះទ្រង់» ជាផ្លូវការ កាលពីថ្ងៃទី២៥ ខែមិថុនា ឆ្នាំ២០១៨។

សហគមន៍អេកូទេសចរណ៍ធម្មជាតិកោះទ្រង់ គឺជាកោះមួយស្ថិតនៅកណ្តាលទន្លេមេគង្គ ទល់មុខទីរួមខេត្តក្រចេះ ទិសខាងលិចប្រមាណ ១ គីឡូម៉ែត្រ។ កោះទ្រង់ជាសង្កាត់មួយក្នុងចំណោមសង្កាត់ទាំង៥ នៃក្រុងក្រចេះ ខេត្តក្រចេះ។ កោះនេះមានភូមិចំនួន២ មានផ្ទៃដីសរុបទំហំ ២២៣ ហិកតា ហើយប្រជាពលរដ្ឋភាគច្រើនជាកសិករ ពីព្រោះដីនៅលើកោះនេះសម្បូរទៅដោយជីវជាតិ អំណោយផលដល់វិស័យកសិកម្ម៕
អត្ថបទនិងរូបថត ៖AKP