CMAC បិទវគ្គហ្វឹកហ្វឺនជំនាញកម្ទេចយុទ្ធភណ្ឌ មិនទាន់ផ្ទុះ

កំពង់ឆ្នាំង ៖ វិទ្យាស្ថានបច្ចេកទេសសកម្មភាពកំចាត់មីនខេត្តកំពង់ឆ្នាំង នាព្រឹកថ្ងៃទី១៣ ខែមិនាឆ្នាំ២០២៦ មានរៀបចំពិធីបិទវគ្គហ្វឹកហ្វឺនស្តីពី “ ជំនាញកម្ទេចយុទ្ធភណ្ឌមិនទាន់ផ្ទុះ ” ក្រោមអធិបតីភាព ឯកឧត្តម អ៊ុ ភូមិរ៉ូ អគ្គនាយករងមជ្ឈមណ្ឌលសកម្មភាពកម្ចាត់មីនកម្ពុជា (CMAC) និងជាតំណាងដ៏ខ្ពង់ខ្ពស់ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកCMAC ។

អញ្ជើញចូលរួមក្នុងពិធីបិទវគ្គហ្វឹកហ្វឺននេះដែរ មាន លោកស្រី Kelly Saltzman មន្រ្តីស្ថានទូតសហរដ្ឋអាម៉េរិក និងលោក Hans Peter Risser នាយកអង្គការ NPA ប្រចាំកម្ពុជា។

សូមបញ្ជាក់ថា វគ្គហ្វឹកហ្វឺននេះ មានរយៈពេល ៦សប្តាហ៍ បានបណ្ដុះបណ្ដាលសិក្ខាកាមសរុបចំនួន ១៥នាក់ (ក្នុងនោះស្រ្តីមានចំនួន ១១នាក់) មកពីកងឯកភាពកំចាត់មីនទី៥ របស់អង្គភាពស៊ីម៉ាក់ចំនួន១០នាក់ និងបុគ្គលិកអង្គការ NPA រតនគិរីចំនួន៥នាក់ ក្រោមការដឹកនាំបង្វឹកដោយគ្រូឧទ្ទេសជំនាញមកពីប្រទេសន័រវេស៍។

កម្មវិធីសិក្សាត្រូវបានរៀបចំឡើងយ៉ាងហ្មត់ចត់ចំនួន ២៩មេរៀន ដែលរួមមានការសិក្សាទ្រឹស្តី និងការអនុវត្តផ្ទាល់លើទីវាលយ៉ាងស៊ីជម្រៅ លើជំនាញសំខាន់ៗដូចជា ការសម្គាល់ប្រភេទគ្រាប់យុទ្ធភណ្ឌមិនទាន់ផ្ទុះ គ្រាប់កាំភ្លើងត្បាល់ ប្រភេទគ្រាប់ទម្លាក់ពីលើយន្តហោះ ការប្រើប្រាស់ឧបករណ៍បច្ចេកទេសទំនើបៗ និងបច្ចេកទេសកម្ទេចយុទ្ធភណ្ឌជាក់ស្តែងជាដើម។

ការរៀបចំវគ្គហ្វឹកហ្វឺននាពេលនេះ គឺជាផ្នែកមួយនៃកិច្ចខិតខំប្រឹងប្រែងពង្រឹងសមត្ថភាពជាតិ ដើម្បីឆ្លើយតបទៅនឹងតម្រូវការប្រតិបត្តិការជាក់ស្តែង ជាពិសេសនៅតាមបណ្តោយដងទន្លេមេគង្គ ដែលតែងមានសេចក្តីរាយការណ៍ពីការរកឃើញយុទ្ធភណ្ឌសំណល់ពីសង្គ្រាមជាបន្តបន្ទាប់។ ការបង្កើនជំនាញដល់មន្ត្រីជួរមុខ មិនត្រឹមតែជួយធានាសុវត្ថិភាពជូនប្រជាពលរដ្ឋក្នុងសហគមន៍ប៉ុណ្ណោះទេ ប៉ុន្តែថែមទាំងរួមចំណែកយ៉ាងសំខាន់ដល់គោលដៅយុទ្ធសាស្ត្ររបស់រាជរដ្ឋាភិបាល ក្នុងការកាត់បន្ថយគ្រោះថ្នាក់ និងជំរុញការអភិវឌ្ឍសង្គមជាតិឱ្យកាន់តែប្រសើរឡើង។

ធ្វើសេចក្តីរាយការណ៍នៅក្នុងឱកាសនោះ លោកឧត្តមសេនីយ៍ទោ ឈិន ប៊ុនរ៉ាន់ ប្រធានវិទ្យាស្ថានបច្ចេកទេសសកម្មភាពកំចាត់មីន ក៏បានបង្ហាញពី មោទនភាពចំពោះលទ្ធផលនៃវគ្គសិក្សានេះ ដែលជាផ្នែកមួយនៃបេសកកម្មបណ្តុះបណ្តាលធនធានមនុស្ស ដែលវិទ្យាស្ថានបានផ្តល់ការបណ្តុះបណ្តាលដល់សិក្ខាកាមបានចំនួន ៤៤,០០០នាក់ ស្មើនឹង១.២០០វគ្គសិក្សា ចាប់តាំងពីឆ្នាំ១៩៩២ មក ដើម្បីឆ្ពោះទៅរកគោលដៅរំដោះផ្ទៃដី សម្រាប់កម្ពុជាគ្មានមីននាពេលអនាគត។

លោកឧត្តមសេនីយ៍ត្រីក៏ថ្លែងអំណរគុណយ៉ាងជ្រាលជ្រៅចំពោះលោក Hans Peter Risser នាយកអង្គការNPA ប្រចាំកម្ពុជា ដែលបានគាំទ្រទាំងស្មារតី ថវិកា និងបច្ចេកទេសសម្រាប់វគ្គនេះឱ្យដំណើរការ បានល្អប្រសើររហូតបញ្ចប់វគ្គជាស្ថាពរ និងមន្រ្តីអមដំណើរ និងជាពិសេស សូមថ្លែងអំណរគុណយ៉ាងជ្រាលជ្រៅដល់សហរដ្ឋអាម៉េរិក ដែលបានផ្តល់ថវិកាដល់អង្គភាពស៊ីម៉ាក់ សម្រាប់គាំទ្រសកម្មភាពមីននៅកងឯកភាពកំចាត់មីនទី៣ និងទី៥តរៀងមក។

មានប្រសាសន៍នៅក្នុងពិធីបិទវគ្គនាឱកាសនោះ ឯកឧត្តម អ៊ុ ភូមិរ៉ូ អគ្គនាយករង CMAC បានសម្ដែងនូវការកោតសរសើរចំពោះសិក្ខាកាមទាំងអស់ក្នុងការខិតខំប្រឹងប្រែងរៀនសូត្រ ដើម្បីយកទៅបំពេញភារកិច្ចឱ្យបានគាប់ប្រសើរ។

ឯកឧត្តម ក៏បានកោតសរសើរចំពោះកិច្ចសហប្រតិបត្តិការដ៏ជិតស្និទ្ធជាមួយអង្គការ NPA ជាមួយអង្គភាពCMAC និងបានថ្លែងអំណរគុណយ៉ាងជ្រាលជ្រៅដល់រដ្ឋាភិបាលសហរដ្ឋអាម៉េរិក ដែលបានផ្ដល់ការគាំទ្រទាំងថវិកានិងបច្ចេកទេស ដើម្បីរួមចំណែកក្នុងវិស័យសកម្មភាពមីនជាមួយអង្គភាពស៊ីម៉ាក់។

ឯកឧត្តម បានសង្កត់ធ្ងន់ថា ការអភិវឌ្ឍជំនាញរបស់បុគ្គលិកនៃផ្នែកយុទ្ធភណ្ឌមិនទាន់ផ្ទុះនេះ គឺមានសារៈសំខាន់ណាស់សម្រាប់អង្គភាព CMAC។ បន្ថែមពីនេះអង្គភាព CMAC កំពុងពិភាក្សាជាមួយកងទ័ពសហរដ្ឋអាម៉េរិកនៃ (បញ្ជាការដ្ឋានប៉ាស៊ីហ្វិក) ដើម្បីរៀបចំផែនការកម្មវិធីបណ្តុះបណ្តាលរយៈពេលប្រាំឆ្នាំសម្រាប់បុគ្គលិកផ្នែក EOD ដែលអាចនឹងចាប់ផ្តើមនៅឆ្នាំ២០២៧ ។

ជាការឆ្លើយតប លោកស្រី Kelly Saltzman មន្រ្តីស្ថានទូតសហរដ្ឋអាម៉េរិកបានមានប្រសាសន៍ថា សហរដ្ឋអាម៉េរិកបានប្តេជ្ញាផ្តល់ជំនួយសរុបចំនួន ១៣ លានដុល្លារសម្រាប់សកម្មភាពមីនមនុស្សធម៌នៅកម្ពុជាក្នុងឆ្នាំនេះ។ នេះរួមបញ្ចូលទាំងកញ្ចប់ថវិកាចំនួន ១០ លានដុល្លារថ្មីៗនេះ និងថវិកាបន្ថែមចំនួន ៣ លានដុល្លារទៀតជាពិសេសដើម្បីគាំទ្រដល់ការបោសសម្អាតមីន។ ថវិកានេះគាំទ្រដល់វគ្គបណ្តុះបណ្តាលជំនាញកម្ទេចយុទ្ធភណ្ឌមិនទាន់ផ្ទុះ ដែលដំណើរការដោយអង្គការជំនួយប្រជាជនន័រវេស សម្រាប់មជ្ឈមណ្ឌលសកម្មភាពមីនកម្ពុជា ៕អត្ថបទ ហឹង ចូច , រូបថត សន គន្ធនិវឌ្ឍន៍