អនុប្រធានមន្ទីរព័ត៌មាន ខេត្តកំពង់ឆ្នាំង អំពាវ នាវឲ្យសិស្សា​នុសិស្ស​ ប្រុងប្រយ័ត្នចំពោះព័ត៌មានក្លែងក្លាយ

កំពង់ឆ្នាំង ៖លោក ហឹង ចូច អនុប្រធានមន្ទីរព័ត៌មាន និងជាប្រធានក្រុមការងារព័ត៌មាន និងសាធារណមតិ ខេត្តកំពង់ឆ្នាំង បានអំពាវនាវឲ្យ លោកគ្រូ អ្នកគ្រូ និងសិស្សានុសិស្សត្រូវប្រុងប្រយ័ត្ន ចំពោះព័ត៌មានក្លែងក្លាយ ។បើមិនច្បាស់សូមកុំជឿ និងចែកចាយបន្ត ។

លោក អនុប្រធានមន្ទីរ បានថ្លែងអំពាវនាវបែបនេះ នៅក្នុងយុទ្ធនាការប្រឆាំងព័ត៌មានក្លែងក្លាយ ក្រោមទិសស្លោក «និយាយថាទេ ចំពោះព័ត៌មានក្លែងក្លាយ » នៅវិទ្យាល័យ ហ៊ុន សែន ទឹកផុស កាលពីថ្ងៃទី២៣ ខែកុម្ភៈ ឆ្នាំ២០២៦ ។

លោក ហឹង ចូច បញ្ជាក់ថា ព័ត៌មានជាច្រើនត្រូវបានផ្សព្វផ្សាយតាមបណ្តាញសង្គម ដែលមានលក្ខណៈចម្រុះ ក្នុងនោះក៏មានជនខិលខូចឆ្លៀតឳកាស យកមធ្យោបាយបែបថ្មីនេះ ទៅបម្រើឲ្យអំពើទុច្ចរិតរបស់ខ្លួន ដូចជាការផ្សព្វផ្សាយព័ត៌មានក្លែងក្លាយ និងព័ត៌មានបំពុលជាដើម ។ ការផ្សព្វផ្សាយព័ត៌មានក្លែងក្លាយ និងព័ត៌មានបំពុលនេះ បានបង្ករគ្រោះថ្នាក់សម្រាប់អ្នកទទួលព័ត៌មាន ដែលមិនមែនជាព័ត៌មាន ផ្តល់នូវសុវត្តិភាព ។

ប្រឈមនឹងបញ្ហានេះ លោក អនុប្រធានមន្ទីរព័ត៌មាន ខេត្តកំពង់ឆ្នាំង បានអំពាវនាវឲ្យលោកគ្រូ អ្នកគ្រូ និងសិស្សានុសិស្ស ត្រូវមានការប្រុងប្រយ័ត្នឲ្យបានកាន់តែខ្លាំង ចំពោះព័ត៌មានក្លែងក្លាយ ត្រូវនិយាយថាទេចំពោះព័ត៌មានក្លែងក្លាយ ៕ អត្ថបទ និងរូបថត : សន គន្ធនិវឌ្ឍន៍