លោក​ សាន់ យូ​ ចុះ​ពិនិត្យ​និង​អន្តរាគមន៍​សង្គ្រោះ​ស្រូវ​ប្រាំង​លើ​ផ្ទៃ​ដី​៧០​ហិច​តា​ នៅ​ក្នុង​ឃុំដារ​ ស្រុក​កំពង់លែង​

កំពង់ឆ្នាំង ៖ដោយមានការយល់ចិត្តទុកដាក់ខ្ពស់ ពីសំណាក់ ឯកឧត្តម ស៊ុន សុវណ្ណារិទ្ធ អភិបាលខេត្តកំពង់ឆ្នាំង ចំពោះដំណាំស្រូវរបស់ប្រជាកសិករ ក្នុងករណីខ្វះខាតទឹក ។

នៅរសៀលថ្ងៃទី ១៨ ខែកុម្ភៈ ឆ្នាំ២០២៦ ឯកឧត្តម បានចាត់ឲ្យ លោក សាន់ យូ អភិបាលរងខេត្ត និងជាប្រធានក្រុមការងារចុះមូលដ្ឋានឃុំដារ ស្រុកកំពង់លែង ដឹកនាំក្រុមការងារ និងមន្ត្រីអាជ្ញាធរភូមិ ឃុំ ចុះពិនិត្យ និងអន្តរាគមន៍បន្ទាន់ ករណីស្រូវប្រាំងរបស់ប្រជាកសិករលើផ្ទៃដី ប្រមាណ៧០ហិចតា ដែលប្រឈមនឹងការខ្វះទឹកនាពេលខាងមុខ ។

លោក សាន់ យូ បានសម្រេចឲ្យដាក់លូ កាត់ទទឹងផ្លូវ ដើម្បីបង្ហូរទឹកចំនួន៨លូ ដើម្បីធ្វើការសង្គ្រោះស្រូវប្រាំងដែលប្រឈមនឹងការខ្វះទឹកខណៈដែល ទំនប់ទឹកជីខ្លា ស្ថិតក្នុងភូមិដារ ឃុំដារ ស្រុកកំពង់លែង មានការរីងរាក់ ប្រឈមនឹងការខ្វះខាតទឹកស្រោចស្រព្វស្រូវប្រាំ នាពេលខាងមុខ ។

នៅក្នុងឳកាសនោះ លោក សាន់ យូ ក៏បានណែនាំដល់អាជ្ញាធរភូមិ ឃុំ ត្រូវចុះពិត្យនិងតាមដានជាប្រចាំ បើមានបញ្ហាប្រឈម ត្រូវរាយការណ៍ឲ្យបានទាន់ពេលវេលា ដើម្បីមានវិធានការអន្តរាគមន៍ ៕