ឯកឧត្តម បណ្ឌិតសភាចារ្យ អ៊ុក រ៉ាប៊ុន ជម្រុញឲ្យមន្ត្រីក្រុមការងារចុះមូលដ្ឋានពន្លឿនការដោះស្រាយសំណូមពរ របស់ប្រជាពលរដ្ឋ

កំពង់ឆ្នាំង ៖នៅក្នុងកិច្ចប្រជុំបូកសរុបលទ្ធផលការងារឆ្នាំ២០២៥ និងលើកទិសដៅការងារ ឆ្នាំ២០២៦ របស់ក្រុមការងាររាជរដ្ឋាភិបាល ចុះមូលដ្ឋាន ខេត្តកំពង់ឆ្នាំង កាលពីថ្ងៃទី១០ ខែកុម្ភៈ កន្លងទៅនេះ ឯកឧត្តម បណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ទទួលបន្ទុកបេសកកម្មពិសេស និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តកំពង់ឆ្នាំង បានជម្រុញឲ្យមន្ត្រី និងអាជ្ញាធរមូលដ្ឋានទាំងអស់ ត្រូវពន្លឿនការដោះស្រាយសំណូមពរ របស់ប្រជាពលឲ្យបានលឿន និងមានប្រសិទ្ធភាព ។

ជាមួយគ្នានេះត្រូវរៀបចំធ្វើវេទិការសាធារណៈ ឲ្យបានច្រើន ដើម្បីស្វែងយល់ពីបញ្ហាប្រឈម ក្តីកង្វល់ និងសំណូមនានាដែលប្រជាពលរដ្ឋ បានលើកឡើងនៅក្នុងវេទិការសាធារណះនោះ ធ្វើការដោះស្រាយឲ្យបានឆាប់ និងជម្រុញឲ្យប្រជាពលរដ្ឋចូលរួមអនុវត្តគោលនយោបាយភូមិ ឃុំ សង្កាត់ មានសុវត្តិភាពនៅគ្រប់មូលដ្ឋាន ។

ឯកឧត្តម បណ្ឌិតសភាចារ្យ អ៊ុក រ៉ាប៊ុន បានវាយយម្លៃខ្ពស់ ចំពោះលទ្ធផលដែលក្រុមការងារចុះមូលដ្ឋានខេត្តកំពង់ឆ្នាំង សម្រេចបានក្នុងឆ្នាំ២០២៥ ក្នុងការឆ្លើយតបតាមសំណើរ សំណូមពរ និងតម្រូវការចាំបាច់របស់ប្រជាពលរដ្ឋ នៅតាមមូលដ្ឋាននិមួយៗ ប្រកបដោយប្រសិទ្ធភាព តម្លាភាព និងគណនេយ្យភាព ៕អត្ថបទ ហឹង ចូច