ឯកឧត្តម ទេព អស្នារិទ្ធ៖ អ្នកសារព័ត៌មានប្រមាណ៧២ភាគរយ ត្រូវបានវាយតម្លៃថា មានសណ្ដាប់ធ្នាប់សារព័ត៌មានល្អប្រសើរនៅកម្ពុជា

ឯកឧត្តម ទេព អស្នារិទ្ធបានថ្លែងថា អ្នកសារព័ត៌មានប្រមាណ៧២ភាគរយ ត្រូវបានវាយតម្លៃថាមានសណ្ដាប់ធ្នាប់សារព័ត៌មានល្អប្រសើរនៅកម្ពុជា តាមរយៈការទទួលយកបញ្ហាដែលកើតមានឡើងក្នុងវិស័យព័ត៌មាន មកសិក្សាស្វែងរកដំណោះស្រាយ ដើម្បីរួមគ្នាលើកកម្ពស់វិជ្ជាជីវៈសារព័ត៌មាន ពង្រឹងគុណភាពព័ត៌មាន និងសុវត្ថិភាពព័ត៌មាន សម្រាប់សាធារណជនទូទៅ ។

ការថ្លែងបែបនេះរបស់ ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានធ្វើឡើងក្នុងឱកាសអញ្ជើញធ្វើបទបង្ហាញពីបទពិសោធ និងការរៀបចំខ្លួន លើការងារគ្រប់គ្រងព័ត៌មាន និងសាធារណៈមតិក្នុងបរិបទសង្គ្រាមឈ្លានពានមកលើអធិបតេយ្យភាព បូរណភាពដែនដី និងការគ្រប់គ្រងសណ្តាប់ធ្នាប់ក្នុងវិស័យសារព័ត៌មាន និងសោតទស្សន៍នៅកម្ពុជា នាថ្ងៃទី២នៃពិធីសន្និបាតបូកសរុបលទ្ធផលការងាររបស់ក្រសួងព័ត៌មាន នៅថ្ងៃទី២០ ខែមករា ឆ្នាំ២០២៦។

ឯកឧត្តម បានបន្តថា ចំពោះបញ្ហាដែលកើតមានឡើងក្នុងវិស័យព័ត៌មាននាពេលកន្លងទៅ មានដូចជា ក្រមសីលធម៌សារព័ត៌មានធ្លាក់ចុះ, ការប្រើឈ្មោះសារព័ត៌មានជាលេសដើម្បីប្រព្រឹត្តទង្វើច្បាប់ហាមឃាត់, កង្វះវិជ្ជាជីវៈពិតប្រាកដធ្វើឱ្យគុណតម្លៃសារព័ត៌មានអាជីពទទួលរងផលវិបាក, ភាពច្របូកច្របល់រវាងអ្នកកាសែតនិងអ្នកបង្កើតមាតិកាលើបណ្ដាញសង្គម, ភាពខ្វះចន្លោះនៃការប្រតិបត្តិនិយាមវិជ្ជាជីវៈសារព័ត៌មាន ,ព័ត៌មានលឿនតែមិនត្រឹមត្រូវ ,ការចុះផ្សាយព័ត៌មានមិនគ្រប់ជ្រុងជ្រោយ ខ្វះតម្លាភាព ដែលនាំឱ្យមានការច្របូកច្របល់ដល់សាធារណជន ជាដើម ។

ឯកឧត្តម បានបន្តទៀតថា ដើម្បីចូលរួមលុបបំបាត់បញ្ហាដែលតែងតែកើតមានឡើងនៅក្នុងវិស័យព័ត៌មាន ក្រសួងព័ត៌មានក៏បានដាក់ចេញនូវដំណោះស្រាយមួយចំនួន រួមមាន៖ ធម្មនុញ្ញវិជ្ជាជីវៈសារព័ត៌មាន ដែលជាមូលដ្ឋានគ្រឹះនៃក្រមសីលធម៌រួម សម្រាប់អ្នកសារព័ត៌មាននិងសមាគមសារព័ត៌មាន, លើកកម្ពស់ស្តង់ដាតែមួយក្នុងការអនុវត្តការងារ ចៀសវាងការបកស្រាយខុសៗគ្នាដែលនាំឱ្យបាត់សណ្ដាប់ធ្នាប់សេចក្ដីថ្លៃថ្នូរ ។ ការធ្វើបច្ចុប្បន្នភាពច្បាប់ និងលិខិតបទដ្ឋានគតិយុត្ត ,ការរៀបចំសណ្ដាប់ធ្នាប់អាជ្ញាប័ណ្ណ, ការគ្រប់គ្រងប្រព័ន្ធផ្សព្វផ្សាយអនឡាញ , ពង្រឹងការផ្តល់បណ្ណសម្គាល់អ្នកសារព័ត៌មានដើម្បីទប់ស្កាត់អ្នកដែលឆ្លៀតឱកាស ប្រើឈ្មោះអ្នកកាសែតទៅរកស៊ីខុសច្បាប់ , ប្រកាសក្រសួងព័ត៌មានស្ដីពីលក្ខខណ្ឌគុណវឌ្ឍិនិងវិជ្ជាជីវៈសារព័ត៌មាន ,ប្រយុទ្ធប្រឆាំងព័ត៌មានក្លែងក្លាយដោយបង្កើតឱ្យមានគណៈកម្មការប្រឆាំងព័ត៌មានដើម្បីតាមដានកំណត់ព័ត៌មានក្លែងក្លាយ។

ក្នុងនោះ ក្រសួងព័ត៌មាន ក៏បានជំរុញដល់អ្នកសារព័ត៌មានឱ្យចូលរួមអនុវត្តក្រមសីលធម៌វិជ្ជាជីវៈសារព័ត៌មាន , បង្កើនការទទួលខុសត្រូវវិជ្ជាជីវៈ, លើកកម្ពស់គុណតម្លៃអ្នកសារព័ត៌មាននៅកម្ពុជា , ក្ដាប់ស្ថានការណ៍និងពង្រឹងការប្រតិបត្តិសណ្ដាប់ធ្នាប់សារព័ត៌មាន របៀបរៀបរយក្នុងចំណោមប្រតិបត្តិករព័ត៌មាន និងសោតទស្សន៍ ឱ្យបានល្អប្រសើរ ៕ អត្ថបទ :វិទ្យុជាតិ