អនុ​ប្រធាន​មន្ទីរ​ព័ត៌​មាន​ខេត្ត​កំពង់​ឆ្នាំង រំលឹក​មន្ត្រី​ការិយា​ល័យ​ទូរ​ទស្សន៍​ ត្រូវ​បន្ត​ការ​ផលិត​កាន់​តែ​សកម្ម ​និង​បង្កើន​ការ​ផ្សព្វ​ផ្សាយ​ឲ្យ​បាន​ទូលំ​ទូលាយ​

កំពង់ឆ្នាំង ៖ លោក ហឹង ចូច អនុប្រធានមន្ទីរព័ត៌មាន និងជាប្រធានក្រុមការងារព័ត៌មាន និងសាធារណមតិ ខេត្តកំពង់ឆ្នាំង បានធ្វើការរំលឹកបន្ថែមទៀតដល់មន្ត្រីការិយាល័យទូរទស្សន៍ ត្រូវបន្តការផលិតឲ្យកាន់តែសកម្ម និងបង្កើនការផ្សព្វផ្សាយឲ្យបានទូលំទូលាយប្រកបដោយគុណភាព ។

លោក អនុប្រធានមន្ទីរ បានធ្វើការក្រើនរំលឹកដល់មន្ត្រីបែបនេះ នៅក្នុងកិច្ចប្រជុំណែនាំ និងការតម្រង់ទិសដល់មន្ត្រីការិយាល័យទូរទស្សន៍ អំពីការផ្យព្វផ្សាយ និងការផលិតព័ត៌មានប្រកបដោយគុណភាព នាព្រឹកថ្ងៃទី១២ ខែមករា ឆ្នាំ២០២៦ ។

លោក ហឹង ចូច បញ្ជាក់ថា កន្លងទៅនេះការិយាល័យទូរទស្សន៍ បានធ្វើការផ្សព្វផ្សាយព័ត៌មាន និងព្រឹត្តិការណ៍សំខាន់ៗជាច្រើន ។ដើម្បីធានាបាននូវលំហូរព័ត៌មានឲ្យកាន់តែទូលំទូលាយថែមទៀត ការិយាល័យទូរទស្សន៍ត្រូវរៀបចំការផ្សាយព័ត៌មាន ឲ្យបានគ្រប់ទម្រង់ សំដៅធ្វើយ៉ាងណាឲ្យប្រជាពលរដ្ឋទទួលបាននូវព័ត៌មានពិត មានប្រភពច្បាស់លាស់ ឆ្លើយតបនិងបន្សាបព័ត៌មានក្លែងក្លាយ បង្កើនទំនុកចិត្តរបស់ប្រជាពលរដ្ឋ មកលើការដឹកនាំរបស់រាជរដ្ឋាភិបាល ។

លោក អនុប្រធានមន្ទីរ បានបញ្ជាក់បន្ថែមទៀតថា ដើម្បីឲ្យការផ្សព្វផ្សាយមានប្រសិទ្ធភាព និងគុណភាព ប្រកបដោយជំនាញ និងវិជ្ជាជីវៈនោះ មន្ត្រីត្រូវតែអភិវឌ្ឍន៍សមត្ថភាព ទាំងការតែងនិពន្ធអត្ថបទ និងជំនាញបច្ចេកទេសស្របតាមការវិវត្ត នៃសង្គមជាតិនិងបច្ចេកវិទ្យា ៕