ឯកឧត្តម​ ពេញ យ៉ាត​ អនុរដ្ឋ​លេខា​ធិការ​ក្រសួង​ព័ត៌មាន​ ៖នៅ​ក្នុង​សម័យ​ឌី​ជី​ថល​ ព័ត៌មាន​ក្លែងក្លាយ​មាន​ច្រើន​ទម្រង់​និង​កាន់​តែ​ស្មុគ​ស្មាញ​ ទាមទារ​ឲ្យ​ប្រុង​ប្រយ័ត្ន​

កំពង់ឆ្នាំង ៖ ឯកឧត្តម ពេញ យ៉ាត អនុរដ្ឋលេខាធិការក្រសួងព័ត៌មាន បានមានប្រសាសន៍ដោយលើកឡើងថា នៅក្នុងសម័យឌីជីថល ព័ត៌មានក្លែងក្លាយមានច្រើនទម្រង់ និងកាន់តែស្មុកស្មាញ ទាមទារឲ្យមានការប្រុងប្រយ័ត្ន ។

ឯកឧត្តម អនុរដ្ឋលេខាធិការ បានលើកបែបនេះ ក្នុងពេលអញ្ជើញបិទកិច្ចប្រជុំបូកសរុបវឌ្ឍនភាពលទ្ធផលការងារប្រចាំឆ្នាំ២០២៥ និងលើកទិសដៅការងារ ឆ្នាំ២០២៦ របស់មន្ទីរព័ត៌មានខេត្តកំពង់ឆ្នាំង នាល្ងាចថ្ងៃទី ៩ ខែមករា ២០២៦ ។

ឯកឧត្តម ពេញ យ៉ាត បញ្ជាក់ថា លើវេទិកាឌីជីថល ឬតាមបណ្តាញសង្គមជាច្រើន មានបុគ្គលខិលខូចបង្កើតរឿងមិនពិតឡើង ដើម្បីបំភាន់​មតិ​សាធារណៈ ឬបង្កការភ័យខ្លាច កែប្រែរូប ឬបង្កើតដោយ AI ឲ្យមើលទៅដូចពិត ដើម្បីបង្កការយល់ច្រឡំ   ប្រើ AI បង្កើតវីដេអូ ឬ សំឡេងមនុស្សឲ្យនិយាយ ឬ ធ្វើអ្វីដែលពួកគេមិនបានធ្វើពិតៗទេ  ប្រើចំណងជើងបោកបញ្ឆោត ដើម្បីទាក់ទាញការចុច ប៉ុន្តែខ្លឹមសារមិនត្រឹមត្រូវ ឬ បំភាន់  ព័ត៌មានបោកប្រាស់តាមអនឡាញ និង ប្រើព័ត៌មានមិនពិត ដើម្បីបោកយកប្រាក់ ឬទិន្នន័យផ្ទាល់ខ្លួន ជាដើម។

ឯកឧត្តមបានសង្កត់ធ្ងន់ថា បើប្រជាពលរដ្ឋនៅតែប្រើបណ្តាញសង្គម ដូចជា Facebook Tiktok  ជាដើម សូមយល់ដឹងពីចំនុចទាំងនេះ ហើយរួមគ្នាលុបបំបាត់ព័ត៌មានក្លែងក្លាយ ដើម្បីការពារ ខ្លួន និងត្រូវពិនិត្យប្រភព ពិនិត្យកាលបរិច្ឆេទ ប្រៀបធៀបជាមួយប្រភពផ្លូវការ និងកុំចែករំលែកបើមិនប្រាកដ។

ឯកឧត្តម ពេញ យ៉ាត អនុរដ្ឋលេខាធិការក្រសួងព័ត៌មាន បញ្ជាក់បន្ថែមទៀតថាបើគ្មានការសហការពីគ្រប់ភាគីទេនោះ ទោះមន្ត្រីព័ត៌មាន ឬអ្នកសារព័ត៌មានខិតខំយ៉ាងណាក៏មិនអាចទប់ស្កាត់ព័ត៌មានក្លែងក្លាយបានទេ។ស្មារតីទទួលខុសត្រូវរួម គឺជាចំណុចគន្លឹះការពារសង្គមពីព័ត៌មានក្លែងក្លាយ ៕
អត្ថបទ កែវ សេងសុចន្តា,រូបថត សន គន្ធនិវឌ្ឍន៍