លោក សាន់ យូ ​អភិបាល​រង​ខេត្ត​កំពង់ឆ្នាំង​ ជម្រុញ​ឲ្យ​ក្រុម​ការងារ​ព័ត៌មាន​ និងសាធារណ​មតិ​ នៃ​មន្ទីរ​ព័ត៌​មាន​ បន្ត​រួម​គ្នា​ទប់​ស្កាត់​ព័ត៌មាន​ក្លែង​ក្លាយ​

កំពង់ឆ្នាំង ៖លោក សាន់ យូ អភិបាលរងខេត្ត និងជាអ្នកនាំពាក្យរដ្ឋបាល ខេត្តកពង់ឆ្នាំង ជម្រុញឲ្យក្រុមការងារព័ត៌មាន និងសាធារំមតិនៃមន្ទីរព័ត៌មាន បន្តរួមគ្នាទប់ស្កាត់ព័ត៌មានក្លែងក្លាយ ដែលកំពុងចរាចរក្នុងសង្គមជាពិសេសតាមរយះបណ្តាញសង្គម។

លោក អភិបាលរងខេត្ត បានមានប្រសាសន៍ ជម្រុញបែបនេះ ក្នុងកិច្ចប្រជុំបូបសរុបវឌ្ឍនភាពលទ្ធផលការងារឆ្នាំ២០២៥ និងលើកទិសដៅអនុវត្តបន្តឆ្នាំ២០២៦ របស់មន្ទីរព័ត៌មានខេត្តកំពង់ឆ្នាំង នាព្រឹកថ្ងៃទី៩ ខែមករា ឆ្នាំ២០២៦ ។

លោក សាន់ យូ បានសម្តែងនូវការកោតសរសើរចំពោះថ្នាក់ដឹកនាំមន្រ្តីរាជការទាំងអស់ នៃមន្ទីរព័ត៌មានខេត្តកំពង់ឆ្នាំង ដែលជានិច្ចកាល តែងតែបានយកចិត្តទុកដាក់ ក្នុងការបំពេញការងាររបស់ខ្លួនប្រកបដោយការទទួលខុសត្រូវខ្ពស់ លើកមុខជំនាញ និង វិជ្ជាជីវៈរបស់ខ្លួន ។

លោក អភិបាលរងខេត្ត បានបញ្ជាក់ទៀតថា មន្ទីរព័ត៌មាន បានដើរតូនាទីយ៉ាងសំខាន់ជាសេនាធិការរបស់គណៈបញ្ជាការឯកភាពខេត្ត លើកិច្ចការងារព័ត៌មាន ដូចនេះត្រូវគ្រប់គ្រងប្រពន្ធ័ផ្សព្វផ្សាយក្នុងខេត្តឲ្យបានជាប់ល្អ ដើម្បីពង្រឹងកិច្ចសហប្រតិបត្តិការក្នុងការផ្សព្វផ្សាយឲ្យបានទូលំទូលាយ ជូនដល់ប្រជាពលរដ្ឋក្នុងខេត្តឱ្យបានដឹងពីព័ត៌មានពិត ។

លោក សាន់ យូ អភិបាលរងខេត្តកំពង់ឆ្នាំង បានបញ្ជាក់ទៀតថា កត្តាសាមគ្គីភាពគឺជាកិច្ចការដែលសំខាន់ នៅក្នុងអង្គភាព ដូចនេះនៅក្នុងអង្គភាព ត្រូវតែសហការចែករំលែកពីគ្នាទៅវិញទៅមក ដោយបំពេញកិច្ចការងារក្នុងក្របខណ្ឌមន្ទីរព័ត៌មាន ផ្តោតសំខាន់លើការងារបណ្តុះបណ្តាល និងពង្រឹងសមត្ថភាពបន្តដល់មន្រ្តី ។ ធ្វើយ៉ាងណាធានាឲ្យបាននូវលំហូរព័ត៌មាន ពីថ្នាក់ជាតិ មកថ្នាក់ក្រោមជាតិ តាមរយៈប្រពន្ធ័ផ្សព្វផ្សាយដែលមាននៅក្នុងខេត្ត ដើម្បីចែករំលែកដល់ប្រជាពលរដ្ឋនិងមហាជន ៕ អត្ថបទ ហឹង ចូច,រូបថត សន គន្ធនិវឌ្ឍន៍