ទិវា​ពិភព​លោក​កាក​បាទ​ក្រហម​ និង​អឌ្ឍ​ចន្ទ​ក្រហម​ខួប​លើក​ទី​១៦២​ ខេត្ត​កំពង់​ឆ្នាំង​ ទទួល​បាន​ថវិកា​ពី​សប្បុរស​ជន​ជាង​២០​ម៉ឺន​ដុល្លារ

កំពង់ឆ្នាំង ៖ទិវាពិភពលោកកាកបាទក្រហម និងអឌ្ឍចន្ទក្រហម ខួបលើកទី១៦២ និងខួបលើកទី៧០ឆ្នាំ នៃកាកបាទក្រហមកម្ពុជា ខេត្តកំពង់ឆ្នាំង បានប្រារព្វធ្វើកាលពីថ្ងៃទី១៣ ខែធ្នូ ឆ្នាំ២០២៥ ក្រោមប្រធានបទ «រួមគ្នាស្ម័គ្រចិត្ត ដើម្បីសហគមន៍សុខភាពល្អ និងមានភាពធន់នឹងអាកាសធាតុ» ។

នៅក្នុងទិវានេះគណ:កម្មាធិការសាខាកាកបាទក្រហមកម្ពុជា ខេត្តកំពង់ឆ្នាំងបានទទួលថវិកា ពីសប្បុរសជន ចំនួន ២១៧ ១០១ ដុល្លា ដើម្បីរួមចំណែកក្នុងការជួយដោះស្រាយ សម្រាលទុក្ខលំបាក របស់ប្រជាពលរដ្ឋរងគ្រោះ និងងាយរងគ្រោះ ដោយសារគ្រោះមហន្តរាយផ្សេងៗ ។

ឯកឧត្តម ស៊ុន សុវណ្ណារិទ្ធិ ប្រធានគណ:កម្មាធិការសាខាកាកបាទក្រហមកម្ពុជា ខេត្តកំពង់ឆ្នាំង បានឲ្យដឹងថាកន្លងមកគណៈកម្មាធិការ​​សាខា បានចូលរួមធ្វើសកម្មភាពមនុស្ស ដោយបានចុះចែកអំណោយដល់គ្រសារប្រជាពលរដ្ឋ ដែលរងគ្រោះ ដោយគ្រោះធម្មជាតិផ្សេងៗ ដូចជាខ្យល់កន្ត្រាក់ ទឺកជន់ លង់ទឹក និងគ្រោះអគ្គិភ័យជាដើម ។ ក្រៅពីនេះមន្ត្រីគណៈកម្មាធិការសាខាតែងតែចេញធ្វើការងារសង្គម នៅតាមមូលដ្ឋាន ដើម្បីផ្សព្វផ្សាយច្បាប់ស្តីពីចរាចរណ៍​ផ្លូវគោក កាត់បន្ថយការប្រើប្រាស់ថង់ប្លាស្ទិក ការថែទាំសុខភាពមាតា ទារក និងកុមារផងដែរ ។

នៅក្នុងឳកាសនោះ ឯកឧត្តម បណ្ឌិតសភាចារ្យ អ៊ុក រ៉ាប៊ុន ប្រធានកិត្តិយសគណៈកម្មាធិការសាខា កាកបាទក្រហមកម្ពុជា ខេត្តកំពង់ឆ្នាំង បានថ្លែង​អំណគុណ ដល់សប្បុរសជនដែលបានចូលរួមឧបត្ថម្ភថវិកា សម្ភារៈ និងគ្រឿងឧបភោគបរិភោគ សម្រាប់ជួយដោះស្រាយដល់ប្រជាពលរដ្ឋដែលរងគ្រោះ និងងាយរងគ្រោះ ដោយគ្រោះធម្មជាតិ និងគ្រោះមហន្តរាយផ្សេងៗ ៕