លោក​ ឈាង វណ្ណះ ៖ការ​ផលិត​​ឬ​ចែក​ចាយ​ព័ត៌មាន​ក្លែងក្លាយ​ គឺ​បំផ្លាញ​ខ្លួន​ឯង​ គ្រួសារ​ និង​សង្គមជាតិ​

កំពង់ឆ្នាំង ៖លោក ឈាង វណ្ណះ ប្រធានស្តីទីមន្ទីរព័ត៌មាន ខេត្តកំពង់ឆ្នាំង បានថ្លែងបញ្ជាក់ថា ការផលិត ឬចែកចាយព័ត៌មានក្លែងក្លែងក្លាយ គឺបំផ្លាញខ្លួនឯង គ្រួសារ និងសង្គមជាតិ ។លោកប្រធានមន្ទីរស្តីទី បានថ្លែងបញ្ជាក់បែបនេះ នៅក្នុងយុទ្ធនាការប្រឆាំងព័ត៌មានក្លែងក្លាយ កាលពីថ្ងៃទី១២ ខែធ្នូ ឆ្នាំ២០២៥ នៅវិទ្យាល័យតេជោ ហ៊ុន សែន ទឹកហូត ស្ថិតក្នុងស្រុកលាប្អៀរ ខេត្តកំពង់ឆ្នាំង ។

លោក ឈាង វណ្ណះ បានថ្លែងបញ្ជាក់ទៀតថា បច្ចប្បន្នការទទួលបានព័ត៌មាន ងាយស្រួល ឆាប់រហ័ស និងទូលំទូលាយ ដែលព័ត៌មានទាំងនោះមានទាំងព័ត៌មានពិត ទាំងព័ត៌មានក្លែងក្លាយ ។ ព័ត៌មានក្លែងក្លាយ ធ្វើឲ្យប៉ះពាល់ដល់សង្គមជាតិ ធ្វើឲ្យប្រជាពលរដ្ឋរារែកក្នុងការសម្រេចចិត្ត ឬសម្រេចចិត្តខុស។លោកបញ្ជាក់ថា យើងត្រូវពិនិត្យមើលប្រភពព័ត៌មាន មើលកាលបរិច្ឆេទ មើលអត្តសញ្ញាណស្ថាប័ន ឬគណនី ដែលផ្សព្វផ្សាយព័ត៌មាននោះ ហើយក៏ត្រូវពិនិត្យមើលថា តើមានសារព័ត៌មានវិជ្ជាជីវៈ ដទៃទៀតចុះផ្សាយដែរឬទេ? ដែលទាំងនេះគឺជាចំណុចសំខាន់ៗត្រូវធ្វើ ដើម្បីដឹងថា នោះជាព័ត៌មានពិត ឬព័ត៌មានក្លែងក្លាយ។

លោក ឈាង វណ្ណះ បញ្ជាក់ឲ្យដឹងបន្ថែមទៀតថា ចំពោះយុទ្ធនាការ «និយាយថាទេចំពោះព័ត៌មានក្លែងក្លាយ » បានចាប់ផ្តើមកាលពីថ្ងៃទី០១ ខែមេសា ឆ្នាំ២០២៤ ក្នុងគោលបំណង ដើម្បីបង្កានិងទប់ស្កាត់ លុបបំបាត់ព័ត៌មានមិនពិត ព័ត៌មានបំភ្លៃ បំផ្លើស និងបំផ្លាញ តាមរយះការពង្រឹងអក្ខរកម្មព័ត៌
មាន និងប្រព័ន្ធផ្សព្វផ្សាយជូនដល់សាធារណជន និងអនុវត្តវិធានការចាំបាច់មួយចំនួន ៕