ក្រុម​ការងារ​ព័ត៌មាន​និង​សាធារណមតិ​ នៃ​មន្ទីរ​ព័ត៌​មាន​ខេត្ត​កំពង់​ឆ្នាំង​ បន្ត​ធ្វើ​យុទ្ធ​នា​ការ​ប្រឆាំង​ព័ត៌មាន​​​ក្លែងក្លាយ​ នៅ​វិទ្យាល័យ​តេជោ​សែន​ទឹក​ហូត​

កំពង់ឆ្នាំង ៖ក្រុមការងារព័ត៌មាន និងសាធារណមតិ នៃមន្ទីរព័ត៌មានខេត្តកំពង់ឆ្នាំង នៅថ្ងៃទី១២ ខែធ្នូ ឆ្នាំ២០២៥នេះ បានបន្តចុះធ្វើយុទ្ធនាការប្រឆាំងព័ត៌មានក្លែងក្លាយ ក្រោមទិសស្លោក « និយាយថាទេ ចំពោះព័ត៌មានក្លែងក្លាយ » នៅវិទ្យាល័យតេជោសែន ទឹកហូត ស្ថិតក្នុងស្រុករលាប្អៀរ ខេត្តកំពង់ឆ្នាំង ។

យុទ្ធនាការនេះដឹកនាំដោយលោក ឈាង វណ្ណៈ ប្រធានមន្ទីរព័ត៌មានស្តីទី និងលោក ហឹង ចូច អនុប្រធានមន្ទីរ និងជាប្រធានក្រុមការងារព័ត៌មាន និងសាធារណមតិ នៃមន្ទីរព័ត៌មាន ខេត្តកំពង់ឆ្នាំង ។

យុទ្ធនាការនេះបាន នឹងកំពុងដំណើរការយ៉ាងសកម្ម ដោយទទួលបានការគាំទ្រពីសាធារណ:ជនគ្រប់ទិសទី រីឯការអនុវត្តមានការចូលរួមយ៉ាងផុលផុសពីថ្នាក់ដឹកនាំ មន្ត្រីរាជការ មន្ត្រីអាជ្ញាធរមូលដ្ឋាន និងតួអង្គពាក់ព័ន្ធ ដែលបានធ្វើឲ្យយុទ្ធនាការនេះ កំពុងប្រក្លាយជាចលនាជាតិមួយ ក្នុងការទប់ស្កាត់ និងលុបបំបាត់នូវព័ត៌មានក្លែងក្លាយ ក្លែងបន្លំ បំភ្លៃ បំភាន់ ដែលកំពុងចរាចរក្នុងសង្គម ជាពិសេសតាមរយះបណ្តាញសង្គម ។

ដោយឡែកសម្រាប់ខេត្តកំពង់ឆ្នាំង បានធ្វើយុទ្ធនាការនេះយ៉ាងសកម្ម នៅតាមទីប្រជុំជន ផ្សារ សាលារៀន និងអង្គភាពរដ្ឋ មានដូចជាការចុះផ្សព្វផ្សាយ និងចែកខិតបណ្ណ ចាក់ខ្សែអាត់សំឡេងតាមឧឃោសន:ស័ព្ទ និងការដង្ហែរក្បួនតាមដងផ្លូវ ។ដើម្បីបង្កើនការយល់ដឹង ដល់ប្រជាពលរដ្ឋ ក្នុងការប្រុងប្រយ័ត្នចំពោះព័ត៌មានក្លែងក្លាយ ដែលតែតតែកើតមាន នៅក្នុងសង្គម ។

តាមរយះយុទ្ធការនេះ បានធ្វើឲ្យប្រជាពលរដ្ឋមានការយល់ដឹងកើនឡើង ពិសេសមានការចូលរួមពីយុវជន ចំពោះការមិនចែករំលែកព័ត៌មានក្លែងក្លាយដូចមុន ជួយសាងបរិយាកាសព័ត៌មាន ដែលមានភាពទំនួលខុសត្រូវ និងចេះត្រួតពិនិត្យទៅលើព័ត៌មាន មុនធ្វើការចែករំលែកនិងផ្សព្វផ្សាយបន្ត ៕