កម្លាំង​ចម្រុះ​ខេត្ត​កំពង់​ឆ្នាំង​ ឃាត់​រថយន្ត​ធំ​៤​ គ្រឿង​ ដឹក​ដើម​អាកាស្យា​លើស​ទម្ងន់​កម្រិត​កំណត់​

កំពង់ឆ្នាំង ៖កម្លាំងចម្រុះខេត្តកំពង់ឆ្នាំង និងស្រុកសាមគ្គីមានជ័យ ដឹកនាំដោយលោក ជា សុខរិទ្ធិ អភិបាលរងខេត្ត និងលោក ឈួន ចាន់ណា អភិបាលស្រុកសាមគ្គីមានជ័យ បានចុះល្បាតត្រួតពិនិត្យ និងឃាត់រថយន្តធុនធំ ចំនួន៤គ្រឿង ដែលដឹកដើមអាកាស្យា លើសទម្ងន់កម្រិតកំណត់ យកមកអនុវត្តតាមនិតិវិធីច្បាប់ ។

ប្រតិបត្តិការឃាត់រថយន្តយក្យដឹកដើមអាកាស្យាលើសទម្ងន់កម្រិតកំណត់ទាំង៤គ្រឿងនេះ ធ្វើឡើងកាលពីព្រលប់ថ្ងៃទី២៧ ខែវិច្ឆិកា ឆ្នាំ២០២៥ នៅលើកំណាត់ផ្លូវក្រាលកៅស៊ូ ក្នុងភូមិសាស្ត្រស្រុកសាមគ្គីមានជ័យ ខេត្តកំពង់ឆ្នាំង ។

លោក ជា សុខរិទ្ធិ អភិបាលរង ខេត្តកំពង់ឆ្នាំង បានឲ្យដឹងថា បន្ទាប់ពីមានសេចក្តីរាយការណ៍មកថា មានរថយន្តធុនធំដឹកដើមអាកាស្យាលើសទម្ងន់កម្រិតកំណត់ ចេញពីភូមិសាស្ត្រស្រុកសាមគ្គីមានជ័យ បណ្តាលឲ្យខូចផ្លូវ ឯកឧត្តម ស៊ុន សុវណ្ណារិទ្ធិ អភិបាលខេត្ត និងជាប្រធានគណៈបញ្ជាការឯកភាពរដ្ឋបាល ខេត្តកំពង់ឆ្នាំងបានដាក់បញ្ជាឲ្យលោកដឹកនាំកម្លាំង ចុះទប់ស្កាត់ជាបន្ទាន់ផងដែរ ។

លោក អភិបាលរងខេត្តបញ្ជាក់ថា ចាប់ពីម៉ោង១៧ ដល់ម៉ោង២១យប់ ថ្ងៃទី២៧ ខែវិច្ឆិកា ឆ្នាំ២០២៥នេះ កម្លាំងចម្រុះឃាត់បានរថយន្ត៤គ្រឿង ដែលបានដឹកលើសទម្ងន់កម្រិតកំណត់យកមកអនុវត្តច្បាប់ ៕