ឯក​ឧត្តម​ ទេស​រដ្ឋ​មន្ត្រី ​គន់​ គីម​ អញ្ជើញ​ជា​អធិប​តី​ពិធី​ប្រកាស​សមាស​ភាព​គណៈ​កម្មា​ធិ​ការ​សមាគម​អតីត​​យុទ្ធ​ជន​ និង​និវត្ត​ជន​ ខេត្ត​កំពង់​ឆ្នាំង​

កំពងឆ្នាំង ៖ឯកឧត្តម នាយឧត្តមសេនីយ៍ កិត្តិសង្គហបណ្ឌិត គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស អនុប្រធាន និងជាអគ្គលេខាធិការ​សមាគមអតីតយុទ្ធជន និងនិវត្តជនកម្ពុជា នារសៀលថ្ងៃទី១៦ ខែវិច្ឆិកា ឆ្នាំ២០២៥នេះ បានអញ្ជើញជាអធិបតី ពីធីប្រកាសសមាសភាពគណៈកម្មា​ធិការសមាគម អតីតយុទ្ធជន និងនិវត្តជនកម្ពុជា ខេត្តកំពង់ឆ្នាំង ។

សូមបញ្ជាក់ថា ឯកឧត្តម ស៊ុន សុវណ្ណារិទ្ធិ ត្រូវបានតែងតាំងជាប្រធានគណៈកម្មាធិការសមាគមនិងនិវត្តជនកម្ពុជា ខេត្តកំពង់ឆ្នាំង ។

ឯកឧត្តម នាយឧត្តមសេនីយ៍ កិត្តិសង្គហបណ្ឌិត គន់ គីម បានមានប្រសាសន៍ថា អតីតយុទ្ធជន និងនិវត្តជន សុទ្ធសឹងតែជាអ្នកតស៊ូ និងលះបង់ ក្នុងការបម្រើជាតិមាតុភូមិ ដូចគ្នានិងជាកម្លាំងសាមគ្គីដ៏រឹងមាំ ដែលបានរួមចំណែកការពារជាតិ ស្ថាបនា និងអភិវឌ្ឍន៍ជាតិ មកទល់បច្ចុប្បន្ន។

ឯកឧត្តម ទេសរដ្ឋមន្ត្រី បញ្ជាក់ថា ដើម្បីតបស្នងនឹងគុណបំណាច់ដ៏ថ្លៃថ្លានេះ សម្តេចតេជោ ហ៊ុន សែន ប្រធានសមាគម និង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងជាអនុប្រធានទី១ សមាគម បានបន្តផែនការសាងសង់ផ្ទះ និងរៀបចំដីសម្បទានសង្គមកិច្ច ដើម្បីផ្តល់ជូនបងប្អូនអតីតយុទ្ធជន និងនិវត្តជនដែលជួបការលំបាកបន្ថែមពីលើអត្ថប្រយោជន៍នានាដែលបានទទួល។

ឯកឧត្តម នាយឧត្តមសេនីយ៍ កិត្តិសង្គហបណ្ឌិត គន់ គីម បានបញ្ជាក់បន្ថែមទៀតថា ការកែសម្រួលថ្នាក់ដឹកនាំសមាគម ដែលបានធ្វើឡើងនាពេលនេះ ដើម្បីធានាថា រចនាសម្ព័ន្ធការងារនៅតាមបណ្តាខេត្ត មានភាពរឹងមាំ និងមានសមត្ថភាពគ្រប់គ្រាន់ ក្នុងការសម្របសម្រួល និងផ្តល់ការយកចិត្តទុក​ដាក់​ខ្ពស់ ចំពោះសុខមាលភាព និងជីវភាពរស់នៅ របស់អតីតយុទ្ធជន និងនិវត្តជន ៕