ឯកឧត្តម​ ហ៊ុយ​ សារ៉ា​វុធ​៖ គ្រោះ​មហន្តរាយ​កើត​ឡើង​គ្រប់​ទម្រង់​ បណ្តាល​ឱ្យ​មាន​បញ្ហា​ប្រឈម​ឥត​ឈប់ឈរ​ និង​គំរាម​កំហែង​កាន់​តែ​ខ្លាំង​ឡើង​ តាម​រយៈ​ការ​ប្រែប្រួល​អាកាស​ធាតុ​នៅ​ក្នុង​តំបន់​ និង​សកល​លោក​

ឯកឧត្តម ហ៊ុយ សារ៉ាវុធ រដ្ឋលេខាធិការ និងជាប្រធានលេខាធិការដ្ឋានគ្រប់គ្រងគ្រោះមហន្តរាយ នៃក្រសួងព័ត៌មាន បានគូសបញ្ជាក់ថា គ្រោះមហន្តរាយបានកើតឡើងគ្រប់ទម្រង់ ដែលបណ្តាលឱ្យមានបញ្ហាប្រឈមឥត ឈប់ឈរ និងបានគំរាមកំហែងកាន់តែខ្លាំងឡើង តាមរយៈការប្រែប្រួលអាកាសធាតុនៅក្នុងតំបន់ និងសកលលោក។

ការគូសបញ្ជាក់របស់ឯកឧត្តម ធ្វើឡើងក្នុងវគ្គបណ្តុះបណ្តាលមន្រ្តីបង្គោលក្រសួងព័ត៌មានស្តីពី “ការត្រៀមបង្ការហានិភ័យគ្រោះមហន្តរាយ ក្នុងវិស័យព័ត៌មាន “ ដែលរៀបចំឡើងដោយ ក្រសួងព័ត៌មាន និង គណៈកម្មាធិការជាតិគ្រប់គ្រងគ្រោះមហន្តរាយ នាព្រឹកថ្ងៃទី១១ ខែវិច្ឆិកា ឆ្នាំ២០២៥ នាសាលមណ្ឌលបណ្តុះបណ្តាល និងវិក្រឹតការវិជ្ជាជីវៈសារព័ត៌មាន ។

ឯកឧត្តម បានបន្តថា ថ្មីៗនេះនៅបណ្តាប្រទេសក្នុងតំបន់មានការរញ្ជួយដី ទឹកជំនន់ និងគ្រោះធម្មជាតិផ្សេងៗ បានបណ្តាលឱ្យមានអ្នកស្លាប់កើនឡើង និងខូចខាតនូវហេដ្ឋារចនាសម្ព័ន្ធយ៉ាងធ្ងន់ធ្ងរ ។

នាឱកាសនោះដែរ ឯកឧត្តម គីម វីរៈ អគ្គលេខាធិការ គណៈកម្មាធិការជាតិគ្រប់គ្រងគ្រោះមហន្តរាយ បានគូសបញ្ជាក់ថា តួនាទីរបស់ក្រសួងព័ត៌មាន មិនមែនគ្រាន់តែជាអ្នកផ្សព្វផ្សាយប៉ុណ្ណោះទេ ប៉ុន្តែជាយន្តការគន្លឹះ ក្នុងការការពារអាយុជីវិត និងទ្រព្យសម្បត្តិប្រជាពលរដ្ឋនៅគ្រប់ដំណាក់កាលនៃវដ្តគ្រោះមហន្តរាយ ដូចជា ក្នុងដំណាក់កាលត្រៀមបង្ការ ព័ត៌មានដើរតួជា អ្នកអប់រំសាធារណៈ និងការប្រកាសឱ្យ ដឹងមុនអំពីហានិភ័យ, ក្នុងតំណាក់កាលឆ្លើយតបសង្គ្រោះបន្ទាន់ ព័ត៌មានដើរតួជាឧបករណ៍សម្របសម្រួល និងដំណាក់កាលស្ដារឡើងវិញ ព័ត៌មានដើរតួជាអ្នកកសាងទំនុកចិត្ត និងស្តារស្ថេរភាពសង្គម ឡើងវិញ៕