ក្រសួង​អភិវឌ្ឍន៍​ជន​បទ​រៀបចំ​ពិព័រណ៍​ផលិត​ផល​សហគមន៍​ជនបទ​ នៅ​ខេត្ត​កំពង់​ឆ្នាំង

កំពង់ឆ្នាំង ៖ក្រសួងអភិវឌ្ឍន៍ជនបទ សហការជាមួយរដ្ឋបាលខេត្តកំពង់ឆ្នាំង រៀបចំតាំងពិព័រណ៍ ផលិតផលសហគមន៍ជនបទ ក្រោមប្រធានបទ« ភូមិខ្ញុំ ផលិតផលខ្ញុំ » ដើម្បីលើកកម្ពស់គុណតម្លៃផលិតផលជនបទ និងជម្រុញការចូលរួមគាំទ្រផលិតផលសហគមន៍ឲ្យកាន់តែខ្លាំងក្លា តាមរយះការចូលរួមប្រើប្រាស់ផលិតផលក្នុងស្រុកឲ្យបានច្រើនជាអតិបរមា ។

ពិព័រណ៍ផលិតផលសហគមន៍នេះ រៀបចំធ្វើនៅទីលានបាល់ទាត់ខាងមុខសាលាខេត្តកំពង់ឆ្នាំង មានរយះពេល២ថ្ងៃគឺ ថ្ងៃទី២៩,៣០ ខែតុលា ឆ្នាំ២០២៥ ។ដែលពិធីបើកប្រព្រឹត្តទៅក្រោមអធិបតី ឯកឧត្តម ឆាយ ឬទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ព្រមទាំងមានការអញ្ជើញចូលរួមពី ឯកឧត្តម ស៊ីវ រុន ប្រធានក្រុមប្រឹក្សាខេត្ត និងលោក យិន សាវ៉េន អភិបាលរងខេត្តកំពង់ឆ្នាំង ។

ឯកឧត្តម ឆាយ ឬទ្ធិសែន រដ្ឋមន្ដ្រីក្រសួងអភិវឌ្ឍន៍ជនបទ បានថ្លែងបញ្ជាក់ថា ក្រសួងអភិវឌ្ឍន៍ជនបទ បាននិងកំពុងផ្តោតទៅលើការធ្វើពិពិធកម្មសេដ្ឋកិច្ចជនបទ និងនវានុវត្តន៍ការងារ ដើម្បីធានានិរន្តរភាព នៃប្រាក់ចំណូលគ្រួសារនៅតំបន់ជនបទ តាមរយៈការបណ្តុះគំនិតច្នៃប្រឌិត និងអភិវឌ្ឍន៍មូលធនមនុស្សឥតឈប់ឈរ ព្រមទាំងមានកិច្ចសហការជាមួយភាគីពាក់ព័ន្ធនានាផងដែរ។

ជាលទ្ធផលក្រសួង បានចូលរួមចំណែកក្នុងការបង្កើតមុខរបរ សហគ្រិនភាព និងទីផ្សារ ក៏ដូចជាបង្កើតសកម្មភាពសេដ្ឋកិច្ចនានា នៅតំបន់ជនបទ ក្រោមរូបភាពមុខរបរកសិកម្ម និងមុខរបរមិនមែនកសិកម្ម កាត់បន្ថយការធ្វើចំណាកស្រុកដោយប្រថុយប្រថាន ព្រមទាំងជំរុញការលើកស្ទួយកម្រិតជីវភាពរស់នៅ របស់ប្រជាពលរដ្ឋឱ្យកាន់តែប្រសើរឡើង ដែលមូលដ្ឋានចូលរួមសម្រេចនូវចក្ខុវិស័យកម្ពុជា ជាប្រទេសមានប្រាក់ចំណូលខ្ពស់នៅឆ្នាំ ២០៥០។

ឯកឧត្តម រដ្ឋមន្ដ្រី ក៏បានអំពាវនាវដល់គ្រប់ភាគីពាក់ព័ន្ធទាំងអស់ ឱ្យបន្ដចូលរួមចំណែកក្នុងការងារពិពិធកម្មសេដ្ឋកិច្ចជនបទ តាម​រយៈការផលិតឱ្យបានកាន់តែច្រើន និងប្រកបដោយគុណភាព សំដៅលើកកម្ពស់គុណតម្លៃផលិតផលជនបទ និងសូមចូលរួមគាំទ្រផលិត​ផលសហគមន៍ឱ្យកាន់តែខ្លាំងក្លា តាមរយៈការចូលរួមប្រើប្រាស់ផលិតផលក្នុងស្រុកឱ្យបានច្រើនជាអតិបរមា ៕