ផ្លូវ​​​ជន​បទ​ជាង​៤០​គីឡូម៉ែត្រ ​នៅ​ក្នុង​ស្រុក​២​ នៃ​ខេត្ត​កំពង់​ឆ្នាំង​ ត្រូវ​បាន​លើក​កម្រិត​គុណ​ភាព​ពី​ក្រាល​ល្បាយ​​ដី​ ទៅ​ជា​ផ្លូវ​កៅ​ស៊ូ​២​ជាន់​ និង​ក្រាល​បេ​តុង​

កំពង់ឆ្នាំង ៖ ផ្លូវជនបទចំនួន៦ខ្សែរ ប្រវែង៤០,៥០ គីឡូម៉ែត្រ ស្ថិតក្នុងភូមិសាស្ត្រ ស្រុកទឺកផុស និងស្រុកកំពង់ត្រឡាច ខេត្តកំពង់ឆ្នាំង ត្រូវបានលើក​កម្រិត​គុណភាព ពីផ្លូវក្រាលល្បាយដី ទៅជាផ្លូវក្រាលកៅស៊ូ២ជាន់ (DBST) និងក្រាលបេតុង ។

ពិធីបើកការដ្ឋានស្ថាបនាផ្លូវទាំង៦ខ្សែរនេះ ធ្វើឡើងនៅភូមិស្រែអ៊ុក ឃុំតាំងក្រសាំង ស្រុកទឹកផុស នាព្រឹកថ្ងៃទី១៧ ខែតុលា ឆ្នាំ២០២៥ ក្រោមអធិបតីភាព ឯកឧត្តម ឆាយ ឬទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងមានការអញ្ជើញចូលរួមពីសំណាក់ ឯកឧត្តម ស៊ុន សុវណ្ណារិទ្ធិ អភិបាលខេត្ត និងឯកឧត្តម ស៊ីវ រុន ប្រធានក្រុមប្រឹក្សាខេត្តកំពង់ឆ្នាំង ។

ឯកឧត្តម អ៊ុក ពញ្ញា រដ្ឋលេខាធិការក្រសួងអភិវឌ្ឍន៍ជនបទ និងជានាយកគម្រោង បានឲ្យដឹងថា ក្រសួងបានសហការជាមួយដៃគូរអភិវឌ្ឍន៍ គាំទ្រទៅលើគម្រោងនិរន្តរភាពហេដ្ឋារចនាសម្ព័ន្ធជនបទដែលក្នុងនោះ គម្រោងត្រូវស្ថាបនាផ្លូវក្រាលកៅស៊ូ២ជាន់ និងបេតុងសរុបមាន ចំនួន ៦៦ខ្សែ ប្រវែង​៥៣៧​គីឡូម៉ែត្រ កែលម្អផ្សារសហគមន៍ ចំនួន៦ សាងសង់កំពង់ដសហគមន៍ចំនួន៤ និងសាងសង់កន្លែងប្រមូលផ្តុំកសិផល សម្រាប់បណ្តុំកសិករ ៥កន្លែង នៅក្នុងខេត្តចំនួន១២ ។

ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានថ្លែងថា រាជរដ្ឋាភិបាលក្រោមការដឹកនាំប្រកបដោយគតិបណ្ឌិត របស់សម្ដេចមហាបវរធិបតី ហ៊ុន ម៉ាណែត បានបន្តយកចិត្តទុកដាក់ថែរក្សាសន្តិភាព ស្ថិរភាព និងការអភិវឌ្ឍន៍លើផ្ទៃប្រទេស ព្រមទាំងពង្រឹង និងពង្រីកកិច្ចសហប្រតិបត្តិ​ការអន្តរជាតិ ដើម្បីជំរុញការអភិវឌ្ឍសេដ្ឋកិច្ច និងសង្គមកម្ពុជា ក្នុងគោលដៅសម្រេចឱ្យបានចក្ខុវិស័យកម្ពុជា ជាប្រទេសមានចំណូលខ្ពស់នៅឆ្នាំ២០៥០។

ឯកឧត្ដម រដ្ឋមន្រ្ដី ក៏បានបន្ដជម្រាបជូនអំពីគោលនយោបាយអភិវឌ្ឍន៍ជនបទ ដែលមានចក្ខុវិស័យ “កសាងសង្គមជនបទកម្ពុជាឱ្យមានវិបុលភាពប្រកបដោយបរិយាបន្ន និងចីរភាពទាំងផ្នែកសេដ្ឋកិច្ច សង្គមកិច្ច និងវប្បធម៌” ដោយក្រសួងកំពុងយកចិត្តទុកដាក់លើការលើកកម្រិតគុណភាពហេដ្ឋារចនាសម្ព័ន្ធ និងគមនាគមន៍ជនបទ ដូចពាក្យស្លោក “មានផ្លូវគឺមានក្តីសង្ឃឹម”៕