អភិបាល​ខេត្ត​កំពង់​ឆ្នាំង​ ណែ​នាំ​ឲ្យ​មន្ត្រី​អាជ្ញា​ធរ​ និង​សមត្ថកិច្ច​ពាក់​ព័ន្ធ ​យក​ចិត្ត​ទុក​ដាក់​ជម្រុញ​ ការ​អនុ​វត្ត​គោល​នយោ​បាយ​ ភូមិ ឃុំ សង្កាត់​មាន​សុវត្ថិ​ភាព​​

កំពង់ឆ្នាំង ៖ឯកឧត្តម ស៊ុន សុវណ្ណារិទ្ធ អភិបាលខេត្តកំពង់ឆ្នាំង និងជាប្រធានគណ:បញ្ជាការឯកភាពរដ្ឋបាលខេត្ត បានធ្វើការណែនាំឲ្យមន្ត្រីអាជ្ញាធរ និងសមត្ថកិច្ចពាក់ព័ន្ធគ្រប់លំដាប់ថ្នាក់ ត្រូវបង្កើនការយកចិត្តទុកដាក់ ជម្រុញការអនុវត្តគោលនយោបាយភូមិ ឃុំ សង្កាត់មានសុវត្តិភាព រក្សាបាននូវសន្តិសុខ សណ្តាប់ធ្នាប់ដាធារណ: និងសុវត្តិភាពសង្គម ឲ្យបានល្អប្រសើរនៅគ្រប់មូលដ្ឋាន ។

ឯកឧត្តម អភិបាលខេត្តកំពង់ឆ្នាំង បានធ្វើការណែនាំដល់មន្ត្រីបែបនេះ ក្នុងកិច្ចប្រជុំគណៈបញ្ជាការឯកភាពរដ្ឋបាលខេត្ត ប្រចាំខែកញ្ញា និងបូកសរុបលទ្ធផលការងារ ការអនុវត្តគោលនយោបាយភូមិ ឃុំ សង្កាត់ មានសុវត្តិភាព ត្រីមាសទី៣ នាព្រឹកថ្ងៃទី១៣ ខែតុលា ឆ្នាំ២០២៥ ។

ឯកឧត្តម ស៊ុន សុវណ្ណារិទ្ធិ ជម្រុញឲ្យមន្ត្រីអាជ្ញាធរ និងសមត្ថកិច្ចនៅគ្រប់មូលដ្ឋានទាំងអស់ ត្រូវបន្តយកចិត្តទុកដាក់ក្នុងការផ្តល់សេវាសាធារណ:ជូនប្រជាពលរដ្ឋ កាត់បន្ថយករណីគ្រោះថ្នាក់ចរាចរណ៍ បង្ការ ទប់ស្កាត់ និងបង្ក្រាបបទល្មើសគ្រប់ប្រភេទឲ្យមានប្រសិទ្ធភាព ។ ជាមួយគ្នានេះ ត្រូវបន្តរៀបចំវេទិកាការងារដើម្បីស្វែងរកការងារជូនដល់បងប្អូនពលករដែលត្រឡប់មកពីប្រទេសថៃ ក៏ដូចជាប្រជាពលរដ្ឋទូទៅ ។ និងត្រូវតាមដានស្ថានភាពទឹកជំនន់ ព្រោះទឹកទន្លេនៅឆ្នាំនេះធំជាងឆ្នាំមុន ហើយត្រូវត្រៀមចាត់វិធានការឆ្លើយតបឲ្យបានទាន់ពេលវេលា ក្នុងការជួយសង្គ្រោះប្រជាពលរដ្ឋដែលរងផលប៉ះពាល់ ៕