អាជ្ញា​ធរ​ខេត្ត​កំ​ពង់​ឆ្នាំង​ និង​មន្ទីរ​ការងារ​កំពុង​បន្ត​សម្រប​សម្រួល​ជូន​បង​ប្អូន​ពលករ​ទើប​វិល​ត្រឡប់​មក​ពី​ប្រទេសថៃ​ មាន​ការងារ​ធ្វើ​

កំពង់ឆ្នាំង ៖ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានថ្លែងថា ខេត្តកំពង់ឆ្នាំង មានតម្រូវការកម្លាំងពលកម្មជិត ៥ ០០០ កន្លែងទៀត ដែលអាជ្ញាធរ និងមន្ទីរការងារកំពុងបន្តសម្របសម្រួល ជូនបងប្អូនពលករបានចូលធ្វើការងារ ។ ជាមួយគ្នានេះអាជ្ញាធរខេត្ត ក្រុងស្រុក ឃុំ សង្កាត់ បាន​យកចិត្តទុកដាក់ចំពោះគ្រួសារកងទ័ព ដែលកំពុងឈរជើង នៅសមរភូមិមុខផងដែរ ។

ឯកឧត្តម អភិបាលខេត្តកំពង់ឆ្នាំង បានថ្លែងបញ្ជាក់ឲ្យដឹងបែបនេះ នៅក្នុងឳកាសអមដំណើរ ឯកឧត្តបណ្ឌិត សភាចារ្យ អ៊ុករ៉ាប៊ុន អញ្ជើញជួបសំណេះ​សំណាលជាមួយគ្រួសារកងទ័ពជួរមុខ និងប្រជាពលករទើបបានវិលត្រឡប់មកពីប្រទេសថៃ នៅស្រុកកំពង់លែង កាលពីថ្ងៃទី៣ ខែកញ្ញា ឆ្នាំ២០២៥ ។

ឯកឧត្តម ស៊ុន សុវណ្ណារិទ្ធិ បានអំពាវនាវទៅកាន់ប្រជាពលរដ្ឋ កុំឲ្យចែកចាយព័ត៌មានដែលមិនច្បាស់លាស់ ព័ត៌មានញុះញង់បំបែកបំបាក់ផ្ទៃក្នុង ដែលបង្កើតឡើងដោយក្រុមទុច្ចរិត ហើយត្រូវតាមដានព័ត៌មាន ដែលផ្សាយចេញដោយផេកផ្លូវការ របស់រាជរដ្ឋាភិបាល ជាពិសេសត្រូវជឿជាក់លើការដឹកនាំ និងដោះស្រាយបញ្ហា ពីសំណាក់ថ្នាក់ដឹកនាំប្រទេស ដែលមានសម្តេច អគ្គមហាសេនាបតីតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត ជាប្រមុខដឹកនាំ ៕