បេក្ខជន​ប្រឡង​បាក់​ឌុប​ នៅ​ខេត្ត​កំពង់​ឆ្នាំង​ បាន​មក​ពិនិត្យ​មើល​ឈ្មោះ​និង​បួង​សួង​សុំ​សេចក្តី​សុខ​

កំពង់ឆ្នាំង ៖នៅព្រឹកថ្ងៃទី២៧ ខែសីហា ឆ្នាំ២០២៥ នេះ សិស្សានុសិស្សដែលជាបេក្ខជន ប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា​២០២៤,២០២៥ បាននាំគ្នាមកពិនិត្យមើលឈ្មោះ លេខបន្ទប់ លេខតុ នៅតាមមណ្ឌលប្រឡងនិមួយៗ ។ ជាមួយគ្នានេះពួកគេក៏បាននាំ​​យក​មកនូវគ្រឿងសក្ការបូជាមានទាន ធូប ផ្កាផ្ញី និងផ្លែឈើមកបន់ស្រន់ បួងសួង នៅតាមមណ្ឌលខ្លួនប្រឡង ដើម្បីសុំសេចក្តីសុខ និងប្រឡង​ជាប់គ្រប់ៗគ្នា ។

លោកសុឹម ប្រឹម ប្រធានមន្ទីរអប់រំ យុវជន និងកីឡា បានឲ្យដឹងថា ការប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា ឆ្នាំសិក្សា​២០២៤​ ២០២៥ នៅក្នុងខេត្តកំពង់ឆ្នាំង មានមណ្ឌលប្រឡងចំនួន៨ មណ្ឌល ស្មើនឹង ១៩៥បន្ទប់ បេក្ខជនដែលបានដាក់ពាក្យ មានចំនួន ៤ ៨៤៣នាក់ ក្នុងនោះស្រីចំនួន ២ ៨១៦ នាក់។

លោក ស៉ិម ប្រឹម បានបញ្ជាក់ថា ថ្នាក់វិទ្យាសាស្ត្រសង្គម មាន ៧មណ្ឌល គឺមណ្ឌលសាលាបឋមសិក្សាគំរូក្រុង,សាលាបឋមសិក្សាខ្សាមមា្សច័ន្ទលាភ,វិទ្យាល័យក្រុងកំពង់ឆ្នាំង,សាលាបឋមសិក្សាគិរីសុវណ្ណវង្ស,សាសាបឋមសិក្សាប៊ុនរ៉ានី ហ៊ុនសែន ព្រៃខ្មែរ,វិទ្យាល័យប៊ុនរ៉ានីហ៊ុនសែន​រលាប្អៀរ ( ខាងកើត ),និងវិទ្យាល័យប៊ុនរ៉ានី ហ៊ុនសែន រលាប្អៀរ ( ខាងលិច ) ។ មានបេក្ខជនចំនួន ៣ ៩០២នាក់ ស្រីចំនួន ២ ១៩១នាក់ ។

ថ្នាក់វិទ្យាសាស្ត្រ មាន១ មណ្ឌល គឺមណ្ឌលវិទ្យាល័យព្រះបាទសុរាម្រិត ក្រុងកំពង់ឆ្នាំង មានបេក្ខជន ចំនួន ៩៤១នាក់ ស្រី៦២៥នាក់ ៕