អ្នក​នាំ​ពាក្យ​ក្រសួង​ព័ត៌​មាន​ គូស​បញ្ជាក់​ថា​ អ្នក​សារ​ព័ត៌​មាន​ត្រូវ​បែង​ចែក​ឱ្យ​ច្បាស់​រវាង​ការ​ផ្ដល់​ព័ត៌​មាន​ និង​​ការ​បញ្ចេញ​មតិ​ផ្ទាល់​ខ្លួន​ និង​ត្រូវ​ស្គាល់​ពី​សិទ្ធិ​ និង​ករណី​យ​កិច្ចរ​បស់​ខ្លួន

អ្នកនាំពាក្យក្រសួងព័ត៌មាន បានគូសបញ្ជាក់ថា អ្នកសារព័ត៌មានទាំងអស់ ត្រូវបែងចែកឱ្យបានច្បាស់រវាងការផ្ដល់ព័ត៌មាន និងការបញ្ចេញមតិផ្ទាល់ខ្លួន និងត្រូវស្គាល់ពីសិទ្ធិ និងករណីយកិច្ចរបស់ខ្លួនឱ្យច្បាស់ ដើម្បីកុំឱ្យមានការភាន់ច្រឡំ និងចៀសផុតពីបញ្ហាប្រឈមផ្លូវច្បាប់ ។

ក្នុងពិធីសំណេះសំណាលជាមួយនឹងមន្ត្រីមន្ទីរព័ត៌មានខេត្ត និងក្រុមការងារព័ត៌មាន និងសាធារណមតិ នាថ្ងៃទី២២ ខែសីហា ឆ្នាំ២០២៥ នៅសាលប្រជុំមន្ទីរព័ត៌មានខេត្តសៀមរាប ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានមានប្រសាសន៍ថា ដោយអ្នកសារព័ត៌មានត្រូវរាយការណ៍ ព័ត៌មានរបស់ខ្លួនដោយ ផ្សារភ្ជាប់ជាមួយសិទ្ធិ កាតព្វកិច្ច និងការទទួលខុសត្រូវសង្គម ផ្នែកវិជ្ជាជីវៈ និងផ្លូវច្បាប់។

ឯកឧត្តម អ្នកនាំពាក្យបានបញ្ជាក់ថា អ្នកសារព័ត៌មានមានសិទ្ធិចុះយកព័ត៌មានស្វែងរកប្រភពព័ត៌មាននានាដោយសេរី។  ប៉ុន្តែក៏ត្រូវមានកាតព្វកិច្ចគោរពសិទ្ធិបុគ្គល និងគោលការណ៍ច្បាប់ជាធរមានផងដែរ ។  ក្រៅពីនេះ អ្នកសារព័ត៌មាន មិនត្រូវផ្សព្វផ្សាយព័ត៌មាន ដែលបង្កមហន្តរាយដល់សណ្ដាប់ធ្នាប់សាធារណៈ ប៉ះពាល់ដល់ស្ថិរភាពក្នុងសង្គម និងសន្តិសុខជាតិឡើយ។ 

ឯកឧត្តម អ្នកនាំពាក្យក្រសួងព័ត៌មាន បានលើកឡើងថា អ្នកសារព័ត៌មានត្រូវបែងចែកឱ្យច្បាស់រវាងការផ្ដល់ព័ត៌មាន និងការបញ្ចេញមតិផ្ទាល់ខ្លួន ព្រមទាំងធានារាល់ការបញ្ចេញមតិ ឬការរិះគន់ ត្រូវធ្វើឡើងដោយភាពថ្លៃថ្នូរ និងគោរពសិទ្ធិអ្នកដទៃ។  ជាងនេះទៀត អ្នកសារព័ត៌មាន ត្រូវមានកាតព្វកិច្ចរាយការណ៍ព័ត៌មាន ដោយមានប្រភពច្បាស់លាស់ ត្រូវផ្ទៀងផ្ទាត់ព័ត៌មាន និងចូលរួមប្រឆាំងដំណឹងក្លែងក្លាយ ព័ត៌មានក្លែងបន្លំ ព័ត៌មានបំភ្លៃ និងព័ត៌មានភាន់ច្រឡំ ។

ឯកឧត្តម ទេព អស្នារិទ្ធ  ក៏បានបញ្ជាក់បន្ថែមថា នៅពេលអ្នកសារព័ត៌មាន បានផ្សាយប្រាសចាកការពិត ក្រមសីលធម៌វិជ្ជាជីវៈ បំពានសិទ្ធិ និងករណី​យកិច្ចរបស់ខ្លួនជាអ្នកសារព័ត៌មាន ហើយក្រសួងតែងតែធ្វើការណែនាំ និងតម្រង់ទិស ដើម្បីឱ្យអនុវត្តន៍ដោយគោរពតាមនិយាមវិជ្ជាជីវៈ និងក្រមសីលធម៌វិញ។ ឯកឧត្ដម បានឱ្យដឹងទៀតថា បើនៅតែបន្តសកម្មភាពបំពានលើវិជ្ជាជីវៈ និងក្រមសីលធម៌ធ្ងន់ធ្ងរ ក្រសួងនឹងឈានទៅសម្រេច​លុប​អាជ្ញា​បណ្ណ ដែលទាំងនេះជាការអនុវត្តនីតិវិធីក្នុងក្របខ័ណ្ឌច្បាប់ និងដោយអនុលោមតាមច្បាប់ស្តីពី​របប​សារព័ត៌មាន។ 

ជាមួយគ្នានេះដែរ ឯកឧត្តម អនុរដ្ឋលេខាធិការ និងជាអ្នកនាំពាក្យក្រសួងព័ត៌មានក៏បានអំពាវនាវដល់អ្នកសារព័ត៌មានអាជីព និងមិនមែនអាជីព ត្រូវមានទំនួលខុសត្រូវខ្ពស់ ពេលផ្សព្វផ្សាយព័ត៌មានរបស់ខ្លួន ដើម្បីចូលរួមក្នុងការធានាសណ្តាប់ធ្នាប់ ស្ថិរភាព និងសន្តិសុខសង្គម ដោយចៀសវាងការបំផ្លើស បំភ្លៃ ឬការកាឡៃព័ត៌មានប្រាសចាកពីការពិត និងជានិច្ចកាលត្រូវផ្ទៀងផ្ទាត់ព័ត៌មានជាមួយប្រភពព័ត៌មានផ្លូវការ និងមានសំឡេងអ្នកពាក់ព័ន្ធក្នុងសាច់រឿង ដើម្បីធានាគុណភាព និងតុល្យភាពព័ត៌មាន៕