រដ្ឋបាល​ខេត្ត​កំពង់​ឆ្នាំង​ប្រារព្ធ​ពិធី​បួង​សួង​សុំ​សេច​ក្តី​សុខ​ជូន​ដល់​វិរ​កងទ័ព​ និង​ជន​ភៀស​សឹក​ដោយ​សារ​សង្គ្រាម​​

កំពង់ឆ្នាំង ៖ រដ្ឋបាលខេត្តកំពង់ឆ្នាំង នារសៀលថ្ងៃទី៤ ខែសីហា ឆ្នាំ២០២៥នេះ បានប្រារព្ធពិធីគោរពវិញ្ញាណក្ខន្ធវិរកងទ័ពដែលបានពលី ក្នុងបុព្វហេតុការពារបូរណភាពទឹកដី និងប្រជាជន និងពិធីបួងសួងសុំសេចក្តីសុខ ជូនដល់វិរកងទ័ពកំពុងឈរជើងការពារទឹកដីដ៏អង់អាចក្លាហាន និងបងប្អូនជនភៀសសឹកដោយសារសង្គ្រាម ។

ពិធីនេះប្រារព្វធ្វើនៅ អសនៈលោកតាដំបងដែក ស្ថិតក្នុងបរិវេណសាលាខេត្ត ក្រោមអធិបតីភាព ឯកឧត្តម ស៊ុន សុវណ្ណារិទ្ធិ អភិបាលខេត្ត និងលោកជំទាវ និងឯកឧត្តម ស៊ីវ រុន ប្រធានក្រុមប្រឹក្សា ខេត្តកំពង់ឆ្នាំង ។

នៅក្នុងពិធីនោះ ឯកឧត្តម ស៊ុន សុវណ្ណារិទ្ធិ អភិបាល ខេត្តកំពង់ឆ្នាំង និងលោកជំទាវ បានបួងសួងដល់វត្ថុស័ក្តិសិទ្ធិទាំងឡាយក្នុងលោក សូមតាមជួយបីបាច់ថែរក្សាវីរកងទ័ព បងប្អូនជនភៀសសឹក និងប្រជាពលរដ្ឋទូទាំងប្រទេស សូមទទួលបានជោគជ័យ មានសុខភាពល្អ ចៀសឆ្ងាយពីជំងឺដង្កាត់ទាំងពួង ទទួលបានសុខសុវត្ថិភាពជានិច្ចនិរន្តរ៍ និងសមប្រកបដោយពុទ្ធពរទាំង៤ប្រការ គឺអាយុ វណ្ណៈ សុខៈ និងពលៈកុំបីឃ្លៀងឃ្លាតឡើយ ។

ឯកឧត្តម អភិបាលខេត្ត កំពង់ឆ្នាំង និងលោកជំទាវ បានគោរពដឹងគុណ និងចងចាំជានិច្ចនូវវិរភាពដ៏អង់អាចក្លាហានរបស់វិរកងទ័ព និងឧទ្ទិសបួងសួងដល់ដួងវិញ្ញាណក្ខន្ធវិរកងទ័ព ដែលបានពលីក្នុងសមរភូមិមុខ សូមបានទៅកាន់សុខគតិភពកុំបីឃ្លៀងឃ្លាតឡើយ ៕