ឯកឧត្តម​ ស៊ុន​ សុវណ្ណា​រិទ្ធិ​ អភិបាល​ខេត្ត​កំពង់​ឆ្នាំង​ និង​លោក​ជំទាវ​ នាំ​យក​គ្រឿង​ឧប​ភោគ​បរិភោគ​ទៅ​ជូន​ដល់​កង​កម្លាំង​ជួរ​មុខ​ និង​ជន​ភៀស​សឹក​ ខេត្ត​ព្រះ​វិហារ​

កំពង់ឆ្នាំង ៖ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងលោកជំទាវ ឯកឧត្តម ស៊ីវ រុន ប្រធានក្រុមប្រឹក្សាខេត្ត នាព្រឹកថ្ងៃទី២ ខែសីហា ឆ្នាំ២០២៥នេះបានដឹកនាំប្រតិភូអញ្ជើញសាកសួរសុខទុក្ខ និងនាំយកគ្រឿងឧបភោគបរិភោគ ជូនដល់កងកម្លាំងជួរមុខ និងជនភៀសសឹក ស្ថិតនៅវត្តពោធិប្រាំពាន់ដើម ក្នុងឃុំគូលែនត្បូង ស្រុកគូលែន ខេត្តព្រះវិហារ ។

នៅក្នុងឳកាសនោះ ឯកឧត្តម ស៊ុន សុវណ្ណារិទ្ធិអភិបាលខេត្តកំពង់ឆ្នាំង បានមានប្រសាសន៍ថាដើម្បីចូលរួមជាមួយរាជរដ្ឋាភិបាល ក្នុការរំលែកទុក្ខលំបាករបស់វិរៈយុទ្ធជន នៅសមរភូមិមុខ និងប្រជាពលរដ្ឋរងគ្រោះ ដោយសារសង្គ្រាម ឈ្លានពានពីសំណាក់កងទ័ពថៃ រដ្ឋបាលខេត្តកំពងឆ្នាំង បានចុះសួរសុខទុក្ខ និងនាំយកគ្រឿងឧបភោគបរិភោគ ព្រមទាំងសម្ភារៈប្រើប្រាស់ ទៅជូនជាបន្តបន្ទាប់ នៅគ្រប់សមរភូមិ ក្នុងខេត្តព្រះវិហារ និងខេត្តឧត្តរមានជ័យ ។

ឯកឧត្តម អភិបាលខេត្តកំពង់ឆ្នាំង បានសម្ដែងនូវការគោរព កោតសរសើរ និងថ្លែងអំណរគុណយ៉ាងជ្រាលជ្រៅដល់វីរយុទ្ធជនទាំងអស់ ចំពោះវីរភាពអង់អាចក្លាហាន ការលះបង់សាច់ស្រស់ ឈាមស្រស់ និងការខិតខំតស៊ូយ៉ាងស្វិតស្វាញ ដើម្បីការពារបូរភាពទឹកដីកម្ពុជា ពីការឈ្លានពានខុសច្បាប់ពីកងទ័ពថៃ ដែលឆ្លុះបញ្ចាំងឱ្យឃើញច្បាស់ពីគំរូវីរភាពដ៏អស្ចារ្យមិនអាចប្រៀបផ្ទឹមបានរបស់វីរៈកងទ័ពកម្ពុជាទាំងអស់ ធ្វើឱ្យប្រជាពលរដ្ឋកាន់តែគោរពស្រឡាញ់ ៕