ឯកឧត្តម​ ស៊ុន​ សុវណ្ណា​រិទ្ធិ​ ណែ​នាំ​ឲ្យ​អាជ្ញា​ធរ ​សមត្ថកិច្ច​ និង​មន្ទីរ​ពាក់ព័ន្ធ ​រួម​គ្នា​អនុវត្ត​បទ​បញ្ជា​សម្តេច​ធិប​តី​ នាយករដ្ឋមន្ត្រី ​

កំពង់ឆ្នាំង៖ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងជាប្រធានគណៈបញ្ជាការឯកភាពរដ្ឋបាលខេត្ត និងឯកឧត្តម ស៊ីវ រុន ប្រធានក្រុមប្រឹក្សាខេត្ត នារសៀលថ្ងៃទី១៧ ខែកក្កដា ឆ្នាំ២០២៥ នេះបានដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត ដើម្បីផ្សព្វផ្សាយបទបញ្ជាដ៏ខ្ពង់ខ្ពស់ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ស្តីពីយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា ( Online Scams ) ។

នៅក្នុងកិច្ចប្រជុំនេះ ឯកឧត្តម ស៊ុន សុវណ្ណារិទ្ធិ បានណែនាំយ៉ាងម៉ឺងម៉ាត់ ដល់អាជ្ញាធរមូលដ្ឋានក្រុងស្រុក ឃុំសង្កាត់ កម្លាំងសមត្ថកិច្ចគ្រប់លំដាប់ថ្នាក់និងមន្ទីរអង្គភាពទាំងអស់ ត្រូវរួមគ្នាអនុវត្តយុទ្ធនាការបោសសម្អាត ការឆបោកតាមប្រព័ន្ធបច្ចេកវិទ្យា ទប់ស្កាត់មិនឱ្យកើតមានទីតាំងប្រើប្រាស់ ដើម្បីធ្វើការឆបោកតាមប្រព័ន្ធបច្ចេកវិទ្យា ក្នុងភូមិសាស្ត្រខេត្តជាដាច់ខាត សំដៅចូលរួមចំណែកថែរក្សា ការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម។