កំពង់ឆ្នាំង ៖ឯកឧត្តម ឆាយ ឫទ្ធិសែន រដ្ឋមន្ដ្រីក្រសួងអភិវឌ្ឍន៍ជនបទ និងឯកឧត្តម ហួត ហាក់ រដ្ឋមន្ដ្រីក្រសួងទេសចរណ៍ កាលពីថ្ងៃទី៣០ ខែមិថុនា ឆ្នាំ២០២៥ បានអញ្ជើញចុះពិនិត្យសមិទ្ធផលនានា និងស្ថានភាពលក់ដូររបស់ប្រជាសហគមន៍ នៅក្នុងសហគមន៍ទេសចរណ៍ទឹកធ្លាក់ថ្មក្រាល ស្ថិតក្នុងឃុំជៀប ស្រុកទឹកផុស ខេត្តកំពង់ឆ្នាំង។
ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានឲ្យដឹងថា នៅក្នុងសហគមន៍អេកូទេសចរណ៍ទឹកធ្លាក់ថ្មក្រាល ក្រសួងអភិវឌ្ឍន៍ជនបទ បានសហការជាមួយក្រសួងបរិស្ថាន សាងសង់ប្រព័ន្ធផ្គត់ផ្គង់ទឹកស្អាតសហគមន៍ផ្នែកខាងលើខ្សែទឹក រួមមាន អាងប្រព្រឹត្តិកម្មទឹកស្អាត ១៥ម៉ែត្រគូប/ម៉ោង អាងស្ដុកទឹក ៤០ម៉ែត្រគូប និងបំពង់ទឹកសម្រាប់តទៅតំបន់ទេសចរណ៍ចំនួន ២ទីតាំង និងបានសាងសង់បង្គន់សាធារណៈបរិយាបន្ន ១ខ្នង មានចំនួន ៥បន្ទប់ផងដែរ ។
សូមបញ្ជាក់ថា តំបន់ទេសចរណ៍ទឹកធ្លាក់ថ្មក្រាល ស្ថិតក្នុងភូមិកោះខ្ទុម្ព ឃុំជៀប ស្រុកទឹកផុស ខេត្តកំពង់ឆ្នាំង មានចម្ងាយ២៨គីឡូម៉ែត្រ ពីទីរួមស្រុកទឹកផុស និងប្រមាណជា៥០គីឡូម៉ែត្រ ពីទីរួមខេត្តកំពង់ឆ្នាំង ៕
