Tuesday, July 22, 2025
Tuesday, July 22, 2025
Tuesday, July 22, 2025

ផ្លូវ​ភ្ជាប់​ទៅ​កាន់​រមណីយ​ដ្ឋាន​ធម្មជាតិ​ចំនួន​៣ ក្នុង​ស្រុក​ទឹក​ផុស​បើក​ការ​ដ្ឋាន​ស្ថាប​នា​ ដោយ​ក្រាល​កៅ​ស៊ូ​ និង​​បេ​តុង​​

by Sorn Kunnivoth
19 ចំនួនអ្នកទស្សនា

កំពង់ឆ្នាំង ៖ផ្លូវលំគ្រួសក្រហម៣ខ្សែប្រវែងជាង ៤១គីឡូម៉ែត្រ តភ្ជាប់ទៅកាន់រមណីយដ្ឋានធម្មជាតិ ចំនួន៣ ក្នុងស្រុកទឹកផុស ខេត្តកំពង់ឆ្នាំង ត្រូវបាន​បើកការដ្ឋានស្ថាបនា ហើយ ដោយក្រាលកៅស៊ូប្រភេទ DBST និងក្រាលបេតុង ។ពិធីបើកការដ្ឋានស្ថាបនាផ្លូវ ទាំង៣ខ្សែនេះ ធ្វើឡើងនាព្រឹកថ្ងៃទី៣០ ខែមិថុនា ឆ្នាំ២០២៥នេះ ក្រោមអធិបតីភាព ឯកឧត្តម ឆាយ ឬទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ។ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានឲ្យដឹងថា ផ្លូវទាំង៣ខ្សែនេះមានប្រវែងសរុប ចំនួន ៤១,១០ គីឡូម៉ែត្រ ក្នុងក្របខ័ណ្គម្រោងនិរន្តរភាពតំបន់ទេសភាព និងទេសចរណ៍ធម្មជាតិនៅកម្ពុជា( CSLEP ) ដើម្បីតភ្ជាប់ទៅកាន់តំបន់រមណីយដ្ឋានធម្មជាតិ ទឹកធ្លាក់ថ្មក្រាល ទឹកធ្លាក់អន្លង់ស្វាយ និងទឹកធ្លាក់ស្រែអំពិល ក្នុងស្រុកទឹកផុស ។

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានថ្លែងថា ហេដ្ឋារចនាសម្ព័ន្ធរូបវន្តមានសារៈសំខាន់បំផុត ក្នុងការជួយសម្រួលដល់ការធ្វើដំណើររបស់ប្រជាពលរដ្ឋ ការដឹកជញ្ជូនកសិផលទៅកាន់ទីផ្សារ និងជួយជម្រុញកំណើនភ្ញៀវទេសចរណ៍ កាន់តែច្រើនឡើងបន្ថែមទៀត ។

ឯកឧត្តម ឆាយ ឬទ្ធិសែន រដ្ឋមន្ត្រីក្រសួងអភិវឌ្ឍន៍ បានថ្លែងដោយគូសបញ្ជាក់ថា ក្រសួងអភិវឌ្ឍន៍ជនបទ បានដាក់ចេញនូវគោលនយោបាយអភិវឌ្ឍន៍ជនបទ ដែលមានចក្ខុវិស័យ «កសាងសង្គមជនបទកម្ពុជាឱ្យមានវិបុលភាព ប្រកបដោយបរិយាបន្ន និងចីរភាព» ក្នុងគោលបំណងប្រែក្លាយតំបន់ជនបទនៃប្រទេសកម្ពុជា ឱ្យក្លាយទៅជាតំបន់អភិវឌ្ឍរីកចម្រើន និងមាននិរន្តរភាព តាមរយៈយុទ្ធសាស្ដ្រចំនួន ៥របស់ក្រសួង។

ក្នុងនោះក្រសួង បាននិងកំពុងយកចិត្តទុកដាក់លើការលើកកម្រិតគុណភាពហេដ្ឋារចនាសម្ព័ន្ធ និងគមនាគមន៍ជនបទពីផ្លូវក្រាលដីស និងផ្លូវល្បាយក្រួសទៅជាផ្លូវក្រាលកៅស៊ូពីរជាន់ ឬផ្លូវបេតុងប្រកបដោយភាពធន់ ដើម្បីបង្កើនការតភ្ជាប់ និងជំរុញកំណើនសេដ្ឋកិច្ចក្នុងតំបន់ ដូចពាក្យស្លោក «មានផ្លូវគឺមានក្តីសង្ឃឹម»។

ឯកឧត្តម រដ្ឋមន្ត្រី បានប្តេជ្ញាចិត្តបង្កើនកិច្ចសហការ ជាមួយរដ្ឋមន្ត្រីក្រសួងទេសចរណ៍ ក្នុងការចូលរួមតភ្ជាប់ និងលើកកម្រិតផ្លូវជនបទទៅដល់តំបន់គោលដៅទេសចរណ៍ ដើម្បីចូលរួមលើកស្ទួយវិស័យទេសចរណ៍ឱ្យក្លាយជាឆ្អឹងខ្នងនៃសេដ្ឋកិច្ចជាតិ ៕

អត្ថបទពាក់ព័ន្ធ

© រក្សា​សិទ្ធិ​ មន្ទីរព័ត៌មានខេត្តកំពង់ឆ្នាំង ឆ្នាំ​២០២៥
អាស័យដ្ឋាន​ សង្កាត់​ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង
អំពីយើង
មន្ទីរព័ត៌មានខេត្តកំពង់ឆ្នាំង ផ្តោតសំខាន់លើ ព័ត៌មាន ផ្តល់ចំណេះដឹង និងផ្តល់ការកម្សាន្តរីករាយដល់ប្រជាជនទាំងអស់គ្នា ។
ជួបគ្នានៅបណ្តាញសង្គម
© រក្សា​សិទ្ធិ​ មន្ទីរព័ត៌មានខេត្តកំពង់ឆ្នាំង ឆ្នាំ​២០២៥