ក្រសួង​ប្រៃស​ណីយ៍​ និង​ទូរ​គមនា​គមន៍​ អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន​ និងអា​ជ្ញា​​ធរ​ខេត្ត​កំពង់​ឆ្នាំង​ រួមគ្នា​បង្ការ​ហានិ​ភ័យ​គ្រឿង​​ញៀន​ អេដស៍​ ក្នុង​វិស័យ​ប្រៃសណីយ៍​ និង​បច្ចេក​វិទ្យា​ឌី​ជី​ថល

កំពង់ឆ្នាំង ៖ក្រសួងប្រៃសណីយ៍ និងទូរគមនាគមន៍ អាជ្ញាធរជាតិប្រយុទ្ធប្រឆាំងគ្រឿងញៀន និងអាជ្ញាធរខេត្តកំពង់ឆ្នាំងរួមគ្នាបង្ការ​ហារនិភ័យគ្រឿងញៀន និងជំងឺអេដស៍ក្នុងវិស័យប្រៃសណីយ៍ និងបច្ចេកវិទ្យាឌីជីថល តាមរយះសិក្ខាសាលាមួយស្តីពីការចូលរួមបញ្ចប់ជំងឺអេដស៍ និងការទប់ស្កាត់ ការចរាចរ ការជួញដូរ ការប្រើប្រាស់គ្រឿងញៀន ក្នុងវិស័យប្រៃសណីយ៍ និងបច្ចេកវិទ្យាឌីជីថល ។

សិក្ខាសាលានេះប្រព្រឹត្តទៅក្រោមអធិបតីភាព ឯកឧត្តម ខាយ ឃុនហេង រដ្ឋលេខាធិការក្រសួងប្រៃសណីយ៍ និងទូរគមនាគមន៍ និងលោក យ៉ង ភិរម្យ អភិបាលរងខេត្តកំពង់ឆ្នាំង នៅថ្ងៃទី២៣ ខែមិថុនា ឆ្នាំ២០២៥ ។

លោកជំទាវ ទេព រ៉ូដា អនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ បានឲ្យដឹងថា សិក្ខាសាលានេះមានការចូលរួមពីមន្ត្រីរាជការ និងសាខាប្រតិបត្តិករប្រៃសណីយ៍ និងទូរគមនាគមន៍ មកពីបណ្តារាជធានី ខេត្ត ចំនួនជាងមួយរយនាក់ ។

លោកជំទាវ អនុរដ្ឋលេខាធិការ បានលើកយក ករណីលួចលាក់ដឹកជញ្ជូនគ្រឿងញៀនតាមបញ្ញើតប្រៃសណីយ៍ ហើយត្រូវបានអាជ្ញាធរបង្ក្រាបបាន និងសារៈសំខាន់នៃការអប់រំផ្សព្វផ្សាយ ដើម្បីបង្កើនការយល់ដឹងដល់មន្ត្រីរាជការ និងប្រតិបត្តិករប្រៃសណីយ៍ ពីហានិភ័យ ផលប៉ះពាល់ និងគ្រោះថ្នាក់នៃគ្រឿងញៀន ដល់ស្ថាបន្ត និងសង្គម ។

លោកយ៉ង ភារម្យ អភិបាលរងខេត្តកំពង់ឆ្នាំង បានមានប្រសាសន៍ ដោយលើកឡើងថា ការងារបង្ការ ទប់ស្កាត់ និងបង្ក្រាបគ្រឿងញៀន ជាការងារមានសារៈសំខាន់ ដែលគ្រប់សមាសភាពត្រូវយកចិត្តទុកដាក់ ដើម្បីការពារសុវត្តិភាពសង្គម និងសុខមាលភាព ប្រជាពលរដ្ឋ ។

ឯកឧត្តម ខាយ ឃុនហេង រដ្ឋលេខាធិការក្រសួងប្រៃសណី និងទូរគមនាគមន៍ បានថ្លែងអំណរគុណដល់គ្រប់ភាគីពាក់ព័ន្ធទាំងអស់ និងបានជម្រុញដល់សិក្ខាកាម ត្រូវខិតខំប្រឹងប្រែងយកចិត្តទុកដាក់ក្រេបជញ្ជក់ចំណេះដឹងដែលផ្តល់ដោយវាគ្មិន នៃសិក្ខាសាលានេះ ។ ហើយត្រូវជួយជម្រុញឲ្យអ្នកចូលរួម​ទាញ​យក និងប្រើប្រាស់កម្មវិធីទូរស័ព្ទ ( No Drug )សម្រាប់រាយការណ៍រាល់បញ្ហាគ្រឿងញៀន ក្នុងសហគមន៍ ដើម្បីទទួលបានការដោះស្រាយ បានទាន់ពេលវេលា ៕