មេ​បញ្ជាការ​ ណែ​នាំ​ដល់​ទាហាន​ទាំង​អស់​ ត្រូវ​ត្រៀម​ខ្លួន​ និង​បំពាក់​គ្រឿង​មធ្យោ​​បាយ​នានា​ រង​ចាំ​បទ​បញ្ជា​ការ​ពារ​បូរណ​ភាព​ទឹក​ដី​

កំពង់ឆ្នាំង ៖លោក ឧត្តមសេនីយ៍ត្រី អ៊ុ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង នៅថ្ងៃទី១៩ ខែមិថុនា ឆ្នាំ២០២៥ បានណែនាំដល់ នាយទាហាន នាយទាហានរង និង ពលទាហាន ទាំងអស់ ត្រូវត្រៀមខ្លួនជាស្រេច រួមជាមួយគ្រឿងបំពាក់ មធ្យោបាយនានា នៅពេលមានបទបញ្ជារបស់ប្រមុខរាជរដ្ឋាភិបាល និងថ្នាក់ដឹកនាំគ្រប់លំដាប់ថ្នាក់ នៃកងយោធពលខេមរភូមិន្ទ ក្នុងកិច្ចការពារបូរណភាពទឹកដី។

ចំពោះមុខនាយទាហាន នាយទាហានរង និង ពលទាហាន ជាច្រើនរូប លោក ឧត្តមសេនីយ៍ត្រី បានផ្សព្វផ្សាយសភាពការណ៍ថ្មីៗ ដែលកើតមានឡើងទាំងអន្តរជាតិនៅក្នុងតំបន់ និងបញ្ហាដែលកើតមានឡើងថ្មីៗនៅតាមខ្សែបន្ទាត់ព្រំដែន កម្ពុជា-ថៃ ដូចជាសភាពការណ៍អន្តរជាតិដែលកំពុងកើតមានឡើង ដូចជាសង្គ្រាម អ៊ីស្រាអែល និងអ៉ីរ៉ង់ ដែលបានសម្លាប់ជីវិតមនុស្ស និងបំផ្លាញហេដ្ឋារចនាសម្ព័ន្ធប្រទេសទាំង២យ៉ាងធ្ងន់ធ្ងរ ។ សភាពការណ៍នៅតាមខ្សែបន្ទាត់ព្រំដែន ជាពិសេសតំបន់៤រួមមាន តំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី រួមទាំងការប្ដឹងរបស់រាជរដ្ឋា​ភិ​បាល​​កម្ពុជាទៅតុលាការយុត្តិធម៌អន្តរជាតិ ( អាយស៊ីជេ ICJ ) នៅទីក្រុងឡាអេ កាលពីថ្ងៃទី១៥ ខែមិថុនា ឆ្នាំ២០២៥នេះ ។

លោក មេបញ្ជាការបានសង្កត់ធ្ងន់ថា កងទ័ពត្រូវគោរពឲ្យបានដាច់ខាតនូវវិន័យ របស់កងយោធពលខេមរភូមិន្ទ បទបញ្ជា សារាចរ សេចក្តីណែនាំរបស់ថ្នាក់លើ ក្រឹត្យច្បាប់របស់រដ្ឋ ត្រូវមានសីលធម៌ល្អ អត្តចរិកស្លូតបូត សុភាពរាបសារ ម៉ឹងម៉ាត់សាកសមជាកងយោធពលខេមរភូមិន្ទ និងជាអ្នកបន្តវេនដ៏ល្អ។ ត្រូវយកចិត្តទុកដាក់ក្នុងការពង្រឹងពង្រីកស្មារតី និងឧត្តមគតិស្នេហាជាតិ ហើយគាំទ្រយ៉ាងពេញទំហឹង នូវអនុសាសន៍ដ៏ខ្ពង់ខ្ពស់របស់ សម្ដេចតេជោ ហ៊ុន សែន ប្រធានព្រឹទ្ធសភា សម្តេចបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ក្នុងការប្ដេជ្ញាការពារឯករាជ្យ អធិបតេយ្យជាតិ បូរណភាពទឹកដី មិនឲ្យបរទេសណាមើលងាយ ឬ ឈ្លានពានបានឡើយ ៕