ឯក​ឧត្តម​ បណ្ឌិត​សភាចារ្យ ​អ៊ុក ​រ៉ាប៊ុន​ អញ្ជើញ​បំពាក់​កន្សែង​ដល់យុវជន​កាក​បាទ​ក្រហម​កម្ពុជា​ ក្នុង​ស្រុករលាប្អៀរ​

កំពង់ឆ្នាំង ៖ ឯកឧត្តម បណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ប្រធានក្រុមការងាររាជរដ្ឋាភិបាលចុះមូលដ្ឋាន ខេត្តកំពង់ឆ្នាំង នាព្រឹកថ្ងៃទី១៣ ខែមិថុនា ឆ្នាំ២០២៥នេះ បានអញ្ជើញជាអធិបតី ក្នុងពិធីបំពាក់កន្សែងដល់យុវជនកាកបាទក្រហម ចំនួន១០០នាក់ មកពីវិទ្យាល័យចំនួន៤ ក្នុងស្រុករលាប្អៀរ ។

អញ្ជើញចូលរួមក្នុងពិធីនេះផងដែរមាន ឯកឧត្តម ស៊ុន សុវណ្ណារិទ្ធិ ជាអភិបាលខេត្តឯកឧត្តម ស៊ីវ រុន ប្រធានក្រុមប្រឹក្សាខេត្ត និងលោក ជំទាវកែ ច័ន្ទមុនី អ្នកតំណាងរាស្ត្រមណ្ឌល ខេត្តកំពង់ឆ្នាំង ។

នៅក្នុងពិធីនោះ ឯកឧត្តម បណ្ឌិតសភាចារ្យ អ៊ុក រ៉ាប៊ុន បានថ្លែងថា យុវជនកាកបាទក្រហមកម្ពុជា គឺជាអ្នកស្ម័គ្រចិត្តវ័យក្មេង និងជាសមាសភាគមួយ នៃបណ្តាញអ្នកស្ម័គ្រចិត្តកាកបាទក្រហម ដែលជាកម្លាំងស្នូលដ៏មានសារៈសំខាន់ និងជាកម្លាំងសកម្មជួរមុខ ក្នុងប្រតិបត្តិការមនុស្សធម៌ នៅក្នុងគ្រប់កាលៈទេសៈ ។

ឯកឧត្តម បណ្ឌិតសភាចារ្យ បានផ្តាំផ្ញើដល់យុវជនកាកបាទក្រហមទាំងអស់ ត្រូវបន្តខិតខំរៀនសូត្រ ដើម្បីពង្រឹង និងពង្រីកចំណេះដឹងរបស់ខ្លួន ឲ្យកាន់តែប្រសើរឡើងបន្ថែមទៀត ស្របតាមស្ថានភាពរីកចម្រើនរបស់ប្រទេសជាតិ ។ជាមួយគ្នានេះត្រូវបន្តធ្វើសកម្មភាពទាំងឡាយណាដែលផ្តល់ផលប្រយោជន៍ដល់សង្គមជាតិ ដោយធ្វើខ្លួនជាកូនល្អ សិស្សល្អ និងពលរដ្ឋល្អ ៕