ស៊ីម៉ាក់​កំពុង​យក​ចិត្ត​ទុកដាក់​លើ​ការ​ពង្រឹង​សមត្ថភាព​និតិ​វិធី​ ក្នុង​ការហ្វឹកហ្វឺន​

កំពង់ឆ្នាំង ៖នៅវិទ្យាស្ថានបច្ចេកទេសសកម្មភាពកំចាត់មីន ដែលមានទីតាំងស្ថិតក្នុងខេត្តកំពង់ឆ្នាំង កាលពីរសៀលថ្ងៃទី១៣ ខែមិថុនា ឆ្នាំ២០២៥នេះ បានធ្វើពិធីបិទសិក្ខាសាលា ស្តីពីការពង្រឹងសមត្ថភាពនិតិវិធីហ្វឹកហ្វឺន ការគ្រប់គ្រង និងផ្លាស់ប្តូរបទពិសោធន៍គ្រូជំនាញបច្ចេកទេសសកម្មភាពមីន សំដៅពង្រឹងសមត្ថភាពគ្រូ សម្រាប់ផ្តល់ការហ្វឹកហ្វឺន ប្រកបដោយវិជ្ជាជីវៈ ទាំងក្នុងប្រទេស និងអន្តរជាតិ ។

ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក នៃមជ្ឈមណ្ឌលសកម្មភាពកំចាត់មីនកម្ពុជា បានមានប្រសាសន៍បញ្ជាក់ថា វិទ្យាស្ថានបច្ចេកទេសសកម្មភាពកំចាត់មីន របស់អង្គភាពស៊ីម៉ាក់ បាននឹងកំពុងដើរតួនាទីយ៉ាងសំខាន់ ក្នុងការហ្វឹកហ្វឺនជំនាញបច្ចេកទេស និងចែករំលែកចំណេះដឹង ក៏ដូចជាបទពិសោធន៍ ក្នុងវិស័យសកម្មភាពមីន និងសំណល់យុទ្ធភ័ណ្ឌសង្គ្រាម ទាំងក្នុងក្របខណ្ឌជាតិ និងអន្តរជាតិ ពិសេសបណ្តាប្រទេសដែលទទួលរងផលប៉ះពាល់ ដោយសារគ្រប់មីន និងសំណស់យុទ្ធភ័ណ្ឌសង្គ្រាម ។

ឯកឧត្តម ហេង រតនា បានបញ្ជាក់ទៀតថា ការពង្រឹងសមត្ថភាព អង្គភាពស៊ីម៉ាក់ត្រូវឈរលើគោលការណ៍៤សំខាន់ ៖១,ពង្រឹងសមត្ថភាពធនធានមនុស្ស ២,ពង្រឹងសមត្ថភាពសម្ភារៈបច្ចេកទេស ៣,ពង្រឹងនិតិវិធីបទដ្ឋានការងារ និង៤,ពង្រឹងការគ្រប់គ្រងតាមបច្ចេកវិទ្យា AI៕