កំពង់ឆ្នាំង ៖មជ្ឈមណ្ឌលសកម្មភាពកំចាត់មីនកម្ពិជា ( ស៊ីម៉ាក់ ) បានប្រគល់សុនខជំនាញហិតក្លិនរកគ្រឿងញៀន ចំនួន១០ក្បាល ជូនដល់អគ្គស្នងការដ្ឋាននគរបាលជាតិ ក្រោយពីបញ្ចប់វគ្គហ្វឹកហ្វឺនមូលដ្ឋានគ្រឹះ និងអ្នកឯកទេសបញ្ជាសុនខ ប្រតិបត្តិការហិតគ្រឿងញៀន ។
ពិធីបិទវគ្គហ្វឹកហ្វឺន និងប្រគល់សុនខ ចំនួន១០ក្បាលនេះ ធ្វើឡើងនាព្រឹកថ្ងៃទី១១ ខែមិថុនា ឆ្នាំ២០២៥ នៅវិទ្យាស្ថានបច្ចេកទេសសកម្មភាពកំចាត់មីន ដែលមានទីតាំង ស្ថិតក្នុងខេត្តកំពង់ឆ្នាំង ។
ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុក ជាអគ្គនាយកមជ្ឈឦណ្ឌលសកម្មភាពកំចាត់មីនកម្ពុជា បានថ្លែងឲ្យដឹងថា កម្លាំងនគរបាលជាតិដែលជាអ្នកជំនាញកាន់សុនខ ចំនួន២០រូប និងសុនខ ចំនួន១០ក្បាល បានបញ្ចប់វគ្គហ្វឹកហ្វឺនជំនាន់ទី១ ប្រកបដោយជោគជ័យ ។ នេះជាកិច្ចសហការរវាងអង្គភាពស៊ីម៉ាក់ និងអគ្គស្នងការដ្ឋាននគរបាលជាតិ ក្នុងការហ្វឹកហ្វឺនសុនខហិតក្លិនរកគ្រឿងញៀន ដើម្បីទប់ស្កាត់បទល្មើសគ្រឿងញៀន នៅក្នុងប្រទេសកម្ពុជា ។
ឯកឧត្តម អគ្គនាយកស៊ីម៉ាក់ បានថ្លែងឲ្យដឹងទៀតថា ក្រៅពីហិតក្លិនរកគ្រាប់មីន សត្វសុនខ នឹងរួមចំណែកក្នុងការទប់ស្កាត់ និងបង្ក្រាបបទល្មើស តាមរយះទេពកោសល្យ នៃការប្រើប្រាស់ជំនាញរបស់វា ក្នុងការហិតរកគ្រឿងញៀនជាដើម ។ដូចនេះអង្គភាពស៊ីម៉ាក់ នឹងបង្កើនការហ្វឹកហាត់សុនខហិតក្លិនរកគ្រឿងញៀនឲ្យបានច្រើនបន្ថែមទៀត ។
សូមបញ្ជាក់ថា វគ្គហ្វឹកហ្វឺនមូលដ្ឋានគ្រឹះ និងអ្នកឯកទេសបញ្ជាសុនខ ប្រតិបត្តិការហិតគ្រឿងញៀនជំនាន់ទី១នេះ មានសិក្ខាកាមចូលរួមចំនួន ២៥នាក់ ស្ត្រី៤នាក់ ក្នុងនោះសិក្ខាកាមជានគរបាលជាតិចំនួន ២០នាក់ និងមកពីបណ្តាកងឯកភាពកំចាត់មីន របស់ស៊ីម៉ាក់ ចំនួន៥នាក់។ វគ្គហ្វឹកហ្វឺននេះបានចាប់ផ្តើមដំណើរការកាលពីដើមខែកុម្ភៈ នឹងធ្វើពិបិទនៅថ្ងៃទី១១ ខែមិថុនា ឆ្នាំ២០២៥នេះ៕
