កំពង់ឆ្នាំង ៖ក្រុមការងារព័ត៌មាន និងសាធារណមតិ នៃមន្ទីរព័ត៌មានខេត្តកំពង់ឆ្នាំងនៅថ្ងៃទី៣១ ខែឧសភា ឆ្នាំ២០២៥នេះ បានបន្តធ្វើយុទ្ធនាការប្រឆាំងព័ត៌មានក្លែងក្លាយ ដោយបានដើរក្បួនផ្សព្វផ្សាយ នៅក្នុងក្រុងកំពង់ឆ្នាំង ។
ការដើរជាក្បួនផ្សព្វផ្សាយ ក្នុងយុទ្ធនាការប្រឆាំងព័ត៌មានក្លែងក្លាយនេះ ធ្វើឡើងក្រោមអធិបតីភាព លោកឈឹម វុទ្ធា អភិបាលរងខេត្ត និងមានការអញ្ជើញចូលរួមពីលោក ឈាង វណ្ណៈ ប្រធានស្តីទី នៃមន្ទីរព័ត៌មានខេត្តកំពង់ឆ្នាំងផងដែរ ។
លោក ហឹង ចូច អនុប្រធានមន្ទីរ និងជាប្រធានក្រុមការងារព័ត៌មាន និងសាធារណមតិ ខេត្តកំពង់ឆ្នាំង បានថ្លែងឲ្យដឹងថា យុទ្ធនាការនិយាយថាទេ ចំពោះព័ត៌មានក្លែងក្លាយ បានចាប់ផ្តើមពីថ្ងៃទី១ ខែមេសា ឆ្នាំ២០២៥ ក្នុងគោលបំណងដើម្បីកាត់បន្ថយឲ្យនៅកម្រិតតិចបំផុត ហើយឈានទៅលប់បំបាត់ទាំងស្រុងនូវព័ត៌មានក្លែងក្លាយពីលំហព័ត៌មាន នៅក្នុងសង្គមកម្ពុជា សំដៅធានាឲ្យបាននូវសន្តិសុខព័ត៌មាន ។
លោក អនុប្រធានមន្ទីរ បញ្ជាក់ថា ការដើរជាក្បួនក្នុងយុទ្ធនាការថ្ងៃនេះ ជាសកម្មភាពមួយក្នុងចំណោមសកម្មភាពជាច្រើន ដែលកន្លងមក ក្រុមការងារព័ត៌មាន និងសាធារណមតិ នៃមន្ទីរព័ត៌មានខេត្តកំពង់ឆ្នាំង បានចុះផ្សព្វផ្សាយនៅតាមសាលារៀន និងទីប្រជុំជននានាក្នុងខេត្ត ដើម្បីបង្កើនការយល់ដឹង ដល់ប្រជាពលរដ្ឋ ក្នុងការប្រុងប្រយ័ត្នចំពោះព័ត៌មានក្លែងក្លាយ ដែលតែតតែកើតមាន នៅក្នុងសង្គម ។
លោក ហឹង ចូច អនុប្រធានមន្ទីរ និងជាប្រធានក្រុមការងារព័ត៌មាន និងសាធារណមតិខេត្តកំពង់ឆ្នាំង បានថ្លែងបញ្ជាក់បន្ថែមថា ការផលិត ឬការចែកចាយព័ត៌មានក្លែងក្លាយ គឺបំផ្លាញខ្លួនឯង គ្រួសារ និងសង្គមជាតិ ។ដូច្នេះយើងត្រូវរួមគ្នាដើម្បីកម្ពុជាគ្មានព័ត៌មានក្លែងក្លាយ ។
លោក ឈឹម វុទ្ធា អភិបាលរងខេត្តកំពង់ឆ្នាំង បានអំពាវនាវដល់សាធារណជនទូទៅ អ្នកសារព័ត៌មាន អ្នកផលិតមាតិការ ពិសេសយុវជន សូមចូលរួមទប់ស្កាត់ព័ត៌មានក្លែងក្លាយទាំងឡាយ តាមរយះការផ្សព្វផ្សាយព័ត៌មានពិត និងកុំចែកចាយព័ត៌មានក្លែងក្លាយ ។
សូមជម្រាបជូនថា ក្រសួងព័ត៌មាន រៀបចំការអនុវត្តយុទ្ធនាការ «និយាយថាទេចំពោះព័ត៌មានក្លែងក្លាយ- Say No to Fake News» សំដៅធានាឱ្យបាននូវសុវត្ថិភាពព័ត៌មានសម្រាប់អ្នកប្រើប្រាស់ និងធានាសន្តិសុខព័ត៌មាន ដែលសន្តិសុខព័ត៌មាននេះ គឺក្រសួងព័ត៌មាន ផ្តោតជាសំខាន់ចំនួន៣ ទី១៖ ធានាសិទ្ធិទទួលព័ត៌មានរបស់ប្រជាពលរដ្ឋ, ទី២៖ គុណភាពព័ត៌មាន ផ្តល់ជូនប្រជាពលរដ្ឋ និងទី៣៖ សុវត្ថិភាពព័ត៌មានសម្រាប់ប្រជាជនប្រើប្រាស់ ហើយកិច្ចការងារទាំងនេះ គឺជាការរួមចំណែកដល់ការពង្រឹងសន្តិសុខ និងស្ថិរភាពសង្គម ៕
