ខេត្តកំពង់ឆ្នាំង ៖នាព្រឹកថ្ងៃទី២០ ខែឧសភា ឆ្នាំ២០២៥ លោក ដូវ គឹមស៊ីន ប្រធានគណៈកម្មាធិការអនុសាខាកាកបាទក្រហមកម្ពុជាស្រុកជលគិរី បានដឹកនាំមន្រ្ដីអនុសាខាកាកបាទក្រហមស្រុក និងអាជ្ញាធរឃុំកំពង់អុស ចុះសួរសុខទុក្ខគ្រួសាររងគ្រោះរលំនិងរបើកដំបូលផ្ទះដោយខ្យល់កន្ត្រាក់ចំនួន ១២គ្រួសារ នៅភូមិថ្មី និងភូមិគៀនតាម៉ា ឃុំកំពង់អុស ស្រុកជលគិរី ខេត្តកំពង់ឆ្នាំង។
នៅក្នុងឱកាសនោះ លោក ដូវ គឹមស៊ីន បានពាំនាំការសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ឯកឧត្តម ស៊ុន សុវណ្ណារិទ្ធិ ប្រធានគណៈកម្មាធិការសាខា ដែលបាន ចូលរួមសោកស្ដាយចំពោះការខូចខាត ព្រមទាំងវត្ថុមានតម្លៃដែលបាត់បង់ក្នុងគ្រោះថ្នាក់ខ្យល់កន្ត្រាក់នេះ ដែលជាកម្លាំងញើសឈាម របស់បងប្អូនប្រជាពលរដ្ឋ ខិតខំរកបានដោយការងារសុចរិត ។
លោកក៏បានបន្តថា សូមកុំមានការអស់សង្ឃឹម ព្រោះគ្មាននរណាម្នាក់ចង់ឱ្យហេតុការណ៍នេះកើតឡើងនោះទេ ដូច្នេះសូមបន្តតស៊ូខិតខំ ប្រឹងប្រែង បន្តទៅមុខទៀត ដើម្បីគ្រួសារអាចមានជីវភាពល្អប្រសើរឡើងវិញ ព្រមទាំងបានផ្ដាំផ្ញើអោយប្រជាពលរដ្ឋទាំងអស់ គិតគូរថែទាំសុខភាពអោយបានល្អ ដោយរស់នៅត្រូវមានអនាម័យ ពិសាទឹកដាំឆ្អិន និងបរិភោគអាហាររូបត្ថម្ភអោយបានត្រឹមត្រូវ។
ចំពោះអំណោយដែលត្រូវចែកជូនប្រជាពលរដ្ឋ រងគ្រោះដោយសារខ្យល់កន្ត្រាក់ទាំង១២គ្រួសារមាន អង្ករ៣០ គីឡូក្រាម មី ១កេស ត្រីខ១យួរ ទឹកត្រី១យួរ ទឹកស៊ីអ៊ីវ ១យួរ និងថវិកា១០០,០០០ ៛ និងបន្ថែមតង់ ១ ដល់គ្រួសារដែលរលំផ្ទះទាំងស្រុង។
លោក ដូវ គឹមស៊ីន ក៏បានអញ្ជើញទៅសួរសុខទុក្ខលោកយាយ កូយ រឺន ចាស់ជរា និងបានឧបត្ថម្ភថវិកាផ្ទាល់ខ្លួន ១០០,០០០ ៛ និងអញ្ជើញទៅសួរសុខទុក្ខ លោក ហង្ស ជៀន ជំទប់ទី១ ឃុំកំពង់អុស និងភរិយា ដែលមានសុខភាពទ្រុតទ្រោម និងបានឧបត្ថម្ភ ទឹកសុទ្ធវីតាល់ ១កេស ភេសជ្ជៈ ១កេស និងថវិកា ៣០០,០០០ ៛ សរុបថវិកាចំនួន៤០០,០០០ ៛ ៕
