កំពង់ឆ្នាំង ៖សាលាពុទ្ធិកសិក្សាខេត្តកំពង់ឆ្នាំងបើកបវេសនកាលឆ្នាំងសិក្សាថ្មី ២០២៥.២០២៦ កាលពីរសៀលថ្ងៃទី៧ ខែឧសភា ឆ្នាំ២០២៥ នៅវត្តខេមវ័ន្ត (ហៅវត្តខ្សាម ) ក្រោមព្រះអធិបតីភាព សម្តេចព្រះពោធិវ័ង្ស កិត្តិបណ្ឌិតណយ ច្រឹក សម្តេចព្រះសង្ឃនាយករងទី១ នៃព្រះរាជាណាចក្រកម្ពុជា ។
និមន្ត និងអញ្ជើញចូលរួមក្នុងពិធីនេះដែរ មានលោកស្រី ប៊ន សុភី អភិបាលរង ខេត្តកំពង់ឆ្នាំង ព្រះសិលាភិរ័ត ហែម ឡូត ព្រះវិន័យធរគណខេត្ត ព្រះមន្រ្តីសង្ឃខេត្ត ក្រុង ស្រុកនិង សមណសិស្ស សិស្ស និងសណនិស្សិត និស្សិត ជាច្រើនអង្គ នាក់។
លោកស្រី ប៊ន សុភី អភិបាលរងខេត្ត បានឱ្យដឹងថា នៅខេត្តកំពង់ឆ្នាំង មានពុទ្ធិកសិស្សាចាប់ពីកំរិតបឋមសិក្សារហូតដល់ឧត្តមសិក្សាដូចជា ផ្នែកពុទ្ធិកបឋមសិក្សា ផ្នែកពុទ្ធិកមធ្យមសិក្សាបឋមភូមិ ផ្នែកពុទ្ធិកមធ្យមសិក្សាទុតិយភូមិ និងពុទ្ធិឧត្តមសិក្សា គឺពុទ្ធិកសាកលវិទ្យាល័យព្រះសីហនុរាជ ខេត្តកំពង់ឆ្នាំង ។
សម្តេចព្រះពោធិវ័ង្ស កិត្តិបណ្ឌិត ណយ ច្រឹក សម្តេចព្រះសង្ឃនាយករងទី១ នៃព្រះរាជាណាចក្រកម្ពុជា បានមានថេរដីការបញ្ជាក់ថា ព្រឹត្តិការបើកបវេសនកាលឆ្នាំសិក្សា២០២៥-២០២៦ នៃសាលាពុទ្ធិកសិក្សានាពេលនេះបានចាប់ផ្តើមហើយ ដែលនេះជាទំព័រថ្មីនៃការសិក្សាសម្រាប់ឆ្នាំថ្មី របស់សមណសិស្សសិស្ស និងសមណនិស្សិត និងស្សិត ក្នុងការសិក្សា បន្ទាប់ពីវិស្សមកាលអស់មួយរយៈពេល ។ដូចនេះព្រះសង្ឃគ្រប់អង្គ ដែលជាសមណសិស្ស និងសិសទាំងអស់ ត្រូវចាប់ផ្តើមខិតខំបន្តការសិក្សាជាបន្តទៀតដើម្បីសង្គមជាតិ និងការរីកចម្រើនផ្នែកពុទ្ធសាសនា តទៅខាងមុខ ។
សម្តេចព្រះពោធិវ័ង្ស កិត្តិបណ្ឌិត ណយ ច្រឹក បានបញ្ជាក់ទៀតថា វត្តអារាម មិនគ្រាន់តែជាទីស្ថានសម្រាប់តែការគោរព និងជាទីសក្ការៈបូជាប៉ុណ្ណោះទេ ប៉ុន្តែគឺជាកន្លែង និងជាប្រភព សម្រាប់បណ្តុះបណ្តាល នូវបញ្ញាញាណ ឬជាថ្នាលបណ្តុះនូវធនធានបញ្ញា និងជាថ្នាលបណ្តុះគ្រាប់ពូជបញ្ញវ័ន្ត សម្រាប់ការអភិវឌ្ឍជាតិលើគ្រប់វិស័យផងដែរ។
ទីវត្តអារាម និងព្រះសង្ឃ មានតួនាទីរួមចំណែក ក្នុងការកសាងសង្គមជាតិមួយប្រកបដោយ សីលធម៌ និងចរិយាធម៌ ដើម្បីឲ្យមានការអភិវឌ្ឍន៍សង្គមកិច្ចប្រកបដោយ សមធម៌ និងចរិយាធម៌។ លើសពីនេះទៀត ចំពោះសង្គមជាតិ ព្រះពុទ្ធសាសនា មានតួនាទីសំខាន់ក្នុងការអភិវឌ្ឍ ត្រូវបានរំលេចឡើង ដើម្បីរួមចំណែកបង្កើនប្រសិទ្ធភាព នៃការអប់រំសីលធម៌ មនុស្សធម៌ តាមមាគ៌ាដ៏ត្រជាក់របស់ ព្រះសម្មាសម្ពុទ្ធបរមគ្រូនៃយើង៕
