អាង​ប្រព្រឹត្ត​កម្ម​ទឹក​កខ្វក់​ក្រុង​កំពង់​ឆ្នាំង​ មាន​សមត្ថភាព​ច្រោះ​ទឹក​កខ្វក់​បាន​ ចំនួន​ ៥ ៤០០​ម៉ែត្រ​គូប​ក្នុង​១​ថ្ងៃ

កំពង់ឆ្នាំង ៖កាលពីថ្ងៃទី០៧ ខែឧសភា ឆ្នាំ២០២៥ ឯកឧត្តម រស់ វណ្ណា រដ្ឋលេខាធិកាក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួង ចុះពិនិត្យការងារនៅស្ថានីយប្រព្រឹត្តកម្មទឹកកខ្វក់ក្រុងកំពង់ឆ្នាំង ខេត្តកំពង់ឆ្នាំង ។

ការចុះពិនិត្យនេះធ្វើឡើង ដើម្បីចុះត្រួតពិនិត្យប្រគល់ ទទួលបច្ចេកទេស អនុគម្រោងសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ក្រុងកំពង់ឆ្នាំង នៃគម្រោងកែលម្អគ្រប់គ្រងបរិស្ថានក្រុង ជុំវិញបឹងទន្លេសាប ក្រោមហិរញ្ញប្បទានសហប្រតិបត្តិការរបស់ធនាគារអភិវឌ្ឍន៍អាស៊ី ដើម្បីត្រៀមលក្ខណៈធ្វើពិធីប្រគល់ ទទួលជាផ្លូវការ ជូនមន្ទីរសាធារណការ និងដឹកជញ្ជូនខេត្តកំពង់ឆ្នាំង ដើម្បីប្រតិបត្តិការ គ្រប់គ្រង និងថែទាំបន្ត។

សូមបញ្ជាក់ថា អនុគម្រោងសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ ក្រុងកំពង់ឆ្នាំង នៃគម្រោងកែលម្អគ្រប់គ្រងបរិស្ថានក្រុង ជុំវិញបឹងទន្លេសាបនេះមានភូមិសាស្ត្រ ស្ថិតនៅក្រុងកំពង់ឆ្នាំង ខេត្តកំពង់ឆ្នាំង ដែលបានចុះកិច្ចសន្យាសាងសង់កាលពីថ្ងៃទី០៨ ខែសីហា ឆ្នាំ២០២២។

គ្រោងសាងសង់នេះមានរយៈពេលចំនួន៣០ខែ និងបានបញ្ចប់នៅខែមករា ឆ្នាំ២០២៥ ហើយបានធ្វើការប្រតិបត្តិការ សាកល្បង៣ខែ ចាប់ពីខែកុម្ភៈ ដល់ខែមេសា ឆ្នាំ២០២៥នេះ។

អាងប្រព្រឹត្តកម្មទឹកកខ្វក់នេះ មានសមត្ថភាពច្រោះទឹកកខ្វក់បានចំនួន ៥ ៤០០ម៉ែត្រគូបក្នុង១ថ្ងៃ ៕