ខេត្តកំពង់ឆ្នាំង បញ្ចប់ការវាស់វែងដីធ្លីមានលក្ខណៈជាប្រព័ន្ធ

កំពង់ឆ្នាំង ៖ ខេត្តកំពង់ឆ្នាំងត្រូវបានប្រកាសបញ្ចប់ការវាស់វែងដី មានលក្ខណៈជាប្រព័ន្ធនៅថ្ងៃទី៧ ខែឧសភា ឆ្នាំ២០២៥ ក្រោមអធិបតីភាព ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់ និងឯកឧត្តម បណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ទទួលបន្ទុកបេសកម្មពិសេស និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តកំពង់ឆ្នាំង ។

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានថ្លែងឲ្យដឹងថា នៅក្នុងពិធីនេះក៏មានការប្រគល់ជូនវិញ្ញាបនបត្រសម្គាល់ម្ចាស់អចលនវត្ថុ ( បណ្ណកម្មសិទ្ធិ ) ជូនប្រជាពលរដ្ឋ ចំនួន ៤ ២៨៣ បណ្ណផងដែរ ។នេះជាផ្នែកមួយ ក្នុងចំណោមកិច្ចការជាច្រើន របស់រាជរដ្ឋាភិបាល ដែលបង្ហាញពីការយកចិត្តទុកដាក់ ចំពោះប្រជាពលរដ្ឋ ក្នុងជីវភាពរស់នៅ ក្នុងការបង្កើនសុវត្តិភាពលើការកាន់កាប់ ប្រើប្រាស់ដីធ្លី និងសិទ្ធិសេរីភាព ក្នុងការអភិវឌ្ឍន៍សេដ្ឋកិច្ចគ្រួសារ ដោយផ្អែកលើបណ្ណកម្មសិទ្ធិ ដែលប្រជាពលរដ្ឋទទួលបាន ។

ឯកឧត្តម ស៊ុន សុវណ្ណារិទ្ធិ បានថ្លែងបញ្ជាក់ទៀតថា រាជរដ្ឋាភិបាលដឹកនាំដោយសម្តេចអគ្គមហាសេនាបតីតេជោ ហ៊ុន សែន និងបន្តមកសម្តេចមហាបវរធិបតី ហ៊ុន ម៉ាណែត បានដឹកនាំប្រទេសឲ្យឈានទៅមុខជាជំហានៗ បង្កើតបាននូវសមិទ្ធផលធំៗជាប្រវត្តិសាស្ត្រយ៉ាងច្រើន ជូនជាតិមាតុភូមិ ក្នុងបុព្វហេតុកសាង និងការពារ ការរស់ឡើងវិញរបស់ប្រទេសជាតិ និងការពាររាល់សមិទ្ធផល នៃសង្គមជាតិ ហើយកំពុងស្ថិតនៅក្នុងជំហានថ្មីដ៏សំខាន់ នៃដំណើរការអភិវឌ្ឍន៍ ជាបន្តបន្ទាប់ ។

នៅក្នុងឳកាសនោះ ឯកឧត្តម បណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តកំពង់ឆ្នាំងបានថ្លែងអំណរគុណចំពោះ ឯកឧត្តម សាយ សំអាល់ ឧបនាយករដ្ឋមន្ត្រី រដ្ខមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលបានចាត់ឲ្យមន្ទីរ និងមន្ត្រីរបស់ក្រសួងចុះយុទ្ធនាការ ចុះបញ្ជីដីធ្លីមានលក្ខណៈជាប្រព័ន្ធជូនបងប្អូនប្រជាពលរដ្ឋ ក្នុងខេត្តកំពង់ឆ្នាំង ។ហើយបានបិទបញ្ចប់យុទ្ធនាការវាស់វែងប្រកបដោយភាពជោគជ័យ ។

ឯកឧត្តម បណ្ឌិតសភាចារ្យ បានចាត់ទុកការប្រគល់បណ្ណកម្មសិទ្ធិ គឺជាការផ្តល់សិទ្ធិសុវត្តិភាពតាមផ្លូវច្បាប់ បង្កើនតម្លៃដីធ្លី និងបញ្ចប់វិវាទដីធ្លីទាំងឡាយ ដែលមានសារសំខាន់សម្រាប់ប្រជាពលរដ្ឋម្ចាស់ដី សំដៅលើកស្ទួយកម្រិតជីវភាពរស់នៅ ទទួលបាននូវសិទ្ធិស្របច្បាប់ ក្លាយជាម្ចាស់ដីពិតប្រាកដ ដែលត្រូវបានការពារដោយច្បាប់ និងធានាដោយរដ្ឋ ៕